സി.പി.എം ജില്ലാ സെക്രട്ടേറിയറ്റ് അംഗവും കോങ്ങാട് എം.എല്‍.എയുമായ കെ.വി.വിജയദാസ് (61) അന്തരിച്ചു. കൊവിഡ് ബാധിതനായി തൃശൂര്‍ മെഡിക്കല്‍ കോളേജ് ആശുപത്രിയില്‍ ചികിത്സയിലായിരുന്നു. ഒരാഴ്ചയിലധികമായി വെന്റിലേറ്ററിന്റെ സഹായത്തോടെയാണ് ജീവന്‍ നിലനിറുത്തിയിരുന്നത്.

ഇന്നലെ രാത്രി എട്ടരയോടെയാണ് മരണം.തദ്ദേശ തിരഞ്ഞെടുപ്പ് പ്രചാരണത്തിനിടെ നവംബര്‍ 28നാണ് കൊവിഡ് സ്ഥിരീകരിച്ചത്. ശ്വാസതടസം അടക്കമുള്ള അസ്വസ്ഥതകളെ തുടര്‍ന്ന് ഡിസംബര്‍ 12 നാണ് മെഡിക്കല്‍ കോളേജില്‍ പ്രവേശിപ്പിച്ചത്.



തലച്ചോറില്‍ രക്തസ്രാവം കണ്ടെത്തിയതിനെ തുടര്‍ന്ന് കഴിഞ്ഞ ചൊവ്വാഴ്ച ശസ്ത്രക്രിയയ്ക്ക് വിധേയനാക്കി. ഒന്നരവര്‍ഷം മുമ്പ് ഹൃദയ ശസ്ത്രക്രിയ നടത്തിയിരുന്നു.

കര്‍ഷക സംഘം ജില്ലാ പ്രസിഡന്റ് കൂടിയായ കെ.വി.വിജയദാസ് 2011 മുതല്‍ തുടര്‍ച്ചയായി രണ്ടുതവണ കോങ്ങാട് മണ്ഡലത്തില്‍ നിന്ന് വന്‍ഭൂരിപക്ഷത്തില്‍ വിജയിച്ചാണ് നിയമസഭയിലെത്തിയത്. ജില്ലാ പഞ്ചായത്ത് നിലവില്‍ വന്ന 1996ല്‍ ആദ്യ പ്രസിഡന്റായിരുന്നു.