കെഎസ്ആര്‍ടിസി ഇന്നുമുതല്‍ കൂടുതല്‍ ദീര്‍ഘദൂര സര്‍വീസുകള്‍ തുടങ്ങാനൊരുങ്ങുന്നു. കണ്ണൂര്‍, കായംകുളം, കൊട്ടാരക്കര ഡിപ്പോകളില്‍നിന്നും സൂപ്പര്‍ ഫാസ്റ്റുകളാണ് ഓടിക്കുന്നത്.

ഉച്ചയ്ക്ക് 3.10മുതല്‍ രാത്രി 8.10 വരെ ഓരോ മണിക്കൂര്‍ ഇടവിട്ട് കണ്ണൂരില്‍നിന്ന് എറണാകുളത്തെത്തുന്ന സൂപ്പര്‍ഫാസ്റ്റ് സര്‍വീസുകളാണ് ഇന്നു തുടങ്ങുന്നത്. ഇവ രാവിലെ 5 മുതല്‍ ഓരോ മണിക്കൂര്‍ ഇടവേളകളില്‍ തിരികെ യാത്ര തിരിക്കും. കണ്ണൂരില്‍നിന്ന് ഉച്ചയ്ക്ക് 2.10ന് പുറപ്പെട്ട് തലശ്ശേരി, കോഴിക്കോട്, തൃശൂര്‍ വഴി രാത്രി 10.50ന് എറണാകുളത്ത് എത്തുന്ന രീതിയില്‍ ഒരു സൂപ്പര്‍ഫാസ്റ്റ് ആരംഭിക്കും. ഇതു രാവിലെ 4-ന് എറണാകുളത്തുനിന്ന് പുറപ്പെട്ട് ഉച്ചയ്ക്ക് 12.40ന് കണ്ണൂരിലെത്തിച്ചേരും.

തിരുവനന്തപുരത്തേക്ക് കായംകുളത്തുനിന്ന് രാവിലെ 5.30-നും 6.30നും സൂപ്പര്‍ഫാസ്റ്റ് സര്‍വീസുകളാണ് തുടങ്ങുന്നത്. തിരുവനന്തപുരത്തുനിന്ന് ഉച്ചയ്ക്ക് 12.50നും 1.30നും എറണാകുളത്തേക്ക് സര്‍വീസ് നടത്തും. എറണാകുളത്തുനിന്ന് രാത്രി 7.10നും 7.50നും കായംകുളത്തേക്കും സര്‍വീസ് നടത്തും.

കായംകുളത്തുനിന്ന് രാവിലെ 6-നും 6.40-നും എറണാകുളം സൂപ്പര്‍ ഫാസ്റ്റും തുടങ്ങുന്നുണ്ട്. ഇവ എറണാകുളത്തുനിന്ന് യഥാക്രമം ഉച്ചയ്ക്ക് 12.50-നും 1.30-നും തിരുവനന്തപുരത്തേക്ക് സര്‍വീസ് നടത്തും. രാത്രി 7.10-നും 7.50-നും തിരുവനന്തപുരത്തുനിന്ന് കായംകുളത്തേക്ക് സര്‍വീസ് നടത്തും.