കൈതച്ചക്കയില്‍ പടക്കം വച്ച് കാട്ടാനയെ കൊലപ്പെടുത്തിയ സംഭവത്തില്‍ മൂന്നുപേര്‍ നിരീക്ഷണത്തില്‍. സ്വകാര്യതോട്ടങ്ങളുമായി ബന്ധമുള്ളവരാണ് ഇവരെന്നാണ് ലഭിക്കുന്ന വിവരം. അന്വേഷണം മലപ്പുറം ജില്ലയിലെ കരുവാരക്കുണ്ടിലേക്കും വ്യാപിപ്പിച്ചിട്ടുണ്ട്. എന്നാല്‍ പൈനാപ്പിളിനുള്ളിലെ പടക്കം ഭക്ഷിച്ചു ഗുരുതരമായി പരിക്കേറ്റ ആന ചരിഞ്ഞ സംഭവത്തില്‍ രണ്ടുപേര്‍ കസ്റ്റഡിയില്‍. പ്രതികളെന്ന് സംശയിക്കുന്ന രണ്ടുപേരാണ് കസ്റ്റഡിയില്‍ ഉള്ളതെന്നാണ് സൂചന. പ്രദേശത്തെ ഒരു എസ്റ്റേറ്റ് സൂപ്പര്‍ വൈസറും ഒരു കര്‍ഷകനുമാണ് ഇപ്പോള്‍ കസ്റ്റഡിയില്‍ ഉള്ളത്. തെളിവുകള്‍ ലഭിച്ചാല്‍ അറസ്റ്റ് ഉണ്ടാവുമെന്ന് ആണ് റിപ്പോര്‍ട്ട്. അതേ സമയം സംഭവത്തില്‍ അന്വേഷണം പുരോഗമിക്കുകയാണെന്ന് മുഖ്യമന്ത്രി പിണറായി വിജയന്‍ ഇന്നലെ അറിയിച്ചിരുന്നു .

കൈതച്ചക്കയില്‍ സ്ഫോടക വസ്തു വെച്ചത് ആനയെ ലക്ഷ്യം വെച്ചല്ലെന്ന് സൂചന. കര്‍ഷകര്‍ കൃഷി നശിപ്പിക്കാനെത്തുന്ന പന്നികളെ ഓടിക്കാനായി ചെയ്തതാണെന്നാണ് ഉയരുന്ന സംശയം. കൈതച്ചക്കയില്‍ ഒളിപ്പിച്ച സ്ഫോടകവസ്തു പൊട്ടിത്തെറിച്ച് ആന ചെരിഞ്ഞ സംഭവത്തില്‍ അന്വേഷണം ശക്തമാകുമ്പോള്‍ ഉദ്യോഗസ്ഥരെ കുഴക്കുന്നത് ആനയുടെ സഞ്ചാരപഥമാണ്.

ആന ചരിഞ്ഞതിന് സമീപത്തെ തോട്ടങ്ങളിലെ ആളുകളെും മറ്റും ചോദ്യം ചെയ്യുന്നത് തുടരുകയാണ്. പ്രദേശത്തെ തോട്ടങ്ങള്‍ കേന്ദ്രീകരിച്ച് അന്വഷണം നടക്കുന്നുണ്ടെങ്കിലും ആന കിലോമീറ്ററുകള്‍ സഞ്ചരിച്ച് ഈ പ്രദേശത്ത് എത്തിയതാകാമെന്ന ചിലസംശയങ്ങളുമുണ്ട്. ആനയുടെ ദാരുണാന്ത്യത്തിന് പിന്നാലെ സംഭവം നടന്നത് മലപ്പുറത്താണെന്ന് വ്യാജവാര്‍ത്തയിറക്കി പ്രമുഖര്‍ ചില വംശീയ പ്രസ്താവനകള്‍ നടത്തിയതും ചര്‍ച്ചയാവുകയാണ്.

നിലമ്ബൂര്‍ വനമേഖലയില്‍ സമാനമായ രീതിയില്‍ പരിക്കേറ്റ ആനയെ കണ്ടെത്തിയതാണ് ഇതിനുകാരണം. ഈ ആനയ്ക്കും ചരിഞ്ഞ ആനയ്ക്കും ഉണ്ടായ മുറിവുകള്‍ സമാനമാണ്.പ്രദേശത്തെ ചിലര്‍ കൃഷിയിടങ്ങളിലും തോട്ടങ്ങളിലും എത്തുന്ന ആനയുള്‍പ്പെടെയുള്ള വന്യമൃഗങ്ങളെ തുരത്താനായി സ്‌ഫോടക വസ്തുക്കള്‍ ഉപയോഗിക്കുന്നുണ്ട്. ഈ സ്‌ഫോടക വസ്തുക്കളാണോ ആനയുടെ ജീവനെടുത്തതെന്നാണ് അന്വേഷിക്കുന്നത്.

ഈ പ്രദേശത്ത് വന്യമൃഗങ്ങളെ തുരത്താന്‍ സ്‌ഫോടകവസ്തുക്കള്‍ നിറച്ച ആഹാരസാധനങ്ങള്‍ വിതറുന്ന ആളുകളെക്കുറിച്ച് അന്വേഷണ സംഘത്തിന് സൂചന കിട്ടിയെന്നാണ് വിവരം.ആനയുടെ ജീവനെടുത്തത് പന്നിപ്പടക്കമാണെന്ന നിഗമനത്തിലാണ് അധികൃതര്‍ ഇപ്പോള്‍ എത്തിയിരിക്കുന്നത്.
ആന ചരിഞ്ഞ സംഭവത്തില്‍ വനംവകുപ്പും മണ്ണാര്‍ക്കാട് പൊലീസും പ്രത്യേകം കേസെടുത്തിട്ടുണ്ട്.

അതേസമയം പരിക്കേറ്റ ആന ദിവസങ്ങളോളം ജനവാസ മേഖലയിലുള്‍പ്പെടെ നിലയുറപ്പിച്ചിട്ടും വേണ്ടചികിത്സ നല്‍കുന്നതിന് വനംവകുപ്പ് ഒന്നും ചെയ്തില്ലെന്ന ആരോപണവുമായി പ്രദേശവാസികള്‍ കഴിഞ്ഞദിവസം രംഗത്തെത്തിയിരുന്നു. പരാതിപ്പെട്ടിട്ടും ആനയെ കാട്ടിലേക്ക് തിരിച്ചയക്കാന്‍ മാത്രമാണ് വനപാലകര്‍ ശ്രമിച്ചതെന്നാണ് നാട്ടുകാര്‍ പറയുന്നത്.ഇതിനെക്കുറിച്ചും അന്വേഷിക്കണമെന്നും അവര്‍ആവശ്യപ്പെടുന്നു. എന്നാല്‍ ആരോപണത്തില്‍ കഴമ്ബില്ലെന്നും ഡോക്ടറുടെയടക്കം സേവനം തേടിയിരുന്നെന്നുമാണ് വനംവകുപ്പ് പറയുന്നത്.