ഇളവുകള് നിയന്ത്രിക്കാനൊരുങ്ങി കേന്ദ്രം... രാജ്യത്ത് കഴിഞ്ഞ 24 മണിക്കൂറില് പുതുതായി 9971 കൊവിഡ് കേസുകള് , ആകെ കൊവിഡ് കേസുകളുടെ എണ്ണം രണ്ടരലക്ഷത്തോട് അടുക്കുന്നു
രാജ്യത്ത് കഴിഞ്ഞ 24 മണിക്കൂറില് 9971 കൊവിഡ് കേസുകള് പുതുതായി റിപ്പോര്ട്ട് ചെയ്തു. ഇതോടെ രാജ്യത്തെ ആകെ കൊവിഡ് കേസുകളുടെ എണ്ണം രണ്ടരലക്ഷത്തോട് അടുക്കുകയാണ്. കഴിഞ്ഞ 24 മണിക്കൂറില് 287 പേര് കൊവിഡ് ബാധിതരായി ഇന്ത്യയില് മരിച്ചു. ഇതോടെ രാജ്യത്തെ ആകെ കൊവിഡ് മരണങ്ങള് 6929 ആയി ഉയര്ന്നു. ഞായറാഴ്ച രാവിലെ കേന്ദ്ര ആരോഗ്യമന്ത്രാലയം പുറത്തു വിട്ട കണക്കുകള് പ്രകാരം ഇതുവരെ 2,46,628 കൊവിഡ് കേസുകളാണ് ഇന്ത്യയില് റിപ്പോര്ട്ട് ചെയ്തിരിക്കുന്നത്.
രാജ്യത്ത് കൊവിഡ് കേസുകള് വര്ധിക്കുന്ന സാഹചര്യത്തില് ലോക്ക്ഡൗണ് ഇളവുകള് നിയന്ത്രിക്കാനൊരുങ്ങി കേന്ദ്രം. ലോക്ക്ഡൗണ് ഇളവുകളില് നിയന്ത്രണം വരുത്തുന്നതിനെപ്പറ്റിആഭ്യന്തര മന്ത്രാലയം ആലോചിക്കുകയാണ്. തുടര്ച്ചയായ നാലാം ദിവസവും കൊവിഡ് കേസുകള് 9000 കടന്നിരുന്നു. ഇതിന്റെ അടിസ്ഥാനത്തിലാണ് തീരുമാനം.
നല്കിയിരിക്കുന്ന ഇളവുകള് ലോക്ക്ഡൗണിന്റെ ലക്ഷ്യത്തെ ബാധിക്കുന്ന തരത്തില് ഉപയോഗിക്കപ്പെടുന്നു എന്നാണ് വിലയിരുത്തല്. ഇതിന്റെ അടിസ്ഥാനത്തിലാണ് ഇളവുകള് നിയന്ത്രിക്കാന് കേന്ദ്രം ആലോചിക്കുന്നത്. ഇത് കേന്ദ്രം ഒറ്റക്കല്ല തീരുമാനിക്കുന്നത്. വിവിധ സംസ്ഥാന സര്ക്കാരുകളോട് ഇക്കാര്യത്തില് നിര്ദ്ദേശം നല്കാന് കേന്ദ്ര ക്യാബിനറ്റ് സെക്രട്ടറി ആവശ്യപ്പെട്ടിട്ടുണ്ട്. ആഭ്യന്തര സെക്രട്ടറി ഇക്കാര്യത്തില് ചീഫ് സെക്രട്ടറിമാരോട് സംസാരിക്കുന്നുണ്ട്. അതുകൊണ്ട് തന്നെ ദേശീയ തലത്തില് കേന്ദ്ര ആഭ്യന്തര മന്ത്രാലയത്തിന്റെ ഭാഗത്തു നിന്ന് ഉത്തരവ് പുറപ്പെടുവിക്കുന്നതിനു പകരം സംസ്ഥാന സര്ക്കാരുകള്ക്ക് നിര്ദ്ദേശം നല്കി പ്രാദേശികമായി നിയന്ത്രണം ഏര്പ്പെടുത്തുന്നതിനെപ്പറ്റിയാണ് ആലോചിക്കുന്നത്. പ്രധാനമന്ത്രി ഇന്ന് ആഭ്യന്തര മന്ത്രിയെയും ആരോഗ്യമന്ത്രിയെയും കാണുന്നുണ്ട്. ഇതോടെ ഈ വിഷയത്തില് വ്യക്തമായ ചിത്രം ലഭിക്കുമെന്നാണ് കരുതപ്പെടുന്നത്.
ഡല്ഹി അടക്കമുള്ള വിവിധ സംസ്ഥാനങ്ങളില് കൊവിഡ് ബാധ രൂക്ഷമായിട്ടും കൂടുതല് ഇളവുകള് അനുവദിക്കുന്നുണ്ട്. ഇതും ആഭ്യന്തര മന്ത്രാലയത്തെ മാറി ചിന്തിക്കാന് പ്രേരിപ്പിക്കുകയാണ്.
ലോക്ക് ഡൗണ് ഇളവുകള് വരുത്തിയതിന് ശേഷം രാജ്യത്ത് കോവിഡ് ബാധിതരുടെ എണ്ണത്തില് വലിയ തോതിലുള്ള വര്ധനനവാണ് രേഖപ്പെടുത്തിയത്. പല സ്ഥലങ്ങളിലും ജനങ്ങള് സാമൂഹ്യ അകലം പാലിക്കുന്നില്ലെന്നതാണ് വര്ധനവിനുള്ള കാരണമായി കണക്കാക്കുന്നത്. ഇതിനിടെയാണ് ചില സംസ്ഥാനങ്ങള് ഇളവുകളില് പുതിയ മാര്ഗരേഖ വേണമെന്ന ആവശ്യം ഉന്നയിച്ചത്. ഈ സാഹചര്യത്തിലാണ് ഇളവുകളില് മാറ്റം കൊണ്ടുവരുന്നത് കേന്ദ്രസര്ക്കാര് പരിഗണിക്കുന്നത്.
അതേസമയം ഇതുസംബന്ധിച്ച് ഒരു അന്തിമ തീരുമാനം ഉണ്ടായിട്ടില്ല. കേന്ദ്ര മന്ത്രിസഭാ ഉപസമിതി ഈ വിഷയം ചര്ച്ച ചെയ്യേണ്ടതുണ്ട്. ഒരുഭാഗത്ത് ഇളവുകള് വേണമെന്ന് സംസ്ഥാനങ്ങള് ആവശ്യപ്പെടുമ്പോള് തന്നെ ഇളവുകളില് കര്ശന മാര്ഗരേഖകള് കൂടി വേണമെന്ന് അവര് ആവശ്യപ്പെടുന്നു. അതിനാല് ഇക്കാര്യത്തില് വിശദമായ ചര്ച്ചകള്ക്ക് ശേഷമേ അന്തിമ തീരുമാനം ഉണ്ടാകു. ഇക്കാര്യം സര്ക്കാരിന്റെ സജീവ പരിഗണനയില് ഉണ്ടെന്നാണ് ആഭ്യന്തര മന്ത്രാലയ വൃത്തങ്ങള് നല്കുന്ന സൂചന.
https://www.facebook.com/Malayalivartha