സംസ്ഥാനത്തെ നിര്‍ണായകമായ നിയമസഭാ തെരഞ്ഞെടുപ്പില്‍ ബിജെപിക്ക് മികച്ച വിജയം നേടുമെന്ന് വിലയിരുത്തല്‍. ആര്‍എസ്എസിന്റെ കണക്കില്‍ സംസ്ഥാനത്തു ബിജെപിക്കു ജയസാധ്യത 6 സീറ്റിലാണ്.

അതേസമയം 12 വരെ സീറ്റിലാണു ബിജെപിയുടെ പ്രതീക്ഷ. തിരഞ്ഞെടുപ്പു വിശകലനത്തിനു ചേര്‍ന്ന ബിജെപി കോര്‍ കമ്മിറ്റി യോഗം ആര്‍എസ്എസ് കൈമാറിയ റിപ്പോര്‍ട്ടും വിലയിരുത്തി. അഞ്ചിലേറെ സീറ്റ് ബിജെപി പിടിച്ചാല്‍ സംസ്ഥാനത്തു തൂക്കു മന്ത്രിസഭയാകും ഉണ്ടാകുകയെന്നാണു ബിജെപി കണക്കുകൂട്ടുന്നത്.

നേമം മണ്ഡലത്തില്‍ കുമ്മനം രാജശേഖരന്റെ ഭൂരിപക്ഷം 5000 മുതല്‍ 11,000 വരെയെത്തുമെന്നാണ് ആര്‍എസ്എസ് റിപ്പോര്‍ട്ട്. മഞ്ചേശ്വരത്തു കെ.സുരേന്ദ്രന് 1500 വോട്ടിനു മുകളില്‍ ഭൂരിപക്ഷം. കഴക്കൂട്ടത്തും തൃശൂരും വട്ടിയൂര്‍ക്കാവിലും 1000 വോട്ടിന്റെയെങ്കിലും ഭൂരിപക്ഷത്തില്‍ മുന്നിലെത്തുമെന്നും പാലക്കാട് ഇ.ശ്രീധരന്‍ 2500 വോട്ടിനെങ്കിലും വിജയിക്കുമെന്നുമാണ് ആര്‍എസ്എസ് വിലയിരുത്തല്‍.

കൂടാതെ മലമ്പുഴ, കാസര്‍കോട്, ചാത്തന്നൂര്‍, മണലൂര്‍, കാട്ടാക്കട, കോഴിക്കോട് നോര്‍ത്ത് എന്നിവിടങ്ങളിലും ബിജെപി ജില്ലാ കമ്മിറ്റികളും സംസ്ഥാന നേതൃത്വവും പ്രതീക്ഷയര്‍പ്പിക്കുന്നു.

കാസര്‍കോടും മഞ്ചേശ്വരത്തും ന്യൂനപക്ഷ വിഭാഗത്തിന്റെ പോളിങ് ശതമാനത്തില്‍ വന്ന കുറവാണു ബിജെപിയുടെ വിജയസാധ്യതയ്ക്കു കളമൊരുക്കുന്നതായി കാണുന്നത്. ഒന്നാം സ്ഥാനത്ത് അല്ലെങ്കില്‍ രണ്ടാം സ്ഥാനത്ത് എത്താവുന്നത്ര ശക്തമായ പ്രവര്‍ത്തനവും വോട്ടു ശേഖരണവും 22 മുതല്‍ 25 മണ്ഡലങ്ങളില്‍ നടന്നതായി കോര്‍ കമ്മിറ്റി വിലയിരുത്തി.

നേമം മണ്ഡലത്തില്‍ ഇടതുപക്ഷത്തേക്കു മാത്രം പോകുമായിരുന്ന ന്യൂനപക്ഷ വോട്ടുകള്‍ കെ. മുരളീധരന്റെ വരവോടെ രണ്ടായി തിരിഞ്ഞുവെന്നും അതാണു ബിജെപിയുടെ ജയസാധ്യത ഉയര്‍ത്തിയതെന്നുമാണു കണ്ടെത്തല്‍. കഴക്കൂട്ടത്തും വട്ടിയൂര്‍ക്കാവിലും കാട്ടാക്കടയിലും കോണ്‍ഗ്രസ് വോട്ടുകളും ലഭിച്ചിട്ടുണ്ടെന്നു കരുതുന്നു.

തലശേരിയിലും ഗുരുവായൂരിലും സ്ഥാനാര്‍ഥിയില്ലാതെ പോയതു പ്രവര്‍ത്തകരിലുണ്ടാക്കിയ നിരാശ മറികടക്കാന്‍ ഇവിടെ സംഘടനാ പ്രവര്‍ത്തനം ശക്തമാക്കാന്‍ ദേശീയ നേതൃത്വം നിര്‍ദേശിച്ചിട്ടുണ്ട്.

അതേസമയം നിയമസഭാതിരഞ്ഞെടുപ്പില്‍ രണ്ടക്കത്തില്‍ കൂടുതല്‍ സീറ്റുകള്‍ എന്‍ഡിഎ നേടുമെന്നു ബിജെപി സംസ്ഥാന അധ്യക്ഷന്‍ കെ. സുരേന്ദ്രന്‍ പറഞ്ഞു. പാര്‍ട്ടി നിയോജക മണ്ഡലം കമ്മിറ്റികളുടെ വിലയിരുത്തല്‍ പ്രകാരം നിയമസഭയില്‍ വിധിനിര്‍ണായക ശക്തിയായി എന്‍ഡിഎ മാറുമെന്നും അദ്ദേഹം പറഞ്ഞു. ബിജെപി സംസ്ഥാന കോര്‍ കമ്മിറ്റി യോഗത്തിനു മുന്നോടിയായി മാധ്യമങ്ങളോടു സംസാരിക്കുകയായിരുന്നു.

എല്‍ഡിഎഫിനോ യുഡിഎഫിനോ കേവല ഭൂരിപക്ഷം നേടി അധികാരത്തില്‍ വരാന്‍ കഴിയില്ല. ഗുരുവായൂരിലും തലശേരിയിലും നാമനിര്‍ദേശ പത്രിക തള്ളിയതില്‍ പാര്‍ട്ടിക്കു ഗുരുതരമായ പിഴവുണ്ടായിട്ടില്ല. സാങ്കേതിക പ്രശ്‌നങ്ങള്‍ മാത്രമേ കണ്ടെത്തിയിട്ടുള്ളൂ. കോവിഡിന്റെ രണ്ടാം വരവിനെ നേരിടുന്നതില്‍ സംസ്ഥാനസര്‍ക്കാര്‍ ദയനീയമായി പരാജയപ്പെട്ടു.

വാക്‌സീന്‍ വിതരണത്തിലുള്‍പ്പെടെ ഏകോപനമില്ലായ്മ ദൃശ്യമാണ്. മുഖ്യമന്ത്രിയുള്‍പ്പെടെ കോവിഡ് പ്രോട്ടോക്കോള്‍ ലംഘിച്ചു. കോവിഡ് പ്രതിരോധവുമായി ബന്ധപ്പെട്ടു സര്‍ക്കാര്‍ വിളിച്ചിട്ടുള്ള സര്‍വകക്ഷിയോഗത്തില്‍ പങ്കെടുത്ത് ഇക്കാര്യങ്ങള്‍ ഉന്നയിക്കുമെന്നും സുരേന്ദ്രന്‍ പറഞ്ഞു.