കോവിഡ് വ്യാപനത്തെ പിടിച്ചുകെട്ടാന്‍ നടപ്പാക്കിയ നിയന്ത്രണങ്ങളോട് സഹകരിച്ച് കേരളം. ലോക്ഡൗണിന് സമാനമായ നിയന്ത്രണങ്ങളാണ് സംസ്ഥാനത്ത് ഇന്നലെയും ഇന്നും ഏര്‍പ്പെടുത്തിയത്. ഈ നിയന്ത്രണങ്ങളോട് പൊതുവെ അനുകൂലമായാണ് ജനങ്ങള്‍ പ്രതികരിച്ചത്. ഇന്നും കര്‍ശനനിയന്ത്രണങ്ങള്‍ തന്നെയാകും സംസ്ഥാനത്തുണ്ടാകുക.

കര്‍ശനനിയന്ത്രണങ്ങള്‍ക്കിടയിലും ഹയര്‍ സെക്കന്‍ഡറി പരീക്ഷ, വോട്ടെണ്ണല്‍ ചുമതലയുള്ള ഉദ്യോഗസ്ഥരുടെ പരിശീലനം, വാക്‌സിന്‍ വിതരണം, പൊതുഗതാഗതം എന്നിവ തടസ്സമില്ലാതെ നടന്നു.

അവശ്യവസ്തുക്കള്‍ വിതരണം ചെയ്യുന്ന കടകളും വ്യാപാരസ്ഥാപനങ്ങളും പ്രവര്‍ത്തിച്ചു. ഹോട്ടലുകള്‍, റസ്റ്റാറന്റുകള്‍ എന്നിവയിലൂടെ പാര്‍സല്‍, ഹോം ഡെലിവറി എന്നിവ നടന്നു. അത്യാവശ്യയാത്രകള്‍ അനുവദിച്ചു. കെ.എസ്.ആര്‍.ടി.സി സര്‍വിസുകളും നടത്തി.

വിവാഹം, ഗൃഹപ്രവേശം ഉള്‍പ്പെടെയുള്ളവക്ക് പോകുന്നവര്‍ക്ക് കോവിഡ് മാനദണ്ഡപ്രകാരം ഇളവുകള്‍ അനുവദിച്ചിരുന്നു. അത്യാവശ്യയാത്രക്ക് പോകുന്നവര്‍ സത്യപ്രസ്താവന കൈവശം വെക്കണമെന്ന് നിര്‍ദേശിച്ചിരുന്നു.

മതിയായ രേഖകളില്ലാതെ പുറത്തിറങ്ങിയവരെ പലയിടത്തും പൊലീസ് തിരിച്ചയച്ചു. കോവിഡ് മാനദണ്ഡങ്ങള്‍ പാലിക്കാതെ യാത്ര ചെയ്തവരെയും സര്‍വിസ് നടത്തിയ ടാക്‌സികളെയും പിടികൂടി പൊലീസ് പിഴ ഈടാക്കി.

പഴം, പച്ചക്കറി, മത്സ്യം, മാംസം വില്‍പനക്കാര്‍ക്ക് പ്രവര്‍ത്തിക്കാന്‍ അനുമതി നല്‍കിയിരുന്നെങ്കിലും ജനം കൂടുതലായി പുറത്തിറങ്ങാത്തതിനാല്‍ അത്തരം കച്ചവടക്കാര്‍ക്ക് തിരിച്ചടിയുണ്ടായിട്ടുണ്ട്. സാമ്ബത്തിക നഷ്ടമുണ്ടായതായി പല കച്ചവടക്കാരും പറഞ്ഞു.

സര്‍വിസ് നടത്തിയ കെ.എസ്.ആര്‍.ടി.സി ബസുകളില്‍ യാത്രക്കാരുടെ എണ്ണം തീരെ കുറവായിരുന്നു. ഹോട്ടലുകളിലെ ടേക്ക് എവേ കൗണ്ടറുകളില്‍ വൈകീട്ടോടെ തിരക്ക് അനുഭവപ്പെട്ടു. അതിര്‍ത്തികളിലും പ്രധാന നിരത്തുകളിലും കര്‍ശന പൊലീസ് പരിശോധനയാണ് ഏര്‍പ്പെടുത്തിയിരുന്നത്.

അവശ്യവസ്തുക്കളൊഴികെ സാധനങ്ങള്‍ വില്‍ക്കുന്ന കടകമ്പോളങ്ങള്‍ അടഞ്ഞുകിടന്നു. ആശുപത്രി, വാക്‌സിനെടുക്കാന്‍ പോയവര്‍ ഉള്‍പ്പെടെ മതിയായ രേഖകള്‍ കാട്ടിയവരെ യാത്ര ചെയ്യാന്‍ അനുവദിച്ചു.

ഇന്നും സംസ്ഥാനത്ത് ഇത്തരത്തിലുള്ള പരിശോധനയും നിയന്ത്രണങ്ങളും തുടരും. സംസ്ഥാനത്തെ കോവിഡ് രോഗികളുടെ എണ്ണം വര്‍ധിക്കുന്ന സാഹചര്യത്തില്‍ നിയന്ത്രണങ്ങള്‍ ഇനിയും കടുപ്പിക്കാനാണ് സാധ്യത. തിങ്കളാഴ്ച ചേരുന്ന സര്‍വകക്ഷിയോഗം ഇക്കാര്യത്തില്‍ അന്തിമതീരുമാനമെടുക്കും.