മണ്ണാര്‍ക്കാട് തിരുവിഴാംകുന്ന് വനമേഖലയില്‍ ചെരിഞ്ഞ ഗര്‍ഭിണിയായ കാട്ടാനയ്ക്ക് സ്‌ഫോടകവസ്തു പൊട്ടി പരുക്കേറ്റിട്ട് രണ്ടാഴ്ചയെങ്കിലും കഴിഞ്ഞിട്ടുണ്ടാകുമെന്നും അത്ര നാള്‍ കാര്യമായ ഭക്ഷണം കഴിച്ചിട്ടുണ്ടാകില്ലെന്നുമാണ് വനപാലകര്‍ സംശയിക്കുന്നത്. ആനയുടെ വയറ്റില്‍ ഭക്ഷണത്തിന്റെ അംശമില്ലായിരുന്നുവെന്നാണ് പോസ്റ്റ്‌മോര്‍ട്ടം റിപ്പോര്‍ട്ട്.

ശ്വാസകോശത്തില്‍ വെള്ളം കയറിയതിനാലാണ് ആന ചെരിഞ്ഞതെങ്കിലും തുടര്‍ച്ചയായി ഭക്ഷണം കഴിക്കാത്തതിന്റെ ക്ഷീണവും തളര്‍ച്ചയുമുണ്ടായിരുന്നു. സ്‌ഫോടനത്തില്‍ മേല്‍ത്താടി, കീഴ്ത്താടി, നാക്ക് എന്നിവയെല്ലാം തകര്‍ന്നിരുന്നതായി പോസ്റ്റുമോര്‍ട്ടം റിപ്പോര്‍ട്ടില്‍ പറയുന്നു. മുറിവുകളില്‍ പുഴുക്കളുണ്ടായിരുന്നു. ദീര്‍ഘനേരം വെള്ളത്തില്‍ കിടന്നതിനാലാകണം, സ്‌ഫോടകവസ്തുവിന്റെ അംശം പോസ്റ്റ്‌മോര്‍ട്ടത്തില്‍ കണ്ടെത്തിയില്ല.

വനപാലകര്‍ ആനയെ കണ്ടെത്തുന്നത് 24-നാണ്. അതിന് ഏതാനും ദിവസം മുന്‍പാണ് പരുക്കേറ്റതെന്നു കരുതുന്നു. കാട്ടിലേക്കു കയറ്റിവിടാന്‍ ശ്രമിച്ചെങ്കിലും തിരിച്ചു വന്നു. 25-ന് ഡോക്ടറെത്തി മയക്കുവെടിവച്ച് ചികിത്സിക്കാന്‍ ആലോചിച്ചപ്പോള്‍, അതു താങ്ങാനുള്ള ആരോഗ്യം ഇല്ലെന്നു കണ്ടെത്തി. മേയ് 27-ന് പുഴയില്‍ ചെരിഞ്ഞു.

വനമേഖലയില്‍ നിന്ന് ഒരു കിലോമീറ്റര്‍ മാറി ജനവാസ മേഖലയ്ക്കു സമീപമാണ് ആനയെ അവസാനമായി കണ്ടത്. ഇവിടെ റബര്‍, വാഴ, പച്ചക്കറി, പൈനാപ്പിള്‍ തുടങ്ങിയവ കൃഷി ചെയ്യുന്നുണ്ട്. വനമേഖലയ്ക്കു സമീപമുള്ള കൃഷിയിടങ്ങളില്‍ ആന, കാട്ടുപന്നി, മയില്‍ തുടങ്ങിയവ ഇറങ്ങുന്നതു പതിവാണ്. ഇവയെ തടയാന്‍ കര്‍ഷകര്‍ പലവട്ടം സര്‍ക്കാരിനെ സമീപിച്ചെങ്കിലും നടപടിയുണ്ടായില്ല. കൃഷിനാശത്തിനു നഷ്ടപരിഹാരവും തുച്ഛമാണ്.