സമ്പൂര്‍ണ്ണ ഔദ്യോഗിക ബഹുമതികളോടെ മയിലിനെ സംസ്‌കരിച്ചു, ദേശീയപതാക പുതപ്പിച്ചു, സല്യൂട്ട് നല്‍കി!
തൊടുപുഴ നഗരത്തില്‍ ആനക്കൂട് സരസ്വതി സ്‌കൂളിന് സമീപമുള്ള കിഴക്കേതില്‍ കെ.ആര്‍. ശ്രീവത്സന്റെ പറമ്പില്‍ ചത്ത നിലയില്‍ കണ്ടെത്തിയ മയിലിനെ വനംവകുപ്പ് അധികൃതരുടെ നേതൃത്വത്തില്‍ ഔദ്യോഗിക ബഹുമതികളോടെ സംസ്‌കരിച്ചു.
ദേശീയപതാക പുതപ്പിച്ച് സല്യൂട്ട് നല്‍കിയാണ് ദേശീയപക്ഷിക്ക് യാത്രാമൊഴി നേര്‍ന്നത്. ഷെഡ്യൂള്‍ ഒന്നില്‍ ഉള്‍പ്പെട്ട മയില്‍ ചത്താല്‍ ഔദ്യോഗിക ബഹുമതികളോടെ സംസ്‌കരിക്കണമെന്നാണു ചട്ടം.
ഒരു വയസ് പ്രായമുള്ള ആണ്‍മയിലിനെ ഇന്നലെ പറമ്പില്‍ ചത്തനിലയില്‍ കണ്ടയുടന്‍ തന്നെ വീട്ടുകാര്‍ വനംവകുപ്പ് ഉദ്യോഗസ്ഥരെ വിവരം അറിയിച്ചു. അറക്കുളം സെക്ഷന്‍ ഫോറസ്റ്റ് ഓഫീസര്‍ ഇ.എം.ഷാജുമോന്റെ നേതൃത്വത്തില്‍ വനംവകുപ്പ് ഉദ്യോഗസ്ഥര്‍ സ്ഥലത്തെത്തുകയും മേല്‍നടപടികള്‍ സ്വീകരിക്കുകയുമായിരുന്നു.
മയിലിന്റെ ശരീരത്തില്‍ പ്രത്യക്ഷത്തില്‍ മുറിവുകളൊന്നുമുണ്ടായിരുന്നില്ല. ആന്തരികാവയവങ്ങളുടെ പരിശോധനാഫലം വന്നതിനു ശേഷമേ മരണകാരണം വ്യക്തമാകുകയുള്ളുവെന്ന് അധികൃതര്‍ അറിയിച്ചു. ഒരാഴ്ച മുന്‍പ് കുഞ്ചിത്തണ്ണി ദേശീയം മൂലക്കടയിലും ഒരു മയിലിനെ ചത്ത നിലയില്‍ കണ്ടെത്തിയിരുന്നു.
ജില്ലാ മൃഗാശുപത്രിയിലെ സീനിയര്‍ വെറ്ററിനറി സര്‍ജന്‍ വി.ആര്‍.രാജേഷ് പോസ്റ്റ്മോര്‍ട്ടം നടത്തി. തുടര്‍ന്ന് വനംവകുപ്പ് ഉദ്യോഗസ്ഥര്‍ മയിലിനെ ഏറ്റുവാങ്ങി മൂലമറ്റം സെക്ഷന്‍ ഓഫീസിന് സമീപം ഔദ്യോഗിക ബഹുമതികളോടെ സംസ്‌കരിക്കുകയായിരുന്നു.
https://www.facebook.com/Malayalivartha
