പ്ലസ്ടു പരീക്ഷയില്‍ ആള്‍മാറാട്ടം നടത്തിയ വിദ്യാര്‍ഥികള്‍ അറസ്റ്റില്‍. ചൊവ്വാഴ്ച നടന്ന പ്ലസ് ടു ഇക്കണോമിക്‌സ് പരീക്ഷയിലാണ് ആള്‍മാറാട്ടം നടന്നത്. കൊണ്ടോട്ടി പുളിക്കല്‍ സ്വദേശി മുഹമ്മദ് റാഫി (19), സുഹൃത്ത് അരീക്കോട് സ്വദേശി മുഹമ്മദ് ഷാമില്‍ (18) എന്നിവരെയാണ് മഞ്ചേരി സി.ഐ കെ.പി. അഭിലാഷിന്റെ നേതൃത്വത്തില്‍ അറസ്റ്റ് ചെയ്തത്. പ്രൈവറ്റ് രജിസ്‌ട്രേഷന്‍ വിദ്യാര്‍ഥിയായ മുഹമ്മദ് റാഫിക്ക് പകരക്കാരനായാണ് ഷാമില്‍ പരീക്ഷക്കെത്തിയത്. കഴിഞ്ഞ വര്‍ഷം പ്ലസ് ടു വിജയിച്ച വിദ്യാര്‍ഥിയാണ് ഷാമില്‍. പരീക്ഷ എഴുതേണ്ട റാഫി പ്ലസ് വണ്‍ പരീക്ഷയില്‍ രണ്ട് വിഷയങ്ങളില്‍ തോറ്റിരുന്നു. ഇതോടെയാണ് ആള്‍മാറാട്ടം നടത്തിയത്. രാവിലെ 9.40 മുതല്‍ 12.30 വരെ ആയിരുന്നു പരീക്ഷ. പരീക്ഷ ആരംഭിച്ച ശേഷം ഇന്‍വിജിലേറ്റര്‍ വിദ്യാര്‍ഥികളുടെ ഹാള്‍ ടിക്കറ്റ് പരിശോധിക്കുന്നതിനിടെയാണ് തട്ടിപ്പ് മനസ്സിലായത്. പരീക്ഷ എഴുതാനെത്തിയ വിദ്യാര്‍ഥിയുടെ ബന്ധു തന്നെയായിരുന്നു ഇന്‍വിജിലേറ്ററായി എത്തിയത്. ഉടന്‍ ഇവര്‍ പ്രിന്‍സിപ്പലിനെ വിവരമറിയിച്ചു. പ്രിന്‍സിപ്പല്‍ വിദ്യാഭ്യാസ വകുപ്പിനെ അറിയിക്കുകയും മഞ്ചേരി പൊലീസില്‍ പരാതി നല്‍കുകയും ചെയ്തു. പ്രിന്‍സിപ്പലിന്റെ മൊഴി രേഖപ്പെടുത്തി. കോവിഡ് പ്രോട്ടോകോള്‍ ഉള്ളതുകാരണം മാസ്‌ക് അഴിച്ച് പരിശോധിക്കാന്‍ തടസ്സമുണ്ട്. ഇതു മുതലെടുത്താണ് ആള്‍മാറാട്ടം നടത്തിയത്.