വയനാട്ടില്‍ ബത്തേരി പോലീസ് സ്റ്റേഷനിലെ 20 ഓളം പോലീസുകാര്‍ നിരീക്ഷണത്തില്‍; കണ്ടൈന്‍മെറ്റ് സോണായ പഞ്ചായത്തുകളില്‍ കര്‍ശന നിയന്ത്രണം, ആദിവാസികള്‍ ഏറെയുള്ള തിരുനെല്ലിയിലും അതീവ ജാഗ്രത, ബത്തേരി മാനന്തവാടി കോടതികള്‍ അടച്ചു
വയനാട്ടില്‍ ജോലിക്കിടെ പൊലീസ് ഉദ്യോഗസ്ഥര്‍ക്ക് കൊവിഡ് രോഗബാധയുണ്ടായത് വിവിധ വകുപ്പുദ്യോഗസ്ഥര്‍ക്കിടിയിലും പൊതു ജനങ്ങളിലും ആശങ്ക ഉയര്‍ത്തി. ബത്തേരി പോലീസ് സ്റ്റേഷനിലെ 20 ഓളം പോലീസുകാര്‍ നിരീക്ഷണത്തില്‍. കൂടുതല്‍ പോലീസുകാരെ പരിശോധിക്കും. പിപിഇ കിറ്റ് ധരിച്ച രണ്ടു പൊലീസുകാരും ഒരു ആരോഗ്യപ്രവര്‍ത്തകനും മാത്രമാണ് സ്റ്റേഷനില്‍ ഉണ്ടാവുക. ഒഴിവാക്കാനാകാത്ത നടപടികള്‍ തീര്‍ക്കാനാണ് ഈ സംവിധാനം. സ്റ്റേഷന്‍ സമ്പൂര്‍ണമായി അണുവിമുക്തമാക്കും. കണ്ടൈന്‍മെറ്റ് സോണായ പഞ്ചായത്തുകളില്‍ കര്‍ശന നിയന്ത്രണം. നെന്മേനി, ഇടവക, തിരുനെല്ലി പഞ്ചായത്തുകളാണ് കണ്ടൈന്‍മെന്റ് സോണിലുള്ളത്. മാനന്തവാടി മുന്‍സിപ്പാലിറ്റിയും കണ്ടൈന്‍മെന്റ് സോണില്‍. ആദിവാസികള്‍ ഏറെയുള്ള തിരുനെല്ലിയിലും അതീവ ജാഗ്രത, ബത്തേരി മാനന്തവാടി കോടതികള്‍ അടച്ചു,
ഭയപ്പെടേണ്ട സാഹചര്യമില്ലെന്ന് ഉന്നത ഉദ്യോഗസ്ഥര്‍ ആവര്‍ത്തിക്കുമ്പോഴും, അതിര്‍ത്തികളിലടക്കം താഴെ തട്ടിലെ ഉദ്യോഗസ്ഥര്‍ പണിയെടുക്കുന്നത് കാര്യമായ സുരക്ഷാ സംവിധാനങ്ങളൊന്നുമില്ലാതെയാണ്.ആറ് അതിര്‍ത്തി ചെക്പോസ്റ്റുകളിലൂടെ ദിവസവും ആയിരക്കണക്കിന് മലയാളികളാണ് കേരളത്തിലേക്ക് തിരിച്ചെത്തുന്നത്. ഇവരില്‍ പലരും വരുന്നത് ചെന്നൈ ബാംഗ്ലൂര്‍ തുടങ്ങിയ വന്‍തോതില്‍ രോഗപകര്‍ച്ചയുണ്ടായ മേഖലകളില്‍നിന്നാണ്.
എന്നാല്‍ പരിശോധനാ കേന്ദ്രത്തിലെത്തുന്നതിന് പോലും മുന്‍പ് ഇവരുമായി അടുത്തിടപഴകുന്നവരാണ് പൊലീസ്, റവന്യൂ മുതലായ വിവിധ വകുപ്പുദ്യോഗസ്ഥര്‍. ഇവര്‍ എത്രത്തോളം സുരക്ഷിതരാണെന്ന് ഉന്നത ഉദ്യോഗസ്ഥര്‍ കാര്യമായി ചിന്തിക്കുന്നില്ല.സുരക്ഷാ മുന്‍കരുതലിനായി പലരുടെയും മുഖത്ത് വിലകുറഞ്ഞമാസ്‌ക് മാത്രമാണുള്ളത്. അതിര്‍ത്തി കടന്നെത്തുന്നവരുമായി ഇടപഴകുന്നവര്‍ കുറഞ്ഞത് എന്‍95 മാസ്‌കുകളെങ്കിലും നിര്‍ബന്ധമായും ധരിക്കണമെന്നാണ് ആരോഗ്യ പ്രവര്‍ത്തകര്‍ നല്‍കുന്ന നിര്‍ദേശം.
സ്വന്തം വാഹനമില്ലാതെ അതിര്‍ത്തി കടന്നെത്തുന്നവരുമായി യാത്ര ചെയ്യേണ്ടിവരുന്ന ടാക്സി ഡ്രൈവര്‍മാര്‍, പരിശോധനാ കേന്ദ്രങ്ങള്‍ക്കു സമീപത്തെ ചെറുകിട കച്ചവടക്കാര്‍ തുടങ്ങിയവരും വേണ്ടത്ര സുക്ഷാ മുന്‍കരുതലുകള്‍ പാലിക്കുന്നില്ല.
തമിഴ്‌നാട്ടില്‍നിന്നുവന്ന് കഴിഞ്ഞയാഴ്ച കൊവിഡ് സ്ഥിരീകരിച്ച ട്രക്ക് ഡ്രൈവറില്‍ നിന്നാണ് ഇവര്‍ക്ക് രോഗം പകര്‍ന്നതെന്നാണ് അധികൃതരുടെ നിഗമനം. പൊലീസുകാര്‍ക്ക് കൊവിഡ് പിടിപെട്ടതിനെ തുടര്‍ന്ന് സേനയില്‍ കൂടുതല്‍ പേരെ പരിശോധിക്കും. പൊലീസുകാര്‍ക്കിടയില്‍ നടത്തിയ പരിശോധനയിലാണ് രോഗം സ്ഥിരീകരിച്ചത്. മാനന്തവാടി സ്റ്റേഷനിലെ കൂടുതല്‍ പേര്‍ നിരീക്ഷണത്തിലാണ്. മാനന്തവാടി സ്റ്റേഷനിലേക്ക് പൊതുജനങ്ങള്‍ക്ക് പ്രവേശനവും നിഷേധിച്ചു. പരാതികള്‍ നല്‍കാന്‍ സമീപത്തെ പൊലീസ് സ്റ്റേഷനെ ആശ്രയിക്കണം. ഇമെയില്‍ വഴിയും പരാതി നല്കാവുന്നതാണെന്ന് ഉദ്യോഗസ്ഥര്‍ അറിയിച്ചു.
https://www.facebook.com/Malayalivartha
