നോട്ട് നിരോധനം സമ്പദ്‌വ്യവസ്ഥയില്‍ കടുത്ത ആഘാതമുണ്ടാക്കിയെന്ന് മോഡിയുടെ മുന്‍ സാമ്പത്തിക ഉപദേഷ്ടാവ് അരവിന്ദ് സുബ്രമണ്യന്‍. സമ്പദ്‌വ്യവസ്ഥയുടെ വളര്‍ച്ചാ നിരക്ക് 6.8 ശതമാനത്തിലേക്ക് ഇടിയാന്‍ നോട്ട് നിരോധനം കാരണമായെന്നും അദ്ദേഹം പറഞ്ഞു. തീരുമാനം നടപ്പിലാക്കുന്നതിന് മുമ്പ് എട്ട് ശതമാനത്തില്‍ വളര്‍ന്നിരുന്ന സമ്പദ്‌വ്യവസ്ഥയാണ് 6.8ലേക്ക് കൂപ്പുകുത്തിയത്. നോട്ട് നിരോധനം നടപ്പിലാക്കി രണ്ട് വര്‍ഷങ്ങള്‍ക്ക് ശേഷമാണ് ഇക്കാര്യത്തില്‍ അരവിന്ദ് സുബ്രമണ്യന്‍ മൗനം വെടിഞ്ഞത്.
നോട്ട് നിരോധനം സമ്പദ്‌വ്യവസ്ഥയില്‍ ഉണ്ടാക്കുന്ന പ്രശ്‌നങ്ങളെ കുറിച്ച് പ്രായോഗികമായ ചര്‍ച്ചകളൊന്നും നടന്നില്ല. അസംഘടിത മേഖലയില്‍ തീരുമാനം ഉണ്ടാക്കുന്ന ആഘാതങ്ങള്‍ പരിഗണിച്ചില്ലെന്നും അരവിന്ദ് വ്യക്തമാക്കി. തീരുമാനം നടപ്പിലാക്കുന്നതിന് മുമ്പ് മുഖ്യസാമ്പത്തിക ഉപദേഷ്ടാവുമായി കൂടിയാലോചനകള്‍ നടന്നിട്ടില്ലെന്നും അദ്ദേഹം വെളിപ്പെടുത്തി. ജി.ഡി.പി വളര്‍ച്ച നിരക്ക് കുറയുന്നതിന് നോട്ട് നിരോധനം കാരണമായി. അതേസമയം, ഇത് മാത്രമാണ് ജി.ഡി.പി കുറയുന്നതിനുള്ള കാരണമെന്ന് പറയാന്‍ സാധിക്കില്ല.

എണ്ണവില ഉയര്‍ന്നതും പലിശനിരക്ക് കൂടിയതും സമ്പദ്‌വ്യവസ്ഥയെയും ജി.ഡി.പിയെയും ബാധിച്ചിട്ടുണ്ട്. എങ്കിലും വളര്‍ച്ചാ നിരക്ക് കുറയാനുള്ള പ്രധാന കാരണങ്ങളിലൊന്ന് നോട്ട് നിരോധനമായിരുന്നു. അസംഘടിത മേഖലയില്‍ തീരുമാനം സൃഷ്ടിച്ച ആഘാതങ്ങളെ കുറിച്ച് കൃതമായ പഠനങ്ങളൊന്നും നടന്നിട്ടില്ലെന്നും അദ്ദേഹം വ്യക്തമാക്കി.