പിഞ്ചുമകളെ പുഴയിലെറിഞ്ഞ് കൊന്നതിന് കാരണമായി സനു മോഹന്‍ പറഞ്ഞത് കടം കാരണമെന്നാണ്. താനും ആത്മഹത്യക്ക് ശ്രമിച്ചിരുന്നുവെന്നും പേടിച്ചുപോയെന്നുമാണ് പറഞ്ഞത്. എന്നാല്‍ പേടിച്ച ആള്‍ നേരെ സിനിമാ തീയറ്ററിലേക്കും ചൂതാട്ട കേന്ദ്രത്തിലേക്കും പോകുമോ എന്നുള്ള ചോദ്യമാണ് ബാക്കിയാകുന്നത്.

13 വയസുള്ള മകള്‍ വൈഗയെ കൊന്നു പുഴയിലെറിഞ്ഞ കേസില്‍ പിതാവ് കങ്ങരപ്പടി ഹാര്‍മണി ഫ്‌ളാറ്റ് ശ്രീഗോകുലത്തില്‍ സനു മോഹനെ തെളിവെടുപ്പിനായി ഇന്നലെ ഗോവയിലെത്തിച്ചു. താമസിച്ച ഹോട്ടലില്‍ തെളിവെടുപ്പ് നടത്തും. ഇവിടത്തെ കാസിനോയില്‍ ചൂതാട്ടം നടത്തിയതായി സനു സമ്മതിച്ചിരുന്നു.

സേലത്തു നിന്ന് ബംഗളുരു വഴിയാണ് ആറംഗ അന്വേഷണ സംഘം ഗോവയിലെത്തിയത്. ഇവിടത്തെ ബീച്ചില്‍ സനു ചെലവഴിച്ചിരുന്നു. ഗോവയില്‍നിന്നു കൊല്ലൂര്‍ മൂകാംബിക, കാര്‍വാര്‍ ബീച്ച് എന്നിവിടങ്ങളിലും തെളിവെടുപ്പിനു പോകും. അതിനു ശേഷം തിരികെ കേരളത്തിലെത്തിച്ചതിനു ശേഷം വിശദമായി ചോദ്യംചെയ്യും.

മകളെ കൊലപ്പെടുത്തിയതിന്റെ ഉദ്ദേശ്യം ഇനിയും വ്യക്തമായിട്ടില്ല. മകളെ കൊന്നശേഷം ആത്മഹത്യ ചെയ്യാനുദ്ദേശിച്ചാണു നാടുവിട്ടതെന്നു പറയുന്ന സനു 27 ദിവസം പലയിടത്തുമായി കറങ്ങിനടന്നതിനു പറയുന്ന ന്യായീകരണം വിശ്വസനീയമല്ല. സാമ്പത്തിക പ്രശ്‌നമായിരുന്നു കാരണമെങ്കില്‍ സനു ജീവനൊടുക്കുകയാണു ചെയ്യേണ്ടിയിരുന്നത്. മകളെ കൊന്നതിനു വ്യക്തമായ കാരണമുണ്ടാകുമെന്നാണു പോലീസിന്റെ കണക്കുകൂട്ടല്‍.



പ്രതിയുടെ മാനസികാവസ്ഥ വിശദമായി മനസിലാക്കാന്‍ മാനസികാരോഗ്യ വിദഗ്ധന്റെ സഹായം തേടും. കൂടുതല്‍ ശാസ്ത്രീയ പരിശോധന നടത്താനും ആലോചിക്കുന്നുണ്ട്. കുറ്റകൃത്യം സമ്മതിച്ചതിനാല്‍ നുണ പരിശോധന ആവശ്യമില്ലെന്നാണ് അന്വേഷണ സംഘത്തിന്റെ നിഗമനം. എന്നാല്‍, വിശദമായ ചോദ്യംചെയ്യലിനുശേഷം ആവശ്യമെങ്കില്‍ ഇത്തരം ശാസ്ത്രീയ പരിശോധനകള്‍ നടത്തിയേക്കും.

കൊല്ലൂരില്‍നിന്ന് ഉടുപ്പിവഴി കാര്‍വാറിലെത്തിയ സനു ബീച്ചില്‍ കിടന്നു മയങ്ങുമ്പോഴാണു മത്സ്യത്തൊഴിലാളികള്‍ കണ്ടതും പോലീസിനെ അറിയിച്ചതും. മരിക്കാനായി മദ്യത്തില്‍ വിഷം കലര്‍ത്തി കഴിച്ചിട്ടു കിടന്നതാണെന്നാണ് ഇയാളുടെ മൊഴി.

അതേസമയം സനു മോഹന്റെ കൂടുതല്‍ ക്രൂരതകളാണ് പുറത്ത് വന്നത്. താന്‍ പുഴയിലെറിഞ്ഞ മകള്‍ വൈഗയുടെ പോസ്റ്റ്‌മോര്‍ട്ടം നടക്കുമ്പോള്‍ കോയമ്പത്തൂരിലെ ഉക്കടത്ത് തിയറ്ററില്‍ സനുമോഹന്‍ സിനിമ കണ്ടുരസിക്കുകയായിരുന്നു. മകളെ ചേര്‍ത്തുപിടിച്ച്, കഴുത്തുഞെരിച്ചു കൊലപ്പെടുത്തിയശേഷമാണു സനു കാറില്‍ മൃതദേഹവുമായി മുട്ടാര്‍ പുഴയോരത്തെത്തിയത്.

അവിടെനിന്നു കോയമ്പത്തൂരിലേക്കു കടന്നു. കാര്‍ വില്‍ക്കുകയായിരുന്നു ലക്ഷ്യം. കുറ്റബോധം ലവലേശമില്ലാത്ത സനുവിന്റെ പ്രവൃത്തിയില്‍ ദുരൂഹതയുണ്ടെന്ന് അന്വേഷണസംഘം വിലയിരുത്തുന്നു. പ്രതിയുമൊത്ത് ഇന്നലെ കോയമ്പത്തൂരില്‍ തെളിവെടുപ്പ് പൂര്‍ത്തിയാക്കി.

വൈഗയെ പുഴയില്‍ത്തള്ളുന്നതിനു മുമ്പ് സ്വര്‍ണാഭരണങ്ങള്‍ അഴിച്ചെടുക്കാന്‍ സനു മറന്നില്ല. കൊലപാതകം കൃത്യമായ ലക്ഷ്യത്തോടെയായിരുന്നു എന്നതിന്റെ സൂചനയായാണിതു പോലീസ് വിലയിരുത്തുന്നത്. വൈഗയുടെ സ്വര്‍ണ ചെയിനും സനുവിന്റെ വിവാഹമോതിരവും കോയമ്പത്തൂരില്‍ വിറ്റതു കണ്ടെത്തി. ധൃതിക്കിടെ സ്വര്‍ണക്കമ്മല്‍ അഴിച്ചെടുക്കാനായില്ല.

സനു 50,000 രൂപ അഡ്വാന്‍സ് വാങ്ങി വിറ്റ ഫോക്‌സ് വാഗണ്‍ കാര്‍ ഇന്നലെ രാവിലെ വാഹന ബ്രോക്കര്‍ കോയമ്പത്തൂരില്‍ പോലീസിനു കൈമാറി. പരിശോധനയ്ക്കുശേഷം കാര്‍ തൃക്കാക്കര സ്‌റ്റേഷനിലെത്തിച്ചു. തുടര്‍ന്നാണ് കോയമ്പത്തൂരിലെത്തിച്ച് തെളിവെടുത്തത്.