കോണ്സുലേറ്റ് വഴിയുള്ള സ്വര്ണക്കടത്ത്: നാലാം പ്രതി സന്ദീപ് നായരുടെ വീട്ടില് കസ്റ്റംസ് റെയ്ഡ്; സ്വര്ണം കടത്തിയ ബാഗുകള് കണ്ടെത്തിയെന്നാണ് റിപ്പോര്ട്ട്
കോണ്സുലേറ്റ് വഴിയുള്ള സ്വര്ണക്കടത്ത് കേസില് ഒളിവിലുള്ള നാലാം പ്രതി സന്ദീപ് നായരുടെ വീട്ടില് കസ്റ്റംസ് റെയ്ഡ് നടത്തി. നെടുമങ്ങാട്ടെ വീട്ടില്നിന്ന് സ്വര്ണം കടത്തിയ ബാഗുകള് കണ്ടെത്തിയെന്നാണ് റിപ്പോര്ട്ടുകള്. കേസിലെ ഒന്നാം പ്രതി സരിത്തിനെ എന്ഐഎ സംഘം ചോദ്യം ചെയ്യുകയാണ്. കൊച്ചി കസ്റ്റംസ് ഓഫീസില് എത്തിയാണ് പ്രാഥമിക ഘട്ട ചോദ്യം ചെയ്യല്. കസ്റ്റംസില് നിന്നും കേസിന്റെ വിശദാംശങ്ങളും എന്ഐഎ ശേഖരിക്കുന്നുണ്ട്.
നാല് പ്രതികളാണ് കേസിലുള്ളത്. ഒന്നാം പ്രതി കേസില് അറസ്റ്റിലായ സരിത്, രണ്ടാം പ്രതി സ്വപ്ന സുരേഷ്, മൂന്നാം പ്രതി ഫൈസല് ഫരീദ്, നാലാംപ്രതി സ്വപ്നയുടെ ബിസിനസ് പങ്കാളിയായ സന്ദീപ് നായര് എന്നിവരാണുള്ളത്. അതേസമയം, സ്വര്ണക്കടത്ത് കേസില് അന്വേഷണം ഊര്ജിതമാക്കിയിരിക്കുകയാണ് കസ്റ്റംസും എന്ഐഎയും. മുഖ്യമന്ത്രിയുടെ മുന് സെക്രട്ടറി എം.ശിവശങ്കറിന്റെ ഫ്ലാറ്റിലെത്തി സന്ദര്ശക രജിസ്റ്റര് കസ്റ്റംസ് കസ്റ്റഡിയിലെടുത്തു. ശിവശങ്കറും സ്വര്ണക്കടത്തു കേസില് ഒളിവില് കഴിയുന്ന സ്വപ്ന സുരേഷും തമ്മില് അടുത്ത ബന്ധമുണ്ടെന്ന് നേരത്തെ ആരോപണമുയര്ന്നിരുന്നു. ഇതേ തുടര്ന്നാണ് ശിവശങ്കറിന്റെ ഫ്ലാറ്റിലെത്തി കസ്റ്റംസ് വിവരങ്ങള് ശേഖരിച്ചത്.
ഫ്ലാറ്റിലെ മേല്നോട്ടക്കാരന്റെ മൊഴിയും സെക്യൂരിറ്റിയുടെ മൊഴിയും കസ്റ്റംസ് രേഖപ്പെടുത്തി. ഇത് രണ്ടാം തവണയാണ് കസ്റ്റംസ് ശിവശങ്കറിന്റെ ഫ്ലാറ്റിലെത്തി വിവരങ്ങള് ശേഖരിക്കുന്നത്. ഇന്നലെ വൈകീട്ടോടെ തിരുവനന്തപുരം സെക്രട്ടറിയേറ്റിന് അടുത്തുള്ള ശിവശങ്കറിന്റെ ഫ്ലാറ്റില് കസ്റ്റംസ് പരിശോധന നടത്തിയിരുന്നു. സ്വര്ണക്കടത്ത് കേസുമായി ബന്ധപ്പെട്ടുള്ള രണ്ട് പ്രതികളും ഈ ഫ്ലാറ്റിലെത്തി ചര്ച്ച നടത്തിയെന്ന സംശയത്തിന്റെ അടിസ്ഥാനത്തിലാണ് കസ്റ്റംസ് പരിശോധന നടത്തിയത്. അതേസമയം, വിവാദങ്ങളില് അന്വേഷണം നടക്കട്ടെയെന്നും കൂടുതല് ഒന്നും പറയാനില്ലെന്നുമായിരുന്നു ശിവശങ്കറിന്റെ പ്രതികരണം.
സ്വര്ണക്കടത്തു കേസില് ശിവശങ്കറിനു ഏതെങ്കിലും തരത്തില് നേരിട്ടു ബന്ധമുള്ളതായി കസ്റ്റംസിനു ഇതുവരെ വിവരം ലഭിച്ചിട്ടില്ല. എന്നാല്, സ്വര്ണക്കടത്ത് കേസ് സര്ക്കാരിനെതിരെയുള്ള ആയുധമാക്കാനാണ് പ്രതിപക്ഷം തീരുമാനിച്ചിരിക്കുന്നത്. സ്വര്ണക്കള്ളക്കടത്ത് കേസില് മുഖ്യമന്ത്രിയുടെ ഓഫീസ് സംബന്ധിച്ച ആരോപണങ്ങള് കേരള പൊലീസ് അന്വേഷിക്കണമെന്ന് പ്രതിപക്ഷ നേതാവ് രമേശ് ചെന്നിത്തല ആവശ്യപ്പെട്ടു. ഇക്കാര്യം ആവശ്യപ്പെട്ടുകൊണ്ട് ചെന്നിത്തല, ഡിജിപി ലോക്നാഥ് ബെഹ്റയ്ക്ക് കത്ത് നല്കിയിട്ടുണ്ട്. സ്വര്ണ്ണക്കള്ളക്കടത്തും അതുമായി ബന്ധപ്പെട്ട ഭീകരവാദവും അടങ്ങുന്ന രാജ്യദ്രോഹകുറ്റവുമാണ് എന്ഐഎ അന്വേഷിക്കുന്നത്. എന്നാല് കേസില് മുഖ്യമന്ത്രിയുടെ ഓഫീസിന് പങ്കുണ്ടെന്ന ആരോപണത്തില് കേരള പൊലീസ് എഫ്ഐആര് രജിസ്റ്റര് ചെയ്ത് അന്വേഷിക്കണമെന്ന് ചെന്നിത്തല കത്തില് പറയുന്നു.
https://www.facebook.com/Malayalivartha
