തമിഴ്‌നാട് നിയമസഭ തിരഞ്ഞെടുപ്പിന് മുന്നോടിയായി തിരഞ്ഞെടുപ്പ് പ്രചാരണത്തിന് സോഷ്യല്‍ മീഡിയ റീലുകളിലൂടെ വോട്ട് തേടാന്‍ കുട്ടികളെ ഉപയോഗിക്കുന്ന പ്രവണതയെ രൂക്ഷമായി വിമര്‍ശിച്ച് മദ്രാസ് ഹൈക്കോടതി. ടി.വി.കെ അദ്ധ്യക്ഷനും നിലവിലെ തമിഴ്‌നാട് മുഖ്യമന്ത്രിയുമായ സി ജോസഫ് വിജയ്ക്കും പാര്‍ട്ടിക്കും വേണ്ടി കുട്ടികളെ ഉപയോഗിച്ച് പ്രചാരണം നടത്തിയെന്ന ഹര്‍ജിയിലാണ് കോടതിയുടെ നിരീക്ഷണം. ഇത്തരം പ്രവൃത്തികള്‍ രാഷ്ട്രീയ പ്രേരിതമാണെന്ന് കോടതി ചൂണ്ടിക്കാട്ടി.

അതേസമയം തിരഞ്ഞെടുപ്പ് പ്രചാരണത്തിനുവേണ്ടി കുടുംബബന്ധങ്ങളെയും കുട്ടികളെയും സ്വാധീനിക്കുന്നത് നിലവിലുള്ള തിരഞ്ഞെടുപ്പ് ചട്ടപ്രകാരം നിയമവിരുദ്ധമായി കണക്കാക്കാന്‍ കഴിയില്ലെന്നും കോടതി വ്യക്തമാക്കി. ഇത്തരം പ്രവണതകള്‍ നിരോധിക്കണമോയെന്നും തിരഞ്ഞെടുപ്പ് റദ്ദാക്കാനുള്ള കാരണമായി പരിഗണിക്കണമോയെന്നും പാര്‍ലമെന്റ് ചര്‍ച്ച ചെയ്യേണ്ട വിഷയമാണെന്നും ജസ്റ്റിസ് ഡി. ഭാരത ചക്രവര്‍ത്തി നിരീക്ഷിച്ചു.

2026ലെ നിയമസഭാ തിരഞ്ഞെടുപ്പില്‍ സേലം നോര്‍ത്ത് മണ്ഡലത്തില്‍നിന്ന് വിജയിച്ച ടിവികെ എംഎല്‍എ കെ ശിവകുമാറിന്റെ തിരഞ്ഞെടുപ്പ് വിജയം ചോദ്യം ചെയ്ത് സമര്‍പ്പിച്ച ഹര്‍ജി തള്ളണമെന്ന അപേക്ഷ പരിഗണിക്കവെയാണ് കോടതിയുടെ നിരീക്ഷണം. ശിവകുമാറിനുവേണ്ടി കുട്ടികളെ തിരഞ്ഞെടുപ്പ് പ്രചാരണത്തിന് ഉപയോഗിച്ചെന്നായിരുന്നു ഹര്‍ജിയിലെ ആരോപണം.