സോഷ്യല് മീഡിയയില് തെറ്റായ വാര്ത്ത പ്രചരിപ്പിക്കുന്നവരെ കണ്ടെത്താന് സൈബര് പട്രോളിംഗ്
കോവിഡ് വ്യാപനവുമായി ബന്ധപ്പെട്ട് സോഷ്യല് മീഡിയയില് തെറ്റായ വാര്ത്തകള് പ്രചരിപ്പിക്കുന്നവര്ക്കെതിരെ കര്ശനമായ നിയമ നടപടികള് സ്വീകരിക്കുമെന്ന് സംസ്ഥാന പോലീസ് മേധാവി ലോക്നാഥ് ബെഹ്റ അറിയിച്ചു. കോവിഡുമായി ബന്ധപ്പെട്ട് ആധികാരികവും ശാസ്ത്രീയവുമല്ലാത്ത നിരവധി കാര്യങ്ങള് സമൂഹമാധ്യമങ്ങളില് പ്രചരിക്കുന്നുണ്ട്. ഇത്തരം വാര്ത്തകള് നിര്മ്മിക്കുന്നത് മാത്രമല്ല ഷെയര് ചെയ്യുന്നതും കുറ്റകരമാണ്. ഇത്തരം തെറ്റായ സന്ദേശങ്ങള് നിര്മ്മിക്കുന്നവരെയും പങ്കുവയ്ക്കുന്നവരെയും കണ്ടെത്താനായി സമൂഹമാധ്യമങ്ങളില് കര്ശനമായ സൈബര് പട്രോളിംഗ് നടത്താന് പോലീസ് ആസ്ഥാനത്തെ ഹൈടെക് െ്രെകം എന്ക്വയറി സെല്, സൈബര് ഡോം എന്നിവയ്ക്ക് നിര്ദ്ദേശം നല്കിയതായും ഡി ജി പി അറിയിച്ചു. ഉത്തരേന്ത്യന് സംസ്ഥാനങ്ങളിള് കോവിഡ് വിതയ്ക്കുന്ന വിപത്തുകളെ പറ്റിയുള്ള വാര്ത്തകള് നമ്മുടെ സംസ്ഥാനത്തും പരിഭ്രാന്തി സൃഷ്ടിക്കുന്നുണ്ടെന്ന് ഇന്ന് വാര്ത്താസമ്മേളനത്തില് മുഖ്യമന്ത്രി പറഞ്ഞിരുന്നു. അത്തരത്തില് ഭയചകിതമാകേണ്ട സ്ഥിതിവിശേഷം നിലവില് കേരളത്തിലില്ല. ജാഗ്രത പുലര്ത്തിയാല് ഈ പ്രതിസന്ധിയെ മറികടക്കാന് സാധിക്കും. എന്നാല് ജനങ്ങളില് പരിഭ്രാന്തി പരത്തുന്ന വസ്തുതാവിരുദ്ധമായ പല സന്ദേശങ്ങളും സാമൂഹ്യമാധ്യമങ്ങളില് പ്രചരിക്കുന്നുണ്ട്. ഇതിനെതിരെക്കൂടി ജാഗ്രത പുലര്ത്തണം. ഇത്തരത്തില് പ്രചരണങ്ങള് നടത്തുന്നവര്ക്കെതിരെ നിയമ നടപടികള് സ്വീകരിക്കും. കോവിഡുമായി ബന്ധപ്പെട്ട കാര്യങ്ങള് മനസ്സിലാക്കാന് ആരോഗ്യവകുപ്പ് നല്കുന്ന വിവരങ്ങളേയും ആധികാരികമായ സംവിധാനങ്ങളേയുമാണ് ആശ്രയിക്കേണ്ടത്. വാര്ത്തകള് നല്കുമ്ബോള് ജനങ്ങളില് അനാവശ്യമായ ആശങ്ക പടര്ത്താതിരിക്കാന് മാധ്യമങ്ങളും ശ്രദ്ധിക്കണമെന്ന് അഭ്യര്ഥിക്കുന്നതായും മുഖ്യമന്ത്രി പറഞ്ഞു.
ആദ്യ തരംഗത്തെ പിടിച്ചുനിര്ത്താന് ഉപയോഗിച്ച അടിസ്ഥാന തത്വങ്ങളിലേയ്ക്ക് ശക്തമായി തിരിച്ചു പോകേണ്ടിയിരിക്കുന്നു. മാസ്ക് കൃത്യമായി ധരിക്കാനും, കൈകള് ശുചിയാക്കാനും, ശാരീരിക അകലം പാലിക്കാനും വീഴ്ച വരുത്തരുത്. ആള്ക്കൂട്ടങ്ങള് ഒഴിവാക്കണം. അടഞ്ഞ സ്ഥലങ്ങളില് കൂടാനോ, അടുത്ത് ഇടപഴകാനോ പാടില്ല. ഇതൊക്കെ താരതമ്യേന മികച്ച രീതിയില് പാലിച്ചതുകൊണ്ടാണ് മറ്റു പ്രദേശങ്ങളെ അപേക്ഷിച്ച് കേരളത്തില് രോഗവ്യാപനം കുറഞ്ഞതും മരണങ്ങള് അധികം ഉണ്ടാകാതിരുന്നതും. ഇക്കാര്യത്തില് സ്വയമേവയുള്ള ശ്രദ്ധ നല്കുന്നതില് ചെറിയ വീഴ്ചകള് ഇപ്പോള് കാണുന്നുണ്ട്. പോലീസോ മറ്റു സര്ക്കാര് സംവിധാനങ്ങളോ ഇടപെട്ടില്ലെങ്കില് തോന്നുന്നതു പോലെ ആകാമെന്നൊരു ധാരണ ഉള്ളവര് അതു തിരുത്തണം. നമുക്കും, നമുക്കു ചുറ്റുമുള്ളവര്ക്കും വേണ്ടി രോഗം തനിയ്ക്ക് പിടിപെടാന് അനുവദിക്കില്ല എന്ന് ദൃഢനിശ്ചയം ചെയ്യണം. ഇത്തരത്തില് നമ്മള് തീരുമാനിച്ചില്ലെങ്കില് നമ്മുടെ നാടും ഗുരുതരമായ സ്ഥിതിവിശേഷത്തിലേക്കെത്തിയേക്കാം.
കോവിഡ് വ്യാപനം തടയുന്നതിന്റെ ഭാഗമായി പ്രഖ്യാപിച്ച വാരാന്ത്യ നിയന്ത്രണങ്ങള് സംസ്ഥാനത്ത് പൊതുവെ കര്ശനമായി നടപ്പാക്കുന്നുണ്ട്. പൊലീസ് പരിശോധന കര്ശനമാക്കിയിട്ടുണ്ട്. ഹയര് സെക്കന്ഡറി പരീക്ഷകള്, വോട്ടെണ്ണലിനു നിയോഗിച്ചിരിക്കുന്ന ജീവനക്കാരുടെ പരിശീലനം, അവശ്യ സര്വീസുകള് തുടങ്ങിയവ യാതൊരു തടസവും കൂടാതെ നടക്കുന്നുണ്ട്. സംസ്ഥാനത്ത് 24 മണിക്കൂറിനുള്ളില് മാസ്ക് ധരിക്കാത്തതിന് 22,703 പേര്ക്കെതിരെയാണ് കേസെടുത്തത്. സാമൂഹിക അകലം പാലിക്കാത്തതിന് 9,145 പേര്ക്കെതിരെ നിയമ നടപടി സ്വീകരിച്ചു. പിഴയായി ഈടാക്കിയത് 62,91,900 രൂപയാണ്.
https://www.facebook.com/Malayalivartha
