ദേവസ്വംബോഡില്‍ വന്‍ അഴിമതി; പഴയപാത്രങ്ങള്‍ ആവശ്യത്തിലധികമായി ഉള്ളപ്പോള്‍ പുതിയത് വാങ്ങി എന്ന വ്യാജ രേഖ ചമച്ചാണ് ക്രമക്കേട് നടത്തിയിരിക്കുന്നതെന്ന് കണ്ടെത്തല്‍
മുന്‍ ദേവസ്വം ബോര്‍ഡ് സെക്രട്ടറി വി.എസ്.ജയകുമാര്‍ അഴിമതി നടത്തിയെന്ന് അന്വേഷണ കമ്മിഷന്‍. 2013 മുതല്‍ 2015 വരെയുള്ള രണ്ട് തീര്‍ത്ഥാടന കാലത്ത് ശബരിമലയില്‍ പാത്രങ്ങളും മറ്റ് ഉപകരണങ്ങളും വാങ്ങി എന്ന പേരില്‍ അന്നത്തെ ശബരിമല എക്സിക്യൂട്ടിവ് ഓഫീസര്‍ ആയിരുന്ന ജയകുമാര്‍ വന്‍ അഴിമതിയാണ് നടത്തിയത്. പഴയപാത്രങ്ങള്‍ ആവശ്യത്തിലധികമായി ഉള്ളപ്പോള്‍ പുതിയത് വാങ്ങി എന്ന വ്യാജ രേഖ ചമച്ചാണ് ക്രമക്കേട് നടത്തിയത്.
ഹൈക്കോടതി നിയോഗിച്ച ഓഡിറ്റ് വിഭാഗമാണ് നേരത്തേ ക്രമക്കേട് കണ്ടെത്തിയത്. ഇതേ തുടര്‍ന്നാണ് വിജലന്‍സ് അന്വേഷണം ആരംഭിച്ചത്. അന്വേഷണ ഉദ്യോഗസ്ഥനായ മുന്‍ വിജിലന്‍സ് ട്രൈബ്യൂണല്‍ ചെറുന്നിയൂര്‍ ശശിധരന്‍ നായര്‍ സമര്‍പ്പിച്ച അന്വേഷണ റിപ്പോര്‍ട്ടില്‍ ജയകുമാറിനെതിരെ ഉയര്‍ന്ന ആരോപണങ്ങള്‍ നിലനിക്കുന്നത് തന്നെയാണ് എന്ന് വ്യക്തമാകുന്നു. എന്നാല്‍ 2003-2004 തീര്‍ത്ഥാടന കാലത്ത് പമ്പ എഒ ആയിരുന്ന ജയകുമാറിനെതിരെ ഉയര്‍ന്ന സമാനമായ അരോപണത്തില്‍ തെളിവില്ല എന്നും കണ്ടെത്തി.
പാത്രങ്ങള്‍ വാങ്ങിയതിന് തെളിവായി സമര്‍പ്പിച്ച ബില്ലുകള്‍ വ്യാജമാണെന്നും തെളിഞ്ഞു. അഴിമതി പിടിക്കപ്പെടാതിരിക്കാന്‍ ബന്ധപ്പെട്ട ഫയലുകള്‍ ജയകുമാര്‍ നശിപ്പിച്ചു. നടപടിക്രമങ്ങള്‍ പാലിക്കാതെയാണ് കരാറുകാര്‍ക്ക് പണം നല്‍കിയത്. ജയകുമാറിനെതിരായ അന്വേഷണത്തില്‍ സഹകരിക്കാത്ത ഓഡിറ്റ് വിഭാഗം ജോയിന്റ ഡയറക്ടര്‍ സുദര്‍ശനനെതിരായും മുന്‍ ജോയിന്റ ഡയറക്ടര്‍ വേലപ്പന്‍ നായര്‍ക്ക് എതിരായും നടപടിക്കും റിപ്പോര്‍ട്ടില്‍ ശുപാര്‍ശയുണ്ട്.
വി.എസ് ജയകുമാറിന്റെ സഹോദരന്‍ വി. എസ് ശിവകുമാര്‍ ദേവസ്വം മന്ത്രി ആയിരിക്കേ നടന്ന കോടികളുടെ അഴിമതി യുഡിഎഫിനെയും പ്രതിരോധത്തിലാക്കുകയാണ്. 2017 മുതല്‍ നിര്‍ബന്ധിത അവധിയിലായിരുന്ന ജയകുമാര്‍ ജോലിയില്‍ നിന്നും വിരമിച്ചു. ദേവസ്വം ബോര്‍ഡിന് സമര്‍പ്പിച്ച അന്വേഷണ റിപ്പോര്‍ട്ട് സര്‍ക്കാറിനും ഹൈക്കോടതിക്കും കൈമാറും.
https://www.facebook.com/Malayalivartha
