കുഞ്ഞിനെ പരിപാലിക്കുന്നതിനെച്ചൊല്ലിയുണ്ടായ തര്ക്കം... പിതാവ് പുഴയിലെറിഞ്ഞ കുഞ്ഞുശരീരം അഗ്നിശമന സേന കണ്ടെടുത്തു
പിതാവ് പുഴയിലെറിഞ്ഞ 40 ദിവസം മാത്രം പ്രായമായ പെണ്കുഞ്ഞിന്റെ ശരീരം അഗ്നിശമന സേന കണ്ടെടുത്തു. സംഭവത്തില് പിതാവ് പാച്ചല്ലൂര് പേരയില് വീട്ടില് ഉണ്ണികൃഷ്ണ(24)നെ പോലീസ് അറസ്റ്റു ചെയ്തു. നൂല്കെട്ടിന് അണിയിച്ച ആഭരണങ്ങളോടെ ശിവഗംഗയുടെ കുഞ്ഞുശരീരം ബാസ്കറ്റിനുള്ളില് പുഴയില് നിന്ന് അഗ്നിശമന സേന കണ്ടെടുക്കുന്നത് പുലര്ച്ചെ രണ്ടരയ്ക്ക്. നിയമപരമായി വിവാഹിതരാകാത്ത മാതാപിതാക്കള്ക്കിടയില് കുഞ്ഞിനെ പരിപാലിക്കുന്നതിനെച്ചൊല്ലിയുണ്ടായ തര്ക്കമാണ് ഈ കൊടും ക്രൂരതയിലേക്ക് നയിച്ചത്. ഉണ്ണികൃഷ്ണന്റെ ഭാര്യ ചിഞ്ചുവിന്റെ നെടുമങ്ങാട് പനയമുട്ടം കുഴിനട പുന്നയില് വീട്ടിലായിരുന്നു വ്യാഴാഴ്ച നൂലുകെട്ട്. പിന്നീട് കുഞ്ഞിനെ തന്റെ മാതാവിനെ കാണിക്കാമെന്നു പറഞ്ഞാണ് ഉണ്ണികൃഷ്ണന് പാച്ചല്ലൂരിലെത്തിയത്. ഭാര്യ ചിഞ്ചുവും കുഞ്ഞും ഓട്ടോറിക്ഷയിലും ഉണ്ണികൃഷ്ന് ബൈക്കിലുമായിരുന്നു യാത്ര. കരുമം റോഡില് മധുപാലത്തിനു സമീപം ഓട്ടോ റിക്ഷ നിര്ത്തി കുഞ്ഞിനെ കിടത്തിയ ബാസ്കറ്റുമെടുത്ത് ഭാര്യയെയും കൂട്ടി ഉണ്ണി ബൈക്കില് യാത്ര തുടര്ന്നു. പിന്നീട് ചിഞ്ചുവിനെ വഴിയില് ഇറക്കി വിട്ട് കുഞ്ഞടങ്ങിയ ബാസ്കറ്റുമായി ഉണ്ണികൃഷ്ണന് ബൈക്കില് യാത്ര തുടര്ന്നു.വളരെ നേരമായിട്ടും കാണാതായതോടെ രാത്രി 9.30നാണ് പൊലീസില് പരാതിപ്പെടുന്നത് ഉണ്ണികൃഷ്ണന്റെ മൊബൈല് ഫോണില് ബന്ധപ്പെട്ട പൊലീസിന് പരസ്പരവിരുദ്ധമായ മറുപടിയും കരച്ചിലുമാണ് ലഭിച്ചത്. തുടര്ന്ന് തിരുവല്ലം ജംക്ഷനില് ബൈക്കുമായി ഇയാളെ പിടികൂടി.
https://www.facebook.com/Malayalivartha
