പ്രളയ സാധ്യത മുന്നില്‍ കണ്ട് അണക്കെട്ടുകളിലെ ജലനിരപ്പ് ക്രമീകരിക്കാന്‍ നടപടി വേണമെന്ന് ആവശ്യപ്പെട്ട് ജസ്റ്റിസ് ദേവന്‍ രാമചന്ദ്രന്‍ ചീഫ് ജസ്റ്റിസ് അയച്ച കത്തിനെ തുടര്‍ന്ന് ഹൈക്കോടതി സ്വമേധയാ കേസെടുത്തിരുന്നു. അതിന് മറുപടിയായി സംസ്ഥാനം പറഞ്ഞത് ഭയക്കേണ്ട സാഹചര്യമില്ല എന്നാണ്. പ്രളയം ഉണ്ടായാല്‍ നേരിടാന്‍ പൂര്‍ണ സജ്ജമാണെന്നാണ് സംസ്ഥാന സര്‍ക്കാര്‍ ഹൈക്കോടതിയെയും അറിയിച്ചിരിക്കുന്നത്. നിലവില്‍ ഡാമുകള്‍ തുറക്കേണ്ട സാഹചര്യമില്ല.

ഡാമുകളിലെ ജലനിരപ്പ് സംബന്ധിച്ച് ഹൈക്കോടതി സ്വമേധയാ എടുത്ത കേസിലാണ് സര്‍ക്കാര്‍ വിശദീകരണം. കേരളത്തിലെ ഡാമുകളിലെ ജലനിരപ്പ് സംബന്ധിച്ച ആശങ്കപ്പെടേണ്ട സാഹചര്യമില്ലെന്നാണ് സംസ്ഥാന സര്‍ക്കാര്‍ ഹൈക്കോടതിയെ അറിയിച്ചത്. ഇടുക്കിയില്‍ അടക്കം എല്ലാ ഡാമുകളിലും ജലനിരപ്പ് സാധാരണയിലും താഴെയാണ്. ശക്തമായ മഴ ഉണ്ടായാല്‍ നേരിടാന്‍ ഓരോ ഡാമുകള്‍ക്കും കര്‍മപദ്ധതി ഉണ്ട്. ഡാമുകളിലെ ജലനിരപ്പ് ക്രമീകരണം സംബന്ധിച്ച് ദുരന്ത നിവാരണ അതോറിറ്റി മാര്‍ഗനിര്‍ദ്ദേശങ്ങള്‍ പുറപ്പെടുവിച്ചിട്ടുണ്ടെന്നും സര്‍ക്കാര്‍ വ്യക്തമാക്കിയ സാഹചര്യത്തിലും

സംസ്ഥാനത്തെ വൈദ്യുതി പദ്ധതികളുടെ സംഭരണികളിലെ ജലനിരപ്പ് ഉയരുന്നു എന്നാണ് റിപ്പോര്‍ട്ട്. കഴിഞ്ഞ വര്‍ഷത്തേക്കാള്‍ ഇരട്ടിയോടടുത്ത് വെള്ളം സംഭരണികളിലുണ്ടെന്നും. കനത്ത മഴ തുടരുന്നതിനാല്‍ ഇടുക്കിയും ശബരിഗിരിയും ഉള്‍പ്പെടെ പ്രധാന പദ്ധതികളിലെല്ലാം നീരൊഴുക്കില്‍ വലിയ വര്‍ധനയാണുള്ളതെന്നും വ്യക്തമാവുകയാണ്. വെള്ളിയാഴ്ചത്തെ കണക്കുകള്‍പ്രകാരം സംസ്ഥാനത്തെ സംഭരണികളിലെല്ലാംകൂടി 25 ശതമാനം വെള്ളമുണ്ട്. കൂടുതല്‍ വെള്ളമുള്ളത് ഇടുക്കിയിലാണ്. നീരൊഴുക്കിലും കൂടുതല്‍ വര്‍ധന ഇവിടെയാണ്. 1040 ദശലക്ഷം യൂണിറ്റ് വൈദ്യുതി ഉത്പാദിപ്പിക്കാനുള്ള വെള്ളം സംസ്ഥാനത്തുണ്ട്.

കഴിഞ്ഞവര്‍ഷം ഇതേ സമയം 605 ദശലക്ഷം യൂണിറ്റ് വൈദ്യുതിക്കുള്ള വെള്ളമേ ഉണ്ടായിരുന്നുള്ളൂ. പ്രധാന പദ്ധതിയായ ഇടുക്കിയില്‍ 35 ശതമാനം വെള്ളമുണ്ട്. അതേസമയം, രണ്ടാമത്തെ വലിയ പദ്ധതിയായ ശബിരിഗിരിയില്‍ 12 ശതമാനം വെള്ളമേയുള്ളൂ. ഇവിടെ ആനത്തോട് ഡാമിന്റെ ബലപ്പെടുത്തല്‍ ജോലികള്‍ നടക്കുന്നതിനാല്‍ സംഭരണികളില്‍ ജലനിരപ്പ് കുറച്ചിരുന്നു. മഴ ശക്തമായതോടെ സംസ്ഥാനത്തെ വൈദ്യുതി ഉപയോഗത്തിലും കുറവുണ്ട്. കഴിഞ്ഞ ദിവസം 66 ദശലക്ഷം യൂണിറ്റായിരുന്നു ഉപയോഗം. ഇതില്‍ 48 ദശലക്ഷം യൂണിറ്റ് മാത്രമാണ് പുറത്തുനിന്ന് വാങ്ങിയത്.