കോഴിക്കോട് ജില്ലയ്ക്ക് ലോക്ഡൗണിലൂടെ പുതുജീവന്‍. കനോലി കനാലിലെ വെള്ളത്തിന്റെ ഗുണമേന്മ വര്‍ധിച്ചതായി സിഡബ്ല്യുആര്‍ഡിഎം നടത്തിയ പഠനത്തില്‍ കണ്ടെത്തി. വെള്ളത്തിന്റെ പിഎച്ച് മൂല്യവും ഓക്‌സിജന്റെ അളവും വര്‍ധിച്ചു. കനോലി കനാലിലേക്ക് അഴുക്കുവെള്ളം ഒഴുക്കുന്നതും മാലിന്യം തള്ളുന്നതും കുറഞ്ഞതോടെ കനോലിയിലൂടെ ഇപ്പോള്‍ ഒഴുകുന്നതു തെളിനീര്‍. മാലിന്യത്തില്‍ നിന്നും വിസര്‍ജ്യത്തില്‍ നിന്നും വെള്ളത്തില്‍ കലരുന്ന കോളിഫോം ബാക്ടീരിയയുടെ അളവും കുറഞ്ഞു. വെള്ളത്തില്‍ അടിയുന്ന മാലിന്യം വിഘടിക്കാന്‍ ആവശ്യമായ ഓക്‌സിജന്റെയും അളവു കുറഞ്ഞെന്നും പഠനത്തില്‍ കണ്ടെത്തി.

സിഡബ്ല്യുആര്‍ഡിഎം വാട്ടര്‍ ക്വാളിറ്റി വിഭാഗം കല്ലായിപ്പാലം മുതല്‍ അകലാപ്പുഴയും കനോലി കനാലും ചേരുന്ന സ്ഥലം വരെയുള്ള 10 കേന്ദ്രങ്ങളില്‍ നിന്നു മേയ് അവസാന വാരം വെള്ളത്തിന്റെ സാംപിള്‍ എടുത്താണ് പഠനം നടത്തിയത്. സിഡബ്ല്യുആര്‍ഡിഎം ഈ വര്‍ഷം ഫെബ്രുവരിയില്‍ ശേഖരിച്ച സാംപിളുകളുമായി നടത്തിയ താരതമ്യത്തിലാണു വെള്ളത്തിന്റെ ഗുണമേന്മ വര്‍ധിച്ചതായി കണ്ടെത്തിയത്.

വെള്ളത്തിന്റെ പിഎച്ച് മൂല്യം ഫെബ്രുവരിയില്‍ 7.4 ആയിരുന്നത് മേയില്‍ 8.6 ആയി ഉയര്‍ന്നു. ലയിച്ചു ചേര്‍ന്ന ഓക്‌സിജന്റെ അളവ് 1.67 മുതല്‍ 4.22 മില്ലിഗ്രാം/ലീറ്റര്‍ വരെ ആയിരുന്നത് 5.33 ആയി വര്‍ധിച്ചു. വെള്ളത്തില്‍ ജീവജാലങ്ങളുടെ നിലനില്‍പ്പിനു വേണ്ടിയുള്ള ഓക്‌സിജന്റെ അളവാണിത്. വെള്ളത്തില്‍ അടിഞ്ഞുകൂടുന്ന മാലിന്യങ്ങളുടെ വിഘടനത്തിനു വേണ്ട ഓക്‌സിജന്റെ (ബയോ കെമിക്കല്‍ ഓക്‌സിജന്‍ ഡിമാന്‍ഡ്) അളവ് ഫെബ്രുവരിയില്‍ 41 മില്ലിഗ്രാം/ലീറ്റര്‍ ആയിരുന്നു. മേയില്‍ ഇത് 8.2 ആയി കുറഞ്ഞു.

കേന്ദ്ര മലിനീകരണ നിയന്ത്രണ ബോര്‍ഡിന്റെ മാനദണ്ഡം അനുസരിച്ച് 30 മില്ലിഗ്രാം/ലീറ്റര്‍ ബയോ കെമിക്കല്‍ ഓക്‌സിജന്‍ ഡിമാന്‍ഡാണ് അനുവദനീയമായ പരിധി. ഒരു കേന്ദ്രത്തിലൊഴികെ എല്ലായിടത്തും കോളിഫോം ബാക്ടീരിയയുടെ സാന്നിധ്യം ഫെബ്രുവരിയില്‍ നടത്തിയ പഠനത്തില്‍ അനുവദനീയമായ 500 എംപിഎന്‍ എന്ന അളവിനെക്കാള്‍ കൂടുതലായിരുന്നു. എന്നാല്‍ മേയില്‍ നടത്തിയ പഠനത്തില്‍ എല്ലാ കേന്ദ്രങ്ങളിലും ഇത് 500 എംപിഎന്നിലും കുറവാണ്.