സംസ്ഥാനത്തെ പ്രധാന ഹൈന്ദവ ആരാധനാലയങ്ങള്‍ ജൂണ്‍ 30 വരെ തുറക്കേണ്ടെന്ന തീരുമാനത്തിലാണിപ്പോൾ. തിരുവനന്തപുരം പത്മനാഭ സ്വാമി ക്ഷേത്രമടക്കം നിരവധി പ്രധാന ഹൈന്ദവ ആരാധനാലയങ്ങൾ ജൂൺ 30 വരെ തുറക്കേണ്ടെന്ന തീരുമാനം എടുക്കുകയും ചെയ്തു.

അതേസമയം, ശബരിമല ക്ഷേത്രം അടക്കം തുറക്കാനുള്ള ദേവസ്വം ബോർഡ് തീരുമാനത്തിനെതിരെ പന്തളം കൊട്ടാരം രംഗത്തെത്തിയിരിക്കുകയാണ് .ശബരിമലയില്‍ അടുത്ത ആഴ്ച ഉത്സവം നടക്കാനിരിക്കെ ഇതര സംസ്ഥാനത്ത് നിന്നടക്കമുള്ള ഭക്തരെ നിയന്ത്രിക്കാന്‍ ബുദ്ധിമുട്ടുമെന്ന് പന്തളം കൊട്ടാരം നിര്‍വ്വാഹക സംഘം സെക്രട്ടറി പി എന്‍ നാരായണവര്‍മ്മ പറഞ്ഞു. സംസ്ഥാനത്ത് കൊവിഡ് രോഗികളുടെ എണ്ണം ദിനംപ്രതി കൂടുന്നതിനാല്‍ ജൂണ്‍ മുപ്പത് വരെ തിരുമല ക്ഷേത്രത്തില്‍ പൊതുജനങ്ങളെ പ്രവേശിപ്പിക്കില്ലെന്ന് കൊച്ചിന്‍ തിരുമല ദേവസ്വം കമ്മിറ്റി വ്യക്തമാക്കിയിട്ടുണ്ട്. ദേവസ്വം കമ്മിറ്റിയുടെ കീഴിലുള്ള മറ്റ്‌ ക്ഷേത്രങ്ങളിലും ജൂണ്‍ മുപ്പത് വരെ പൊതുജനത്തെ പ്രവേശിപ്പിക്കില്ല.

പത്മനാഭ സ്വാമി ക്ഷേത്രം ഈ മാസം 30 വരെ തുറക്കേണ്ടെന്ന് ക്ഷേത്ര ഭരണ സമിതിയാണ് തീരുമാനിച്ചത്. തളിപ്പറമ്പ് രാജരാജേശ്വര ക്ഷേത്രം, തൃച്ചംബരം ശ്രീകൃഷ്ണ ക്ഷേത്രം, കാഞ്ഞിരങ്ങാട് വൈദ്യനാഥ ക്ഷേത്രം എന്നിവയടക്കം ടിടികെ ദേവസ്വത്തിന് കീഴിലെ മുഴുവൻ ക്ഷേത്രങ്ങളിലും ഭക്തജനങ്ങൾക്ക് ഏർപ്പെടുത്തിയിട്ടുള്ള നിയന്ത്രണം ജൂൺ 30 വരെ തുടരാൻ തീരുമാനിച്ചു. നിത്യപൂജകൾ മുടക്കം കൂടാതെ നടക്കും. കോവിഡ് രോഗഭീതി ഒരു സാമൂഹിക വ്യാപനത്തിന്റെ വക്കിലെത്തി നിൽക്കുന്ന സാഹചര്യത്തിലാണിത്.

അതേസമയം ശബരിമല ദർശനത്തിനായുള്ള വെർച്വൽ ക്യൂ ബുക്കിങ്ങ് 10-ാം തീയതി മുതൽ ആരംഭിക്കും. വെർച്വൽ ക്യൂ വഴി ബുക്ക് ചെയ്യുന്നവരെ മാത്രമേ ദർശനത്തിനായി പമ്പയിൽ നിന്നും കടത്തിവിടുകയുള്ളു.

മിഥുന മാസ പൂജകൾക്കായി ശബരിമല നട 14 ന് തുറക്കും. ഉത്സവ ചടങ്ങുകൾക്ക് ശേഷം 28 ന് നട അടക്കും. സംസ്ഥാനത്ത് കോറോണ രോഗം പടർന്ന് പിടിക്കുന്ന സാഹചര്യത്തിൽ പോലീസിന്റെ വെർച്വൽ ക്യൂ വഴി ബുക്ക് ചെയ്തെത്തുന്ന ഭക്തർക്ക് മാത്രമേ ദർശനത്തിന് സൗകര്യം ഉണ്ടാകു. 10-ാം തീയതി മുതലാകും ബുക്കിങ്ങ് ആരംഭിക്കുക.10 – 65 ഇടയിൽ പ്രായമുള്ളവരെ പ്രവേശിപ്പിക്കില്ല. പുലർച്ചെ 4 ന് ആരംഭിക്കുന്ന ദർശനം ഉച്ചക്ക് 1 മണി വരെ നീളും. ശേഷം വൈകിട്ട് 4 ന് വീണ്ടും ദർശനം ആരംഭിച്ച് 11 ന് അവസാനിക്കും.

ശബരിമലയിൽ ഭക്തരെ തങ്ങാൻ അനുവദിക്കില്ല. രാത്രി 11 മണിക്ക് മുമ്പ് മലയിറങ്ങണം. ഒരു മണിക്കൂറിൽ 200 ഭക്തർക്കാകും ദർശന സൗകര്യം ഉണ്ടാകുക. പ്രതിദിനം 3200 ഭക്തർക്ക് ദർശനം ലഭ്യമാക്കാൻ സാധിക്കുമെന്നാണ് പോലീസ് വൃത്തങ്ങൾ കണക്ക് കൂട്ടുന്നത്. ഒരെ സമയം 50 ഭക്തരെ മാത്രമേ തിരുമുറ്റത്ത് പ്രവേശിപ്പിക്കൂ. വി.വി.ഐ.പി ദർശനം ഉണ്ടാകില്ല. കെ.എസ്.ആർ.ടി.സി സർവീസ് ഉണ്ടാകും. സ്വകാര്യ വാഹനങ്ങളെ പമ്പ വരെ കടത്തിവിടും. കാലാവസ്ഥ അനുകൂലമാണെങ്കിൽ പമ്പയിൽ തന്നെ പാർക്കിങ്ങും അനുവദിക്കും. വണ്ടി പെരിയാർ വഴി വരുന്നവർക്ക് ദർശനം ഉണ്ടാകില്ല. അപ്പവും അരവണയും ഓൺലൈൻ വഴി ബുക്ക് ചെയ്യുന്നവർക്ക് മാത്രമാകും ലഭ്യമാക്കുക.

ഇതര സംസ്ഥാനങ്ങളിൽ നിന്നും എത്തുന്ന ഭക്തരെ ശബരിമല ദർശനത്തിനായി കേരളത്തിലേക്ക് കടത്തിവിടുന്നതിന് കൊറോണ ഓൺലൈൻ പോർട്ടലിൽ രജിസ്റ്റർ ചെയ്ത് ലഭിക്കുന്ന പാസിനൊപ്പം കോറോണ രോഗം ഇല്ലെന്ന ICMR -ന്റെ അംഗീകൃത കേന്ദ്രങ്ങളിൽ നിന്നുമുള്ള സർട്ടിഫിക്കറ്റ് കൊറോണ ഓൺലൈൻ പോർട്ടലിൽ അപ് ലോഡ് ചെയ്യണം. ഇതര സംസ്ഥാനക്കാരായ അയ്യപ്പൻമാരെ 5 പേരടങ്ങുന്ന ടീമായി മാത്രമേ സന്നിധാനത്തേക്ക് കടത്തി വിടു. സന്നിധാനത്തും പമ്പയിലും കടകൾ പ്രവർത്തിക്കില്ല. ദേവസ്വം ബോർഡിന്റെ അന്നദാനം ഉണ്ടാകും. ഡോളി സർവീസും ഇത്തവണ ഉണ്ടാകില്ല.