അഞ്ചലില്‍ ഉത്രയെ കൊലപ്പെടുത്തിയ കേസില്‍ ഭര്‍ത്താവ് സൂരജിന്റെ അമ്മ രേണുകയെയും സഹോദരി സൂര്യയെയും ക്രൈംബ്രാഞ്ച് സംഘം ഇന്നലെ പത്തു മണിക്കൂറുകളോളമാണ് ചോദ്യം ചെയ്തത്. ആദ്യ വട്ടം ഇവരെ ഏഴു മണിക്കൂറാണ് ചോദ്യം ചെയ്തത്. മാത്രമല്ല ഇവരെ വീണ്ടും ചോദ്യം ചെയ്യാന്‍ വിളിപ്പിക്കും എന്നാണ് വ്യക്തമാക്കിയിരിക്കുന്നത്

സംഭവത്തിലെ തെളിവ് നശിപ്പിക്കല്‍, കേസിലെ ഗുഢാലോചനയില്‍ പങ്ക് എന്നിവ സംബന്ധിച്ചായിരുന്നു ചോദ്യം ചെയ്യല്‍. കേസിലെ പ്രതികളായ സൂരജിനും പിതാവ് സുരേന്ദ്രനും ഒപ്പം ഇരുത്തിയായിരുന്നു ആദ്യഘട്ട ചോദ്യം ചെയ്യല്‍. അന്വേഷണ സംഘത്തിന്റെ ആവര്‍ത്തിച്ചുള്ള പല ചോദ്യങ്ങള്‍ക്കും പൊട്ടികരച്ചിലായിരുന്നു അമ്മയുടെയും മകളുടെയും മറുപടി. കൊലപാതകത്തിന്റെ ആസൂത്രണത്തിലും നടത്തിപ്പിലും ഒരു പങ്കുമില്ലെന്ന് ഇരുവരും ആവര്‍ത്തിക്കുന്നു. സൂരജിന്റെ ചില സുഹൃത്തുക്കളുടെയും ബന്ധുക്കളുടെയും മൊഴി എടുത്ത ശേഷം അമ്മയെയും സഹോദരിയെയും വീണ്ടും ചോദ്യം ചെയ്യും.

ഗാര്‍ഹിക പീഡന പരാതിയില്‍ കുടുംബാംഗങ്ങള്‍ക്കെതിരെ കേസെടുത്തേക്കുമെന്നാണു വിവരം. ചോദ്യം ചെയ്ത് വിട്ടയച്ച ശേഷം ആരെയൊക്കെ ഫോണ്‍ ചെയ്തു, എവിടെയൊക്കെ പോയി, ആരെയൊക്കെ കണ്ടു എന്നതെല്ലാം പൊലീസ് നിരീക്ഷിച്ചിരുന്നു. ഈ വിവരങ്ങളെല്ലാം രാവിലെ മുതല്‍ അന്വേഷണ സംഘം രേണുകയോടും സൂര്യയോടും ചോദിച്ച് തീര്‍പ്പുണ്ടാക്കി.ഉച്ചയ്ക്ക് ശേഷമാണ് നാല് പേരെയും ഒന്നിച്ച് ചോദ്യം ചെയ്യാന്‍ തുടങ്ങിയത്. അടൂര്‍ പറക്കോട്ടെ ഭര്‍ത്തൃവീട്ടില്‍ അണലിയെ കൊണ്ടുവന്നത് കുടുംബാംഗങ്ങളുടെ അറിവോടെയാണെന്ന് സൂരജും പിതാവ് സുരേന്ദ്രനും അന്വേഷണ സംഘത്തോട് നേരത്തേതന്നെ വെളിപ്പെടുത്തിയിരുന്നു. രണ്ടാമത് മൂര്‍ഖന്‍ പാമ്പിനെക്കൊണ്ട് കടിപ്പിച്ച് ഉത്രയെ കൊലപ്പെടുത്തിയ സംഭവത്തിലും സൂരജിന്റെ വീട്ടിലെ മറ്റുള്ളവര്‍ക്ക് അറിവുണ്ടായിരുന്നോയെന്നതാണ് പ്രധാനമായും അന്വേഷണ സംഘം തിരയുന്നത്. റൂറല്‍ എസ്.പി ഹരിശങ്കറും ക്രൈംബ്രാഞ്ച് ഓഫീസില്‍ എത്തിയിരുന്നു. അന്വേഷണം നടന്നുവരികയാണെന്നും മറ്റ് വിവരങ്ങള്‍ പിന്നീട് അറിയിക്കാമെന്നും അദ്ദേഹം പറഞ്ഞു.

ഡിവൈഎസ്പി: എ.അശോകന്റെ നേതൃത്വത്തിലായിരുന്നു ചോദ്യം ചെയ്യല്‍. പൊലീസ് കസ്റ്റഡി കാലാവധി അവസാനിച്ചതിനെത്തുടര്‍ന്ന് സുരേന്ദ്രനെ ജുഡീഷ്യല്‍ കസ്റ്റഡിയിലേക്കു മാറ്റി. മറ്റൊരു പ്രതി പാമ്പുപിടിത്തക്കാരന്‍ ചാവര്‍കോട് സുരേഷും റിമാന്‍ഡിലാണ്.