പണി വരുന്നുണ്ട് അവറാച്ചാ..; പി. സി കുട്ടന്‍ പിള്ള സ്പീക്കിംഗ്' സൈബര്‍ ലോകത്ത് വന്‍ ഹിറ്റ്
സോഷ്യൽ മീഡിയ അനാവശ്യത്തിനും ഉപയോഗിക്കുന്ന ഒരു തലമുറയിലൂടെയാണ് നാം ഇന്ന് കടന്നു പോകുന്നത്. ദിനംപ്രതി റിപ്പോർട്ട് ചെയ്യുന്ന സൈബർ ക്രൈമുകളുടെ എണ്ണവും വളരെ വലുതാണ്. ഈ സാഹചര്യത്തിൽ സോഷ്യല്‍ മീഡിയയിലെ തെറ്റായ പ്രവണതകള്‍ ചൂണ്ടിക്കാണിച്ച്‌ തിരുത്താനും നല്ലതിനെ പ്രോത്സാഹിപ്പിക്കാനുമായി കേരളാ പോലീസിന്‍റെ 'പി. സി കുട്ടന്‍ പിള്ള സ്പീക്കിംഗ്' ഓണ്‍ലൈന്‍ പ്രതികരണ പരിപാടിക്ക് തുടക്കമായി. പരിപാടിക്ക് വന്‍ സ്വീകാര്യതയാണ് സൈബര്‍ലോകത്ത് ലഭിക്കുന്നത്.
സോഷ്യല്‍ മീഡിയയില്‍ 24 മണിക്കൂറും സൈബര്‍ പട്രോളിംഗ് നടത്തുന്ന സൈബര്‍ സെല്ലുകള്‍, സൈബര്‍ സ്റ്റേഷനുകള്‍, സൈബര്‍ ഡോമുകള്‍ തുടങ്ങിയവയുടെ കണ്ണിലുടക്കുന്ന പോസ്റ്റുകള്‍, വീഡിയോകള്‍, എന്നിവ സംബന്ധിച്ച്‌ കേരളാ പോലീസിന്‍റെ പ്രതികരണം അറിയിക്കുകയാണ് പരിപാടിയുടെ ഉദ്ദേശ്യം. കേരളാ പോലീസിന്‍റെ ഔദ്യോഗിക യു ട്യൂബ് ചാനലില്‍ ഒന്നാം ഭാഗം 'പണി വരുന്നുണ്ട് അവറാച്ചാ..'റിലീസ് ചെയ്തു മണിക്കൂറുകള്‍ക്കകം ഒരു ലക്ഷത്തിലധികം പേര്‍ വീഡിയോ കണ്ട് അഭിപ്രായം അറിയിച്ചിട്ടുണ്ട്.
പ്രോഗ്രാമിന്‍റെ പിന്നണിയില്‍ പ്രവര്‍ത്തിക്കുന്നവരെല്ലാം തന്നെ പോലീസുകാരാണ്. പോലീസിന്‍റെ സോഷ്യല്‍ മീഡിയ സെല്‍ നോഡല്‍ ഓഫീസറും എ.ഡി.ജി.പിയുമായ മനോജ് എബ്രഹാമിന്‍റെ ആശയത്തില്‍ സോഷ്യല്‍ മീഡിയ സെല്ലിലെ അരുണ്‍ ബി. റ്റി ആണ് രചനയും സംവിധാനവും നിര്‍വ്വഹിച്ചിരിക്കുന്നത്. എഡിറ്റിങ്ങും ഗ്രാഫിക്സും ബിമല്‍ വി. എസ്. അഭിനയിച്ചിരിക്കുന്നത് ജിബിന്‍ ഗോപിനാഥ്. ക്യാമറ രഞ്ജിത് കുമാര്‍,അസ്സോസിയേറ്റ് ഡയറക്ടര്‍ സന്തോഷ് സരസ്വതി. പ്രൊഡക്ഷന്‍ ടീം ശിവകുമാര്‍.പി, അഖില്‍. പി എന്നിവരുമാണ്.
https://www.facebook.com/Malayalivartha
