കേന്ദ്ര വിദേശകാര്യ സഹമന്ത്രി വി മുരളീധരനെ മലയാളികള്‍ക്ക് ഏറെ ഇഷ്ടമായിരുന്നു. എന്നാല്‍ ഒന്നും ചെയ്യാതെ അടുത്തകാലത്ത് സര്‍ക്കാരിനേയും മുഖ്യമന്ത്രിയേയും അനാവശ്യമായി വിമര്‍ശിച്ചതോടെയാണ് കാര്യങ്ങള്‍ മാറി മറിഞ്ഞത്.

എന്തിന് കോണ്‍ഗ്രസ് നേതാവ് പി ചിദംബരം, സിനിമാതാരം കമലഹാസന്‍ എന്നിവരുടെ പോലും വിമര്‍ശനം മുരളീധരന് ഏറ്റുവാങ്ങേണ്ടി വന്നു. വിദേശകാര്യമന്ത്രി എന്നതിലുപരി വിമര്‍ശന കാര്യമന്ത്രി എന്ന നിലയിലാണ് മുരളീധരന്‍ ശ്രദ്ധിക്കുന്നതെന്ന ആക്ഷേപവും ഉണ്ടായി.

കേരളത്തിന് സഹായകമായത് ഒന്നും ചെയ്യാതെ ചുമ്മാതെയുള്ള വിമര്‍ശനം നിര്‍ത്താന്‍ രാഷ്ട്രീയം മറന്ന് എല്ലാവരും അഭ്യര്‍ത്ഥിക്കുകയാണ്. അതിന് മാതൃകയാകേണ്ടത് ഒ രാജഗോപാലാണ്. രാജഗോപാലും കേന്ദ്ര മന്ത്രിയായയാളാണ്.

അദ്ദേഹം അന്ന് റെയില്‍വേ സഹമന്ത്രിയായിരുന്ന കാലത്ത് നടത്തിയ വികസനം മാത്രം മതി. അദ്ദേഹം അന്നത്തെ സര്‍ക്കാരിനെ ഇതുപോലെ വിമര്‍ശിച്ചോ. മാത്രമല്ല നിയമസഭയില്‍ ബിജെപി എംഎല്‍എ ആയിരുന്നിട്ടും സിപിഎമ്മിന്റെ പ്രീതി പോലും പിടിച്ചുപറ്റി.

ഇപ്പോള്‍ വി മുരളീധരനെ പരോക്ഷമായി പരിഹസിച്ച് സ്വാമി സന്ദീപാനന്ദഗിരിയും രംഗത്തെത്തി. നിലവിലെ നേമം എംഎല്‍എയും മുന്‍ പ്രധാനമന്ത്രി കെബി വാജ്‌പേയിയുടെ മന്ത്രിസഭയില്‍ കേന്ദ്രമന്ത്രിയുമായിരുന്ന ബിജെപി നേതാവ് ഒ രാജഗോപാലിന്റെ പ്രവര്‍ത്തനങ്ങളെ വിവരിച്ചുകൊണ്ടുള്ള സോഷ്യല്‍ മീഡിയാ പോസ്റ്റ് വഴിയാണ് സന്ദീപാനന്ദഗിരി കേന്ദ്ര വിദേശകാര്യ സഹമന്ത്രിയെ പരിഹസിക്കുന്നത്.

റെയില്‍വേ മന്ത്രിയായിരുന്നപ്പോഴും എംഎല്‍എ ആയപ്പോഴും മികച്ചക്ക പ്രവര്‍ത്തനങ്ങള്‍ കാഴ്ചവച്ചയാളായിരുന്നു ഒ രാജഗോപാല്‍ എന്ന് പറയുന്ന, സ്വാമി അദ്ദേഹം ഇപ്പോഴും കേന്ദ്ര മന്ത്രിയായിരുന്നെങ്കില്‍ കേരളത്തിന് ഒരുപാട് ഗുണമുണ്ടാകുമായിരുന്നു എന്നും അഭിപ്രായപ്പെടുന്നുണ്ട്.

വാക്‌സിന്‍ ചാലഞ്ചിലൂടെ ലഭിക്കുന്ന പണം സിപിഎം നേതാക്കളുടെ അക്കൗണ്ടിലേക്കെത്തരുതെന്ന് ഉറപ്പാക്കണമെന്ന വി മുരളീധരന്റെ പ്രസ്താവനയോട് ഇന്ന് മുഖ്യമന്ത്രി പിണറായി വിജയന്‍ പ്രതികരിച്ചിരുന്നു.

ഏത് സ്ഥാനത്തിരുന്നാലും വിടുവായത്തമാണ് പറയുന്നതെന്നാണ് വി മുരളീധരനെ പേരെടുത്ത് പറയാതെ മുഖ്യമന്ത്രി വിമര്‍ശിച്ചത്. കേന്ദ്ര വിഹിതത്തിനായി കാത്തുനില്‍ക്കാതെ കേരളം സ്വന്തമായി വാക്‌സിന്‍ വാങ്ങണമെന്ന അദ്ദേഹത്തിന്റെ പ്രസ്താവന അടുത്തിടെ വിമര്‍ശനം ക്ഷണിച്ചുവരുത്തിയിരുന്നു.

സന്ദീപാനന്ദഗിരിയുടെ കുറിപ്പ് ഇങ്ങനെയാണ്

'ഒ. രാജഗോപാല്‍ എന്ന ഏവരുടേയും പ്രിയപ്പെട്ട രാജേട്ടന്‍ വാജ്‌പെയ് മന്ത്രിസഭയില്‍ കേന്ദ്ര മന്ത്രിയായി സത്യപ്രതിജ്ഞചെയ്ത് അധികാരമേറ്റെടുത്തപ്പോള്‍ മലയാളികളെല്ലാം വളരെ സന്തോഷിച്ചു കേരളത്തില്‍ നിന്നൊരു കേന്ദ്രമന്ത്രിയുണ്ടല്ലോ എന്നതില്‍! റെയില്‍വേ മന്ത്രിയായിരുന്നപ്പോള്‍ ഒരുപാട് നല്ല കാര്യങ്ങള്‍ കേരളത്തിനുവേണ്ടി രാജേട്ടന്‍ ചെയ്തു.

കേരളത്തിലെ മുടങ്ങിക്കിടന്ന റെയില്‍വേ മേല്‍പ്പാലങ്ങളുടെ നിര്‍മ്മാണം വേഗത്തിലാക്കുകയും, കേരളത്തിനൊരു സ്‌പെഷല്‍ ട്രെയിന്‍ അമൃത എക്‌സ്പ്രസ് അനുവദിക്കുകയും, കേരളത്തിന്റെ ആവശ്യങ്ങള്‍ക്കായി കേരളത്തില്‍ നിന്നുള്ള എം.പി മാര്‍ക്കൊപ്പം പ്രധാനമന്ത്രിയെ കണ്ട് കാര്യങ്ങള്‍ ധരിപ്പിക്കുന്നതിനും രാജേട്ടന്‍ മുന്നിലുണ്ടായിരുന്നു. മന്ത്രിയായി ഇരിക്കുമ്പോള്‍ കക്ഷിരാഷ്ട്രീയത്തിന് അതീതമായി നിലകൊണ്ട വിടുവായിത്തം പറയാത്ത സംസ്‌ക്കാര സമ്പന്നനായിരുന്നു രാജേട്ടന്‍.

എം.എല്‍.എ എന്ന നിലയിലും കഴിഞ്ഞ 5 വര്‍ഷം സര്‍ക്കാറിനൊപ്പം നിന്ന് മാതൃകാപരമായ പ്രവര്‍ത്തനമാണ് രാജേട്ടന്‍ കാഴ്ചവെച്ചത്. ഈയവസരത്തില്‍ രാജേട്ടനായിരുന്നു കേന്ദ്ര സഹമന്ത്രിയായി കേന്ദ്രമന്ത്രിസഭയിലുണ്ടായിരുന്നതെങ്കില്‍ കേരളത്തിന് ഒരുപാടു ഗുണം ഉണ്ടാകുമായിരുന്നു...'