നൂറിലേറെ റാങ്ക് പട്ടികകള്‍ റദ്ദായി ഉദ്യോഗാര്‍ഥികളില്‍ നിന്നു വന്‍ പ്രതിഷേധം ഉയരുന്നതിനിടെ ലോക്ഡൗണ്‍ കാലത്ത് 7225 പേര്‍ക്കു നിയമന ശുപാര്‍ശ നല്‍കിയെന്ന് അവകാശപ്പെട്ട് പിഎസ്‌സി രംഗത്ത് വന്നു. എന്നാല്‍ യഥാര്‍ഥ നിയമനം ഇത്രത്തോളമുണ്ടാകില്ല. വിവിധ റാങ്ക് പട്ടികകളില്‍ ഉയര്‍ന്ന റാങ്ക് കരസ്ഥമാക്കിയിരിക്കുന്നത് ഒരേ ഉദ്യോഗാര്‍ഥികളാണ്. ഇങ്ങനെ ഒരേ ആളുകള്‍ക്കു തന്നെ രണ്ടും മൂന്നും നിയമന ശുപാര്‍ശ (അഡൈ്വസ്) നല്‍കിയിട്ടുണ്ട്.

നിയമനശുപാര്‍ശ ലഭിച്ചയാള്‍ ജോലിയില്‍ ചേര്‍ന്നില്ലെങ്കില്‍ മറ്റൊരാള്‍ക്കു വീണ്ടും ശുപാര്‍ശ നല്‍കും. നോട്ട് ജോയിനിങ് ഡേറ്റ് (എന്‍ജെഡി) എന്നാണിത് അറിയപ്പെടുന്നത്. ഇവ കൂടി ചേര്‍ത്താണ് 7225 പേര്‍ക്കു ജോലി നല്‍കിയെന്നു പറയുന്നത്.

കമ്പനി, ബോര്‍ഡ്, കോര്‍പറേഷന്‍ അസിസ്റ്റന്റിനുള്ള ഒറ്റ പരീക്ഷയില്‍ നിന്ന് 4 തസ്തികകളിലേക്കാണു നിയമനം. ഇതിനായി 2 റാങ്ക് ലിസറ്റുകളുണ്ട്. മിക്കവരും എല്ലാ തസ്തികകളിലേക്കും അപേക്ഷിക്കുന്നതിനാല്‍ ആദ്യ റാങ്കുകാര്‍ക്ക് ഇവയിലേക്കെല്ലാം നിയമന ശുപാര്‍ശ ലഭിക്കും. ഇതെല്ലാം ചേര്‍ത്താണ് 1186 പേര്‍ക്കു ശുപാര്‍ശയെന്നു പിഎസ്സി പറയുന്നത്.

പിഎസ്‌സിയുടെ കണക്കു പ്രകാരം അസി. സര്‍ജന്‍ (276), മെഡിക്കല്‍ വിദ്യാഭ്യാസ വകുപ്പില്‍ അസി.പ്രഫസര്‍ (1459), കമ്പനി, ബോര്‍ഡ്, കോര്‍പറേഷന്‍ അസിസ്റ്റന്റ് (1186), അസി.പ്രിസണര്‍ (454), സിവില്‍ പൊലീസ് ഓഫിസര്‍ (277) എന്നിങ്ങനെ 5 റാങ്ക് ലിസ്റ്റുകളില്‍നിന്നായി ആകെ 3652 നിയമന ശുപാര്‍ശ നല്‍കിയിട്ടുണ്ട്. ബാക്കി നാനൂറോളം റാങ്ക് പട്ടികയില്‍ നിന്നുള്ള വിവരം കൂടി പുറത്തുവിടണമെന്ന് ഉദ്യോഗാര്‍ഥികള്‍ ആവശ്യപ്പെടുന്നു. 276 പേര്‍ക്ക് അഡൈ്വസ് നല്‍കിയ അസി. സര്‍ജന്‍ തസ്തികയിലെ റാങ്ക് പട്ടികയുടെ കാലാവധി ഇന്നു തീരും. മേയിലെ കണക്കുപ്രകാരം ഈ പട്ടികയില്‍ 1098 പേര്‍ ബാക്കിയുള്ളപ്പോള്‍ 980 താല്‍ക്കാലിക നിയമനങ്ങള്‍ സര്‍ക്കാര്‍ നടത്തുകയും ചെയ്തു.

ഈ മാസം 30-നു മുപ്പതോളം റാങ്ക് ലിസ്റ്റുകളുടെ കാലാവധിയാണു തീരുന്നത്. 19-ന് നൂറോളം റാങ്ക് ലിസ്റ്റുകളുടെ കാലാവധി കഴിഞ്ഞു. കാലാവധി നീട്ടുന്ന കാര്യം പരിഗണനയിലില്ലെന്നു മുഖ്യമന്ത്രി തന്നെ വ്യക്തമാക്കിക്കഴിഞ്ഞു. പിഎസ്സി റാങ്ക് ലിസ്റ്റുകളുടെ കാലാവധി ഒന്നൊന്നായി കഴിയുന്നതിനിടെ, പല വകുപ്പുകളിലും പൊതുമേഖലാ സ്ഥാപനങ്ങളിലും പിന്‍വാതില്‍ നിയമനം തകൃതി. പൊതുമേഖലാ സ്ഥാപനങ്ങളില്‍ ജീവനക്കാരെ വിആര്‍എസ് എടുപ്പിച്ച് ആ തസ്തികകളിലേക്ക് ഇഷ്ടക്കാരെ തിരക്കിട്ട് നിയമിക്കുന്നുമുണ്ട്.

റാങ്ക് ലിസ്റ്റ് നിലവിലില്ലെങ്കില്‍ പല തസ്തികകളിലേക്കും താല്‍ക്കാലിക നിയമനത്തിനു വഴിയൊരുങ്ങും. വേണ്ടപ്പെട്ടവരെ തിരുകിക്കയറ്റാന്‍ പിന്നെ തടസ്സമുണ്ടാകില്ലെന്ന് ഉദ്യോഗാര്‍ഥികള്‍ ചൂണ്ടിക്കാട്ടുന്നു