കൃതിയുടെ കൊലപാതകത്തില്‍ ഇരുട്ടില്‍ തപ്പി പോലീസ്.... വിവാഹസമയത്ത് 70 പവനോളം സ്വര്‍ണവും ഇന്നോവ ക്രിസ്റ്റ കാറും വൈശാഖ് വാങ്ങിയതായി കൃതിയുടെ പിതാവ് ... ബിസിനസ് ആവശ്യങ്ങള്‍ക്കും വസ്തു വാങ്ങാനുമായി കൃതിയുടെ മാതാപിതാക്കളെ കൊണ്ട് പല ബാങ്കുകളില്‍ നിന്നായി ലക്ഷങ്ങള്‍ വായ്പ എടുപ്പിച്ചു.... കൃത്രിയുടേതും ഉത്രയുടേതു പോലൊരു കൊലപാതകമോ?
ഉത്ര വധക്കേസില്‍ അന്വേഷണം പുരോഗമിക്കുമ്പോള്‍ ഏഴു മാസം മുന്‍പു ജില്ലയെ പിടിച്ചു കുലുക്കിയ മറ്റൊരു വധക്കേസില്‍ ഇപ്പോഴും കുറ്റപത്രം പോലും സമര്‍പ്പിക്കാതെ ഇരുട്ടില്‍ തപ്പി പൊലീസ്. മുളവനാല്‍ ചരുവിള പുത്തന്‍വീട്ടില്‍ കൃതി (25)യെ ഭര്‍ത്താവ് വൈശാഖ് ബൈജു(28) ശ്വാസം മുട്ടിച്ചു കൊലപ്പെടുത്തിയെന്നാണു കേസ്. കൃതിയുടെ വീട്ടില്‍ കഴിഞ്ഞ നവംബര്‍ 11 നായിരുന്നു സംഭവം. കീഴടങ്ങിയ വൈശാഖ് കുടുംബ പ്രശ്‌നത്തെത്തുടര്‍ന്ന് താന്‍ തന്നെയാണ് കൊല നടത്തിയതെന്ന് മൊഴിയും നല്‍കിയിരുന്നു.
എന്നാല്‍, റിമാന്‍ഡില്‍ കഴിയവേ വൈശാഖിനു 44 ദിവസത്തിനു ശേഷം കോടതി ജാമ്യം അനുവദിച്ചു. വൈശാഖിനു ജാമ്യം അനുവദിച്ച ശേഷം കേസ് അന്വേഷണം മരവിച്ച നിലയിലാണെന്നും നീതി നിഷേധിക്കപ്പെടുകയാണെന്നും കൃതിയുടെ മാതാപിതാക്കള്‍ ആരോപിക്കുന്നു.
4 വര്‍ഷം മുന്‍പ് തലച്ചിറ സ്വദേശിയെ വിവാഹം കഴിച്ച കൃതി മകള്‍ക്ക് 4 മാസം പ്രായമുള്ളപ്പോള്‍ ബന്ധം വേര്‍പെടുത്തുകയും ഫെയ്‌സ്ബുക്കിലൂടെ പരിചയപ്പെട്ട വൈശാഖിനെ 2018ല്‍ വിവാഹം കഴിക്കുകയുമായിരുന്നു. വിവാഹസമയത്ത് 70 പവനോളം സ്വര്‍ണവും ഇന്നോവ ക്രിസ്റ്റ കാറും വൈശാഖ് വാങ്ങിയതായി കൃതിയുടെ പിതാവ് മോഹനന്‍ പറയുന്നു. പിന്നീട് ബിസിനസ് ആവശ്യങ്ങള്‍ക്കും വസ്തു വാങ്ങാനുമായി കൃതിയുടെ മാതാപിതാക്കളെ കൊണ്ട് പല ബാങ്കുകളില്‍ നിന്നായി 25 ലക്ഷത്തോളം രൂപ വൈശാഖ് വായ്പ എടുപ്പിച്ചിരുന്നു. കൃതിയുടെ അമ്മയുടെ പേരിലുള്ള സ്ഥലം പണയപ്പെടുത്തണമെന്ന ആവശ്യത്തെത്തുടര്‍ന്നാണ് ഇരുവരും തമ്മിലുള്ള വഴക്ക് രൂക്ഷമായത്.
തുടര്‍ന്ന് സ്വന്തം വീട്ടിലേക്ക് മടങ്ങിയ കൃതിയെ അനുനയിപ്പിക്കാനെന്ന ഭാവത്തില്‍ എത്തിയ വൈശാഖ് വീട്ടുകാരുടെ സാന്നിധ്യത്തിലാണു കൊല നടത്തിയതെന്നും മോഹനന്‍ പറഞ്ഞു. കൃതിയുടെ ഡയറി തന്നെ കൊല ആസൂത്രിതമാണെന്നതിന്റെ ശക്തമായ തെളിവായി നിലനില്‍ക്കെ ജാമ്യം അനുവദിച്ചത് അംഗീകരിക്കാനാവില്ലെന്നും മുന്‍പും ക്രിമിനല്‍ കേസുകളില്‍ പ്രതിയായ വൈശാഖ് സ്വാധീനം ഉപയോഗിച്ച് രക്ഷപ്പെടുകയാണെന്നും കുടുംബം ആരോപിക്കുന്നു.
അതേസമയം, കൂടുതല്‍ തെളിവുകള്‍ ശേഖരിക്കേണ്ടതുണ്ടെന്നും തെളിവെടുപ്പിലെ കാലതാമസം കൊണ്ടാണ് കുറ്റപത്രം സമര്‍പ്പിക്കാത്തതെന്നുമാണ് പൊലീസിന്റെ വിശദീകരണം. വൈശാഖിനു ജാമ്യം അനുവദിച്ചതിനെതിരെ ഹൈക്കോടതിയില്‍ അപ്പീല്‍ നല്‍കിയിട്ടുണ്ടെന്നും പൊലീസ് അറിയിച്ചു.
അതേസമയം ഉത്രയെ പാമ്പിനെക്കൊണ്ടു കടിപ്പിച്ചു കൊലപ്പെടുത്തിയെന്ന കേസില്‍ ഭര്‍ത്താവ് സൂരജിന്റെ കുടുംബാംഗങ്ങളുടെ മൊഴിയിലെ വൈരുധ്യങ്ങളില്‍ അന്വേഷണം ശക്തമാക്കി ക്രൈംബ്രാഞ്ച്. ഇന്നലെ സൂരജിനെ അടൂരിനു സമീപം പറക്കോട്ടെ വീട്ടില്‍ എത്തിച്ചു തെളിവെടുപ്പു നടത്തി. ഇയാളുടെ സാന്നിധ്യത്തില്‍ സംഭവം പുനഃചിത്രീകരിച്ചു.
പതിനേഴര മണിക്കൂര്‍ ക്രൈംബ്രാഞ്ച് ഓഫിസിലും തുടര്‍ന്നു വീട്ടിലും സൂരജിന്റെ അമ്മയെയും സഹോദരിയെയും ചോദ്യം ചെയ്തിരുന്നു. ഉത്രയെ ആദ്യം അണലിയെക്കൊണ്ടു കടിപ്പിച്ച സംഭവത്തില്‍ മൊഴികളിലെ പൊരുത്തക്കേടുകള്‍ പൊലീസ് കണ്ടെത്തിയിട്ടുണ്ട്. രണ്ടാം നിലയിലെ കിടപ്പുമുറിയില്‍ വച്ചാണ് ഉത്രയ്ക്ക് അന്നു പാമ്പുകടിയേറ്റത്. തുടര്‍ച്ചയായ ചോദ്യം ചെയ്യലിനു ശേഷവും സംശയങ്ങള്‍ അവശേഷിച്ചതോടെയാണ് അടൂരിലെ വീട്ടിലെത്തി വീണ്ടും പരിശോധന നടത്തിയത്.
https://www.facebook.com/Malayalivartha
