രാജ്യമെങ്ങും ഇപ്പോള്‍ ചര്‍ച്ച ചെയ്യുന്നത് പെഗാസസ് ചാരവലയ കഥയാണ്. ഇന്ത്യയിലെ പല വിവിഐപികളാണ് ഇപ്പോള്‍ പെട്ടിരിക്കുന്നത്. പെഗാസസ് എന്ന ഇസ്രയേല്‍ ചാര സോഫ്റ്റ്‌വെയര്‍ ഉപയോഗിച്ച് ഇന്ത്യന്‍ ഏജന്‍സികള്‍ ഫോണ്‍ ചോര്‍ത്തിയ ഉന്നതരില്‍ കോണ്‍ഗ്രസ് എം.പി രാഹുല്‍ ഗാന്ധി, കേന്ദ്ര മന്ത്രിമാരായ അശ്വനി വൈഷ്ണവ്, പ്രള്‍ഹാദ് സിംഗ് പട്ടേല്‍, തിരഞ്ഞെടുപ്പ് തന്ത്രജ്ഞന്‍ പ്രശാന്ത് കിഷോര്‍, മലയാളി മാദ്ധ്യമപ്രവര്‍ത്തകന്‍ ഗോപീകൃഷ്ണന്‍, മലയാളി മനുഷ്യാവകാശ പ്രവര്‍ത്തകന്‍ ജെയ്‌സണ്‍ സി. കൂപ്പര്‍ തുടങ്ങിയവരുണ്ടെന്ന് ഓണ്‍ലൈന്‍ മാദ്ധ്യമമായ ദ് വയര്‍ പുറത്തുവിട്ട പുതിയ റിപ്പോര്‍ട്ടില്‍ പറയുന്നു.

അതേസമയം, പ്രതിപക്ഷം ഇന്ന് പാര്‍ലമെന്റില്‍ വിഷയം ഉന്നയിക്കുന്നതോടെ വര്‍ഷകാല സമ്മേളനം തുടക്കത്തിലേ ചൂടുപിടിക്കും. 2018 ജൂണ്‍ മുതല്‍ 2019 ജൂണ്‍ വരെയാണ് രാഹുലിന്റെ രണ്ട് ഫോണുകള്‍ ചോര്‍ത്തിയത്. രാഹുല്‍ കോണ്‍ഗ്രസ് അദ്ധ്യക്ഷനായിരുന്നപ്പോള്‍ അടുപ്പമുണ്ടായിരുന്ന അഞ്ച് പേരുടെയും രണ്ട് സഹായികളുടെയും ഫോണ്‍ ചോര്‍ത്തി. ഫോണും നമ്പരും ഇടയ്ക്കിടെ മാറ്റിയിട്ടും രാഹുലിന്റെ രണ്ട് ഫോണുകള്‍ ചോര്‍ത്തിയെന്നാണ് റിപ്പോര്‍ട്ട്.

രാഹുലിന് സംശയാസ്പദമായ വാട്‌സ്ആപ്പ് സന്ദേശങ്ങള്‍ ലഭിച്ചിരുന്നു. ഫോണ്‍ ചോര്‍ത്തലിനെപ്പറ്റി സൂചന ലഭിച്ചിരുന്നു എന്നാണ് രാഹുല്‍ പ്രതികരിച്ചത്. ഫോണ്‍ ചോര്‍ത്തല്‍ ആരോപണം പാര്‍ലമെന്റില്‍ നിഷേധിച്ച കേന്ദ്ര ഐ.ടി, നിയമമന്ത്രി അശ്വനി വൈഷ്ണവിന്റെ ഫോണും ചോര്‍ത്തി.

മമത ബാനര്‍ജിയുടെ അനന്തരവന്‍ അഭിഷേക് ബാനര്‍ജി, മുന്‍ തിരഞ്ഞെടുപ്പ് കമ്മിഷണര്‍ അശോക് ലവാസ, പ്രള്‍ഹാദ് സിംഗ് പട്ടേലുമായി ബന്ധമുള്ള 18 പേര്‍ എന്നിവരും പട്ടികയിലുണ്ട്.രജ്ഞന്‍ ഗോഗോയ്‌ക്കെതിരെ പരാതിപ്പെട്ട വനിതയും സുപ്രീംകോടതി മുന്‍ ചീഫ് ജസ്റ്റിസ് രഞ്ജന്‍ ഗോഗയ്‌ക്കെതിരെ ലൈംഗിക ആരോപണം ഉന്നയിച്ച സുപ്രീംകോടതി ജീവനക്കാരിയുടെ മൂന്ന് ഫോണുകളും എട്ട് ബന്ധുക്കളുടെ ഫോണുകളും ചോര്‍ത്തി.

മന്ത്രി സ്മൃതി ഇറാനിയുടെ ഓഫീസ് സെക്രട്ടറി സഞ്ജയ് കച്‌റൂ, മുന്‍ രാജസ്ഥാന്‍ മുഖ്യമന്ത്രി വസുന്ധര രാജെ സിന്ധ്യയുടെ ഓഫീസ് സെക്രട്ടറി, ഗംഗന്‍ദീപ് കാംഗ് (വൈറോളജിസ്റ്റ്), മുന്‍ തിരഞ്ഞെടുപ്പ് കമ്മിഷണര്‍ അശോക് ലവാസഹരി മേനോന്‍ (ബില്‍ ഗേറ്റ്‌സ് ഫൗണ്ടേഷന്റെ ഇന്ത്യന്‍ തലവന്‍), ജയ്ദീപ് ചോക്കര്‍ (അസോസി. ഒഫ് ഡെമോക്രാറ്റിക് റിഫോംസിന്റെ തലവന്‍), അലംഗാര്‍ സവായി (രാഹുല്‍ ഗാന്ധിയുടെ അടുത്തയാള്‍), സച്ചിന്‍ റാവു (കോണ്‍ഗ്രസ് വര്‍ക്കിംഗ് പ്രസിഡന്റ്), അന്തരിച്ച വി.എച്ച്.പി നേതാവ് പ്രവീണ്‍ തൊഗാഡിയ എന്നിവരാണ് ഫോണ്‍ ചോര്‍ത്തലിന് ഇരയായ പ്രമുഖര്‍.

ഇങ്ങനെ നേതാക്കള്‍ കൈകാലിട്ടടിക്കുമ്പോള്‍ മറ്റൊരു വാര്‍ത്ത കൂടി ശ്രദനേടുകയാണ്. പ്രധാനമന്ത്രി നരേന്ദ്ര മോദിയുടെ പ്രതിമാസ റേഡിയോ പരിപാടിയായ മന്‍ കി ബാത് 2014ല്‍ ആരംഭിച്ചതുമുതല്‍ ഇതുവരെ 30.80 കോടി രൂപ വരുമാനം നേടി. ഏറ്റവും കൂടുതല്‍ വരുമാനം നേടിയ 2017-18 കാലയളവില്‍ 10.64 കോടി രൂപയാണ് ലഭിച്ചത്. വാര്‍ത്താ വിതരണ പ്രക്ഷേപണ മന്ത്രി അനുരാഗ് താക്കൂര്‍ രാജ്യസഭയില്‍ രേഖാമൂലം നല്‍കിയ മറുപടിയിലാണ് ഇക്കാര്യം വ്യക്തമാക്കിയിട്ടുളളത്.

ഓള്‍ ഇന്ത്യ റേഡിയോയുടെയും ദൂരദര്‍ശന്റെ വിവിധ ചാനലുകള്‍ വഴിയും സോഷ്യല്‍ മീഡിയ പ്ലാറ്റ് ഫോമിലൂടെയും എല്ലാ മാസവും അവസാന ഞായറാഴ്ച രാവിലെ 11 മണിക്കാണ് 'മന്‍ കി ബാത്ത്' പരിപാടി പ്രക്ഷേപണം ചെയ്യുന്നത്. ഇവയെക്കൂടാതെ രാജ്യത്തൊട്ടാകെയുള്ള 91 സ്വകാര്യ സാറ്റലൈറ്റ് ടി.വി ചാനലുകളും കേബിള്‍, ഡി.ടി.എച്ച് പ്ലാറ്റ്‌ഫോമുകളും ഈ പരിപാടി ജനങ്ങള്‍ക്ക് മുന്നില്‍ എത്തിക്കുന്നുണ്ട്. പ്രസാര്‍ ഭാരതി മന്‍ കി ബാത്തിന്റെ 78 എപ്പിസോഡുകള്‍ ഇതുവരെ പ്രക്ഷേപണം ചെയ്തിട്ടുണ്ട്.