കൊച്ചി-മംഗലാപുരം വാതകപൈപ്പ് ലൈന്‍ കമ്മിഷന്‍ ചെയ്തു. ഇന്നലെ മുതല്‍ പൈപ്പ് വഴി കൊച്ചിയില്‍നിന്ന് പ്രകൃതിവാതകം (എല്‍.എന്‍.ജി) മംഗലാപുരത്ത് എത്തി. മാംഗ്ലൂര്‍ കെമിക്കല്‍സ് ആന്‍ഡ് ഫെര്‍ട്ടിലൈസേഴ്സിലേക്കാണ് വാതകം ആദ്യമെത്തിയത്.

പൊതുമേഖലാ സ്ഥാപനമായ ഗ്യാസ് അഥോറിട്ടി ഓഫ് ഇന്ത്യയാണ് (ഗെയ്ല്‍) പൈപ്പ് ലൈന്‍ ഗ്യാസ് പദ്ധതി നടപ്പിലാക്കുന്നത്. കേരളത്തില്‍ പൈപ്പ്ലൈന്‍ കടന്നുപോകുന്ന ഭാഗങ്ങളില്‍ വീടുകള്‍, വാഹനങ്ങള്‍, വ്യവസായ സ്ഥാപനങ്ങള്‍ എന്നിവയ്ക്കും ചെലവു കുറഞ്ഞ പ്രകൃതിവാതകം ലഭ്യമാക്കും. വീടുകള്‍ക്കും സ്ഥാപനങ്ങള്‍ക്കും പൈപ്പ് ലൈനുകള്‍ പൂര്‍ത്തിയാകുന്ന മുറയ്ക്കാകും ഗ്യാസ് ലഭ്യമാകുക.

444 കിലോമീറ്ററാണ് കൊച്ചി-കൂറ്റനാട്-മംഗലാപുരം പൈപ്പ് ലൈനിന് ദൈര്‍ഘ്യം. പ്രധാന പൈപ്പ് ലൈനില്‍നിന്നു സബ് സ്റ്റേഷനുകളിലേക്ക് പൈപ്പ്ലൈന്‍ ബന്ധിപ്പിച്ചശേഷമേ പ്രാദേശിക തലത്തില്‍ വിതരണം സാധ്യമാകൂ. ഇതിനായി ഇതിനും സമയമെടുക്കും. ഇതിന്റെ വിതരണച്ചുമതല ഇന്ത്യന്‍ ഓയില്‍ കോര്‍പറേഷനാണ്.

ലോക്കല്‍ പൈപ്പ്ലൈന്‍ നിര്‍മാണച്ചുമതല ഏല്‍പ്പിച്ചിട്ടുള്ളത് അദാനി ഗ്രൂപ്പിനെയാണ്്. എറണാകുളം നഗരത്തില്‍ വീടുകളിലേക്കും സ്ഥാപനങ്ങളിലേക്കുമുള്ള പൈപ്പ് ഗ്യാസ് പദ്ധതി നടപ്പാക്കികഴിഞ്ഞു. 2010-ലാണ് വിവാദമായ ഗെയ്ല്‍ വാതകപൈപ്പ് പദ്ധതിക്ക് തുടക്കമായത്.

2014-ല്‍ സ്ഥലം ഏറ്റെടുക്കുന്നതിലുണ്ടായ തടസങ്ങളെത്തുടര്‍ന്ന് പദ്ധതി ഗെയില്‍ ഉപേക്ഷിച്ചിരുന്നു. പിന്നീട് 2016-ല്‍ ആണ് പദ്ധതിക്ക് വീണ്ടും ജീവന്‍വച്ചത്. ഗെയില്‍ വാതകപൈപ്പ് കമ്മിഷന്‍ ചെയ്തതായി മുഖ്യമന്ത്രിയാണ് അറിയിച്ചത്. പദ്ധതി കമ്മിഷന്‍ ചെയ്തതോടെ കടത്തുകൂലി കുറയുന്നതിലൂടെ കര്‍ണാടക, തമിഴ്നാട് എന്നിവിടങ്ങളിലേക്ക് ചെലവു കുറഞ്ഞരീതിയില്‍ എല്‍.എന്‍.ജി., പൈപ്പ് ലൈനിലൂടെ എത്തിക്കാനാകും.