സുരേഷ് ഗോപിയെ നായകനാക്കി ജോഷി സംവിധാനം ചെയ്യുന്ന പാപ്പന്റെ ഷൂട്ടിംഗ് ചൊവ്വാഴ്ചയാണ് നിറുത്തിവച്ചത്. ഇരുന്നൂറോളം പേര്‍ പങ്കെടുക്കുന്ന ഔട്ട് ഡോര്‍ രംഗങ്ങളാണ് വരും ദിവസങ്ങളില്‍ പാപ്പന് വേണ്ടി ചിത്രീകരിക്കാന്‍ പ്‌ളാന്‍ ചെയ്തിരുന്നത്. വീണ്ടും ആള്‍ക്കൂട്ടത്തിന് നിയന്ത്രണമേര്‍പ്പെടുത്തിയതിനാല്‍ മുന്‍ നിശ്ചയ പ്രകാരം ഷൂട്ടിംഗ് മുന്നോട്ട് കൊണ്ടുപോകാനായില്ലെന്നുറപ്പായതിനാലാണ് ചിത്രം ഷെഡ്യൂള്‍ പായ്ക്കപ്പ് ചെയ്തത്. ഫ്‌ളാഷ് ബാക്ക് രംഗങ്ങളുടേതുള്‍പ്പെടെ ഇരുപത് ദിവസത്തെ ചിത്രീകരണമാണ് പാപ്പന് ഇനി ബാക്കിയുള്ളത്. മേയ് അഞ്ച് മുതല്‍ പാപ്പന്റെ ചിത്രീകരണം പുനരാരംഭിക്കാനാണ് നീക്കമെന്ന് അണിയറ പ്രവര്‍ത്തകര്‍ അറിയിച്ചു.

രാംചരണ്‍ തേജ, ജൂനിയര്‍ എന്‍.ടി.ആര്‍, അജയ് ദേവ്ഗണ്‍, ആലിയ ഭട്ട് എന്നിവരെ പ്രധാന താരങ്ങളാക്കി രാജമൗലി സംവിധാനം ചെയ്യുന്ന ആര്‍.ആര്‍. ആറിന്റെ ഷൂട്ടിംഗും കൊവിഡ് രണ്ടാം തരംഗത്തെ തുടര്‍ന്ന് കഴിഞ്ഞ ദിവസം നിറുത്തി.

തെലങ്കാനയില്‍ രാത്രികാല കര്‍ഫ്യൂ പുറപ്പെടുവിച്ചതിനാലാണ് ആര്‍.ആര്‍.ആര്‍. നിറുത്തിവച്ചത്. മേയ് 1 വരെ അമ്പതില്‍ കവിയാത്ത ചിത്രീകരണ സംഘത്തെ വച്ച് മാത്രമേ ഷൂട്ടിംഗ് തുടരാന്‍ പാടുള്ളൂവെന്ന് തെലുങ്ക് ഫിലിം ചേംബര്‍ ഒഫ് കോമേഴ്‌സ് ചലച്ചിത്ര പ്രവര്‍ത്തകരെ അറിയിച്ചിരുന്നു. തുടര്‍ന്നാണ് രാജമൗലി തന്റെ ചിത്രത്തിന്റെ പുതിയ ഷെഡ്യൂള്‍ കാന്‍സല്‍ ചെയ്തത്. അമ്പത് പേരടങ്ങുന്ന ചിത്രീകരണ സംഘത്തെ വച്ച് ആര്‍.ആര്‍.ആര്‍. പോലൊരു ബ്രഹ്മാണ്ഡ ചിത്രത്തിന്റെ ഷൂട്ടിംഗ് തുടരാനാവാത്ത സാഹചര്യത്തിലാണിത്. ചിത്രത്തിന്റെ എണ്‍പത്തിയഞ്ച് ശതമാനത്തോളം ചിത്രീകരണം പൂര്‍ത്തിയായിക്കഴിഞ്ഞു.

രാംചരണ്‍ തേജയും ആലിയ ഭട്ടും അഭിനയിക്കുന്ന രണ്ട് ഗാനങ്ങളുള്‍പ്പെടെയുള്ള ചില രംഗങ്ങളാണ് ഇനി ചിത്രീകരിക്കാന്‍ ബാക്കിയുള്ളത്. കൊവിഡ് വ്യാപനം നിയന്ത്രണവിധേയമായ ശേഷമേ ചിത്രത്തിന്റെ അടുത്ത ഷെഡ്യൂള്‍ ആരംഭിക്കുകയുള്ളൂവെന്ന് അണിയറ പ്രവര്‍ത്തകര്‍ പറയുന്നു.