പ്രിന്‍സിപ്പലിന്റെ അധികാരം വെട്ടിച്ചുരുക്കി, കേരളവര്‍മ കോളജില്‍ മുന്‍ മേയറും എല്‍ഡിഎഫ് കണ്‍വീനറുടെ ഭാര്യയുമായ ബിന്ദു പുതിയ അധികാര കേന്ദ്രം
പ്രിന്‍സിപ്പലിന്റെ അധികാരം വെട്ടിച്ചുരുക്കി, കേരളവര്‍മ കോളജില്‍ ഇടതുമുന്നണി കണ്‍വീനര്‍ എ.വിജയരാഘവന്റെ ഭാര്യയും മുന്‍ മേയറുമായ ബിന്ദുവിനെ പുതിയ തസ്തിക സൃഷ്ടിച്ച് വൈസ് പ്രിന്‍സിപ്പലായി നിയമിച്ചു.
കോളജ് മാനേജ്‌മെന്റായ കൊച്ചിന്‍ ദേവസ്വം ബോര്‍ഡ്, ചില സ്വകാര്യ കോളജുകളിലുള്ള പ്രത്യേക അധികാരമില്ലാത്ത വൈസ് പ്രിന്‍സിപ്പല്‍ തസ്തിക, പ്രത്യേകം സൃഷ്ടിക്കുകയും പ്രിന്‍സിപ്പലിന്റെ പകുതിയിലേറെ ചുമതലകള്‍ ബിന്ദുവിന് കൈമാറുകയുമാണ് ചെയ്തിരിക്കുന്നത്.
മാനേജ്‌മെന്റ് പ്രിന്‍സിപ്പലില്‍നിന്ന് നിര്‍മാണ പ്രവര്‍ത്തനങ്ങളുടെയും പല അക്കാദമിക് പ്രവര്‍ത്തനങ്ങളുടെയും ചുമതലയാണ് എടുത്തുമാറ്റിയത്. കിഫ്ബിയുടെ ഉള്‍പ്പെടെ നിര്‍മാണമടക്കമുള്ള എല്ലാ കാര്യങ്ങളുടെയും ചുമതല ബിന്ദുവിനാകുമെന്നു സിപിഎം നേതൃത്വം നല്‍കുന്ന ദേവസ്വം ബോര്‍ഡ് ഉത്തരവില്‍ പറയുന്നു. ഡവലപ്‌മെന്റ് ഫോറം, പിടിഎ തുടങ്ങിയവയുടെ കീഴില്‍ നടക്കുന്ന വികസനപ്രവര്‍ത്തനങ്ങളുടെ ചുമതലയും വൈസ് പ്രിന്‍സിപ്പലിനു കൈമാറി. നാക് അക്രഡിറ്റേഷന്‍ പോലുള്ള സുപ്രധാന കാര്യങ്ങളുടെ സ്വതന്ത്ര ചുമതലയും ബിന്ദുവിനാകുമെന്ന് ഉത്തരവില്‍ പറയുന്നു.
സാധാരണയായി സ്വകാര്യ കോളജുകളില്‍ വൈസ് പ്രിന്‍സിപ്പലിനു പ്രത്യേക ചുമതലകള്‍ നല്‍കുന്നത് പ്രിന്‍സിപ്പലാണ്. ഇപ്പോഴത്തെ സാഹചര്യത്തില്‍ പരീക്ഷാ നടത്തിപ്പും കോളജിന്റെ ദൈനംദിന നടത്തിപ്പുമായി വെറും നോക്കുകുത്തിയായി പ്രിന്‍സിപ്പല്‍ പദവി മാറും.
https://www.facebook.com/Malayalivartha
