ഇ.ഡിയ്ക്ക് പിന്നാലെ കസ്റ്റംസും.... സ്വര്‍ണ്ണക്കടത്തു കേസില്‍ മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി എം.ശിവശങ്കറിനെ ഇന്ന് കസ്റ്റംസ് അറസ്റ്റു ചെയ്യും, അറസ്റ്റു ചെയ്യാന്‍ എറണാകുളം പ്രിന്‍സിപ്പല്‍ സെഷന്‍സ് കോടതിയാണ് കസ്റ്റംസിന് അനുമതി നല്‍കിയത്. സ്വര്‍ണ്ണക്കടത്തില്‍ ശിവശങ്കറിനെ ബന്ധിപ്പിക്കുന്ന തെളിവ് ലഭിച്ചെന്ന് കസ്റ്റംസ് തിങ്കളാഴ്ച കോടതിയെ അറിയിച്ചിരുന്നു. ഇ.ഡിയ്ക്ക് പിന്നാലെയാണ് കസ്റ്റംസും അറസ്റ്റു ചെയ്യുന്നത്.
ജാമ്യാപേക്ഷ അടുത്ത മാസം രണ്ടിന് പരിഗണിക്കാനിരിക്കെയാണ് ശിവശങ്കറിന്റെ അറസ്റ്റ്. സ്വര്‍ണ്ണക്കടത്ത് കേസില്‍ ശിവശങ്കറിന് ബന്ധമില്ലെന്ന മുന്‍ നിലപാട് തിരുത്തിക്കൊണ്ട് കസ്റ്റംസ് കഴിഞ്ഞ ദിവസം കോടതിയില്‍ റിപ്പോര്‍ട്ട് നല്‍കി. ഈ മാസം 16 ന് ശിവശങ്കറിനെയും 18 ന് സ്വപ്നയെയും ജയിലിലെത്തി കസ്റ്റംസ് ചോദ്യം ചെയ്തിരുന്നു. ഇതിന് പിന്നാലെയാണ് സ്വര്‍ണ്ണക്കടത്തില്‍ ശിവശങ്കറിനെതിരെ നിര്‍ണ്ണായക തെളിവുകള്‍ ലഭിച്ചതായി കസ്റ്റംസ് കോടതിയെ അറിയിച്ചത്. അടുത്ത മാസം 2 ന് ശിവശങ്കറിന്റെ ജാമ്യഹര്‍ജി ഹൈക്കോടതി പരിഗണിക്കുമ്പോള്‍ , സുപ്രീം കോടതി അഭിഭാഷകന്‍ ശിവശങ്കറിന് വേണ്ടി ഹാജരാകും. ഇപ്പോള്‍ തന്നെ ബി.രാമന്‍പിള്ള, വിജയഭാനു , എസ്.രാജീവ് തുടങ്ങിയ പ്രഗത്ഭരായ അഭിഭാഷകരാണ് എം.ശിവശങ്കറിന് വേണ്ടി ഹാജരാകുന്നത്. ഇതിന് പിന്നാലെയാണ് സുപ്രീം കോടതിയിലെ മുതിര്‍ന്ന അഭിഭാഷകനെ എത്തിക്കുന്നത്. ശിവശങ്കറിന് ജാമ്യം ലഭിക്കുന്നതിന് മുന്‍പ് കസ്റ്റഡിയില്‍ എടുക്കാനാണ് കസ്റ്റംസ് ഉദ്ദേശിക്കുന്നത്.

സ്വര്‍ണ്ണക്കടത്ത് കേസിലെ സൂത്രധാരന്‍ ശിവശങ്കറാണെന്ന ഇ.ഡിയുടെ നിഗമനത്തിലേക്ക് കസ്റ്റംസും എത്തുകയാണ്. സ്വര്‍ണ്ണക്കടത്തിനെക്കുറിച്ച് ശിവശങ്കറിന് എല്ലാം അറിയാമായിരുന്നുവെന്നാണ് അന്വേഷണ ഏജന്‍സികള്‍ക്ക് ലഭിച്ചിരിക്കുന്ന വിവരം. ഇതിലേക്ക് അന്വേഷണ ഏജന്‍സികളെ നയിച്ച കാര്യങ്ങള്‍ ഇവയാണ്.

സ്വപ്നയെ മാത്രമല്ല, സരിത്, സന്ദീപ് തുടങ്ങിയ എല്ലാ പ്രതികളുമായും ശിവശങ്കറിന് അടുത്ത ബന്ധമുണ്ട്. ഇവരുമായി പല പ്രാവശ്യം സംസാരിക്കുകയും കൂടിക്കാണുകയും വാട്‌സ് ആപ് സന്ദേശങ്ങള്‍ അയയ്ക്കുകയും ചെയ്തിട്ടുണ്ട്. നയതന്ത്ര ബാഗേജുമായി ബന്ധപ്പെട്ട് കസ്റ്റംസിനെ ശിവശങ്കര്‍ നേരിട്ട് വിളിച്ചു. ഒരിക്കല്‍ സംസ്ഥാന ഫുഡ് സേഫ്റ്റി കമ്മീഷണറെയും വിളിച്ചു. നയതന്ത്ര ബാഗേജിനുള്ളില്‍ ആഹാര സാധനങ്ങളാണെന്നാണ് പലപ്പോഴും പ്രതികള്‍ കസ്റ്റംസിനോട് വെളിപ്പെടുത്തിയിരുന്നത്. നയതന്ത്ര ബാഗേജ് വഴി ഇലക്ട്രോണിക് ഉപകരണങ്ങള്‍ സ്വപ്ന കടത്തിയതായും കസ്റ്റംസിന് വിവരങ്ങള്‍ ലഭിച്ചിട്ടുണ്ട്.

-