വടകരയ്ക്കടുത്ത് ആയഞ്ചേരി ചേറ്റുകെട്ടിയില്‍ ഓടിക്കൊണ്ടിരുന്ന പുത്തന്‍ കാര്‍ തീ പിടിച്ച് പൂര്‍ണമായി കത്തി നശിച്ചു.

കാറിന്റെ വശത്തുനിന്ന് തീ ഉയരുന്നത് കണ്ട് നാട്ടുകാര്‍ വിളിച്ചു പറഞ്ഞതിനെ തുടര്‍ന്ന് അതിനുള്ളിലെ യാത്രക്കാര്‍ ഇരുവരും പെട്ടെന്ന് പുറത്തിറങ്ങിയതിനാല്‍ അപകടം ഒഴിവായി.

തിരുവള്ളൂര്‍ കാഞ്ഞിരാട്ടു തറയിലെ എടക്കുടി മുഹമ്മദിന്റെ കാറാണ് ഇന്നലെ വൈകിട്ട് 4.40 ഓടെ കത്തിയത്. ഇദ്ദേഹം ഭാര്യയോടൊപ്പം കാറില്‍ ആയഞ്ചേരിയിലേക്ക് പോകുന്നതിനിടെയായിരുന്നു സംഭവം.

കഴിഞ്ഞ ഫെബ്രുവരിയില്‍ വാങ്ങിയ കാറാണിത്. 9 ലക്ഷം രൂപയുടെ നഷ്ടം കണക്കാക്കുന്നതായി വടകരയില്‍ നിന്ന് സീനിയര്‍ ഫയര്‍ ആന്‍ഡ് സേഫ്റ്റി ഓഫിസര്‍ കെ.എം.ഷമേജ് കുമാറിന്റെ നേതൃത്വത്തില്‍ എത്തിയ അഗ്‌നി രക്ഷാസേന തീ കെടുത്തിയ ശേഷം അറിയിച്ചു.