കരുതല് ശക്തമാക്കിയിട്ടും സംസ്ഥാനത്ത് കൊവിഡ് വ്യാപനം രൂക്ഷമാകുന്നു... കൊവിഡ് എവിടുന്നു കിട്ടി എന്നൊരു പിടിയുമില്ല, ആ നാല് മരണങ്ങളില് ഞെട്ടി കേരളം
കരുതല് ശക്തമാക്കിയിട്ടും സംസ്ഥാനത്ത് കൊവിഡ് വ്യാപനം രൂക്ഷമാകുന്നു. ഇന്നലെ 94 പേര്ക്ക് രോഗം സ്ഥിരീകരിച്ചു. ഒരു ദിവസത്തെ ഏറ്റവും ഉയര്ന്ന കണക്കാണിത്. ഇതോടെ മൊത്തം രോഗികള് 1588 ആയി. ഉറവിടം കണ്ടെത്താനാകാത്ത നാല് മരണങ്ങള് റിപ്പോര്ട്ട് ചെയ്യപ്പെട്ടതിന് പിന്നാലെ സംസ്ഥാനത്ത് ആശങ്കയും വര്ധിച്ചു.
ഏറ്റവും ഒടുവില് കൊല്ലത്ത് മരിച്ച നിലയില് ആശുപത്രിയില് എത്തിച്ച ആള്ക്ക് എങ്ങനെ രോഗം വന്നുവെന്ന് ആരോഗ്യവകുപ്പിന് വ്യക്തതയില്ല. ലോക്ക്ഡൗണ് ഇളവുകള് ആഘോഷമാക്കുന്ന മലയാളിക്ക് ഒരു മുന്നറിയിപ്പാണ് ഈ തരം രോഗബാധയും മരണങ്ങളും. ആദ്യം തിരുവനന്തപുരം പോത്തന്കോട് രോഗം ബാധിച്ചു മരിച്ച അബ്ദുല് അസീസ്, ചൊവ്വാഴ്ച മരിച്ച വൈദികന് കെ.ജി.വര്ഗീസ്, മഞ്ചേരിയിലെ നാലുമാസം പ്രായമുണ്ടായിരുന്ന നൈഹ ഫാത്തിമ, കൊല്ലത്ത് മരിച്ച കാവനാട് സ്വദേശി സേവ്യര് എന്നിവര്ക്ക് എവിടെനിന്ന് രോഗം കിട്ടി എന്നാണ് വ്യക്തതയില്ലാത്തത്.
വിദേശത്തു നിന്നോ ഇതര സംസ്ഥാനങ്ങളില് നിന്നോ വന്ന ആരെങ്കിലുമായി ഇവര്ക്ക് സമ്പര്ക്കമുണ്ടോയെന്ന് ഇതുവരെ വ്യക്തമായിട്ടില്ല. രോഗം മൂര്ച്ഛിച്ചതിന് ശേഷമാണ് പലരും ആശുപത്രികളില് എത്തുന്നത്. അതുകൊണ്ടു തന്നെ ജീവന് രക്ഷിക്കാന് ഉള്ള ശ്രമം പാളും.
രോഗ ലക്ഷണങ്ങള് കാണിക്കാത്ത വൈറസ് വാഹകരില് നിന്നാകും ഇവര്ക്ക് രോഗം കിട്ടിയതെന്ന് സര്ക്കാര് കരുതുന്നു. അങ്ങനെയെങ്കില് അത്തരം ആളുകള് ഇനിയുമേറെപ്പേര്ക്ക് രോഗം പടര്ത്തിയിട്ടുണ്ടാകില്ലേ എന്നാണ് മറുചോദ്യം.
സംസ്ഥാനത്തെ ടെസ്റ്റ് പൊസിറ്റിവിറ്റി റേറ്റ് - പരിശോധനയില് പോസിറ്റീവ് ആകുന്നവരുടെ എണ്ണം - 1.7 ശതമാനം എന്ന മികച്ച തോതിലാണ്. എന്നാല് ഉറവിടം അജ്ഞാതമായതും സമ്പര്ക്കം വഴിയുമുള്ള രോഗ ബാധ കൂടുന്നതാണ് ആശങ്കയ്ക്ക് കാരണമാകുന്നത്.
കഴിഞ്ഞ ദിവസങ്ങളില് മരിച്ച മൂന്ന് പേര്ക്ക് കൊവിഡ് ബാധിച്ചിരുന്നതായി ഇന്നലെ സ്ഥിരീകരിച്ചതോടെ മൊത്തം കൊവിഡ് മരണം 14 ആയി.സംസ്ഥാനത്ത് രോഗം സ്ഥിരീകരിക്കും മുമ്പ് മരണം ആദ്യമാണ്. ഇത് ആരോഗ്യവകുപ്പിനെ പ്രസന്ധിയിലാക്കുന്നുണ്ട്. ചികിത്സാ സംവിധാനങ്ങളെല്ലാം സജ്ജമാണെങ്കിലും കാര്യങ്ങള് കൈവിട്ടു പോവുകയാണോ എന്നാണ് ആശങ്ക.ചെന്നെയില് നിന്നെത്തിയ പാലക്കാട് സ്വദേശി മീനാക്ഷിയമ്മാള് (73), അബുദാബിയില് നിന്ന് വന്ന മലപ്പുറം എടപ്പാള് സ്വദേശി ഷബ്നാസ് (27), കൊല്ലം കാവനാട് സ്വദേശി സേവ്യര് (65) എന്നിവരാണ് കഴിഞ്ഞ ദിവസങ്ങളില് മരിച്ചത്. ഇന്നലെ ഫലം ലഭിച്ചതോടെയാണ് ഇവരുടെ രോഗബാധ സ്ഥിരീകരിച്ചതെന്ന് മുഖ്യമന്ത്രി പിണറായി വിജയന് വാര്ത്താസമ്മേളനത്തില് അറിയിച്ചു. മീനാക്ഷിയമ്മാള് ശ്വാസകോശരോഗത്തിനും ഷബ്നാസ് അര്ബുദത്തിനും ചികിത്സയിലായിരുന്നു. സേവ്യറിനെ മരിച്ച ശേഷമാണ് ആശുപത്രിയിലെത്തിച്ചത്.രോഗബാധിതര് കുത്തനെ ഉയരുമ്പോഴും സമ്പര്ക്കത്തിലൂടെ രോഗം ബാധിക്കുന്നവരുടെ എണ്ണം കുറവാണെന്നതാണ് ആശ്വാസം.
a
https://www.facebook.com/Malayalivartha