സിസ്റ്റര്‍ അഭയ കൊലക്കേസില്‍ പ്രതിഭാഗം ഏക സാക്ഷിയെ വിസ്തരിക്കുവാന്‍ നല്‍കിയ സാക്ഷിപ്പട്ടികയിലെ സാക്ഷിയെ പ്രതിഭാഗം പിന്‍വലിച്ചു. നവംബര്‍ 16 ന് വിസ്തരിക്കുവാന്‍ തിരുവനന്തപുരം സിബിഐ കോടതി ഉത്തരവ് നല്‍കിയതിന് ശേഷമാണ് പ്രതിഭാഗം പിന്‍മാറിയത്. നിലവിലുള്ള പിറവം പോലീസ് സര്‍ക്കിള്‍ ഇന്‍സ്‌പെക്ടറെയാണ് വിസ്തരിക്കുന്നതില്‍ നിന്നും പ്രതിഭാഗം പിന്മാറിയത്.

ഇതോടെ പ്രതിഭാഗം സാക്ഷിയായിട്ട് ഒരാളെ പോലും വിസ്തരിക്കുവാന്‍ പ്രതിഭാഗത്തിന് കഴിയാതെ പോയിരിക്കുകയാണ്. പിറവം പോലീസ് സര്‍ക്കിള്‍ ഇന്‍സ്‌പെക്ടറുടെ അധികാര പരിധിയില്‍ വരുന്ന ഒരു വ്യക്തി 2007 ല്‍ ആത്!മഹത്യ ചെയ്തത് അഭയയുടെ അമ്മാവനാണെന്ന് സ്ഥാപിക്കാന്‍ വേണ്ടിയാണ് പോലീസ് സര്‍ക്കിള്‍ ഇന്‍സ്‌പെക്ടറെ വിസ്തരിക്കുവാന്‍ പ്രതിഭാഗം നീക്കം നടത്തിയത്.

1992 ല്‍ കൊല്ലപ്പെട്ട അഭയയുടെ കേസുമായി 2007 ല്‍ ആത്മഹത്യ ചെയ്തയാളുടെ കേസ് എങ്ങനെ ബന്ധിപ്പിക്കുവാന്‍ കഴിയുമെന്ന് സിബിഐ വാദിച്ചു. അഭയയുടെ അമ്മാവനാണെന്ന് തെളിയിക്കുവാന്‍ എന്ത് രേഖയാണ് പ്രതിഭാഗത്തിന്റെ കയ്യിലുള്ളതെന്നും സിബിഐ നിലപാട് സ്വീകരിച്ചപ്പോള്‍ സിബിഐ ജഡ്ജി കെ. സനില്‍ കുമാര്‍ അഭയയുടെ അമ്മാവനാണ് ആത്മഹത്യ ചെയ്തതെന്ന് തെളിയിക്കുവാന്‍ പ്രതികളുടെ പക്കല്‍ തെളിവുകള്‍ ഉണ്ടോ എന്ന് പ്രതിഭാഗത്തോടെ ചോദിച്ചു. തങ്ങള്‍ക്ക് തിരിച്ചടി കിട്ടുമെന്ന് മനസ്സിലാക്കിയ പ്രതിഭാഗം പിന്നീട് കോടതി പിരിഞ്ഞതിന് ശേഷം സാക്ഷിയെ വിസ്തരിക്കുന്നതില്‍ നിന്നും പിന്‍മാറികൊണ്ട് പ്രതിഭാഗം ഹര്‍ജി ഫയല്‍ ചെയ്യുകയായിരുന്നു..