ഭര്‍ത്താവിനോടൊപ്പം ബൈക്കില്‍ യാത്ര ചെയ്യവേ മിലിട്ടറി ട്രക്കുകളില്‍ ഒന്ന് ബൈക്കില്‍ ഇടിച്ച് യു.ഐ.ടി പ്രിന്‍സിപ്പലിന് ദാരുണാന്ത്യം. പാങ്ങോട് തിരുമല റിട്ട.ഉദ്യോഗസ്ഥനായ സുകുമാരന്റെ ഭാര്യ ഡോ. കെ. വിജയകുമാരി (61)ആണ് മരിച്ചത്.ഇന്നലെ വൈകുന്നേരം ബാലരാമപുരം വഴിമുക്ക് എം.കെ.ഓഡിറ്റോറിയത്തിന് സമീപത്താണ് അപകടം.

ഡ്യൂട്ടി കഴിഞ്ഞ് പാങ്ങോട്ടെ വീട്ടിലേക്ക് കൂട്ടിക്കൊണ്ട് പോകാനായി എത്തിയ ഭര്‍ത്താവ് സുകുമാരന്റെ ബൈക്കിന് പിന്നിലിരുന്ന് പോകവേ നാഗര്‍കോവിലില്‍ നിന്ന് പാങ്ങോട്ടേക്ക് പോകുകയായിരുന്ന മിലിട്ടറി ട്രക്കുകളില്‍ ഒന്ന് ബൈക്കില്‍ ഇടിച്ച് ഇരുവരും തെറിച്ച് വീഴുകയായിരുന്നു.

വിജയകുമാരി ഹെല്‍മെറ്റ് ധരിച്ചിരുന്നെങ്കിലും, ട്രാക്കിന്റെ ടയറുകള്‍ കയറിയിറങ്ങി തല്‍ക്ഷണം മരിച്ചു. ഇടത് വശത്തേക്ക് തിരിച്ച വീണ ഭര്‍ത്താവ് സുകുമാരന് സാരമായ പരിക്കുകള്‍ മാത്രമേയുള്ളു. തൊഴില്‍ വകുപ്പ് റിട്ട. ഉദ്യോഗസ്ഥനാണിദ്ദേഹം .കൊല്ലം എസ്.എന്‍.കോളേജിലെ ഹിന്ദി പ്രൊഫസറായിരുന്നു വിജയകുമാരി. കഴിഞ്ഞ മൂന്നിനാണ് ആറാലുംമൂട് യു.ഐ.ടി യുടെ പ്രിന്‍സിപ്പലായത്.