ഫോണ്‍ചോര്‍ത്തല്‍ വിവാദം രാജ്യത്തെ ചൂട് പിടിപ്പിച്ചിരിക്കുകയാണ്. രാഹുല്‍ഗാന്ധി ഉള്‍പ്പെടെയുള്ള വലിയ നേതാക്കളുടെ അവസ്ഥ ഇതാണെങ്കില്‍ സാധാരണക്കാരുടെ കാര്യം പറയാനുണ്ടോ.

ചാര സോഫ്റ്റ്‌വെയറുകള്‍ ഉപയോഗിച്ചു വിവരങ്ങള്‍ ചോര്‍ത്തുന്നതിനെക്കാള്‍ അപകടം പുറമേനിന്നുള്ള കൃത്രിമ വിവരങ്ങള്‍ ഉപഭോക്താവിന്റെ അറിവില്ലാതെ ഫോണിലേക്കു കടത്തിവിടുന്നതാണെന്നു വിദഗ്ധര്‍ ചൂണ്ടിക്കാട്ടുന്നു. അധികാരകേന്ദ്രങ്ങള്‍ ഉന്നംവച്ച ഒരു വ്യക്തിയെ കേസില്‍ കുടുക്കാന്‍ പോലും ഇത്തരം വ്യാജ ഡിജിറ്റല്‍ തെളിവുകള്‍ ഉപകരിച്ചേക്കാം. വ്യക്തി അറിയാതെ തെളിവുകള്‍ ഫോണിലേക്കു കടത്തിവിട്ടാല്‍ ഉത്തരവാദിത്തത്തില്‍ നിന്ന് ഒഴിഞ്ഞുമാറുക എളുപ്പമല്ല. നിരപരാധിത്വം തെളിയിക്കാനും പ്രയാസമാകും.

നിരവധി ചാര സോഫ്റ്റുവെയറുകളാണുള്ളത്. അതില്‍ പെഹസാണ് ഇപ്പോഴത്തെ വില്ലന്‍. പെഗസസ് എന്ന ചാര സോഫ്റ്റ്‌വെയറിന്റെ സ്രഷ്ടാക്കള്‍ ഇസ്രയേല്‍ സൈബര്‍ ഇന്റലിജന്‍സ് കമ്പനിയായ എന്‍എസ്ഒയാണ്. തുടക്കം 2010ല്‍. 2015ലെ കണക്കനുസരിച്ച് 15 കോടി ഡോളര്‍ (1080 കോടി രൂപ) വരുമാനം.

100 കോടി യുഎസ് ഡോളറിനാണ് ആദ്യ ഉടമകളായ ഫ്രാന്‍സിസ്‌കോ പാര്‍ട്‌നേഴ്‌സ് 2017ല്‍ കമ്പനി വില്‍പനയ്ക്കു വച്ചത്. പിന്നീട് യൂറോപ്യന്‍ െ്രെപവറ്റ് ഇക്വിറ്റി ഫണ്ടായ നൊവാല്‍ഫിന ക്യാപ്പിറ്റല്‍ നിക്ഷേപം നടത്തി.

സര്‍ക്കാര്‍ ഉപയോക്താക്കള്‍ക്കു മാത്രം സോഫ്റ്റ്‌വെയര്‍ വില്‍ക്കാനാണ് എന്‍എസ്ഒയ്ക്ക് ഇസ്രയേല്‍ പ്രതിരോധ വകുപ്പിന്റെ അനുമതി നല്‍കി. ഭീകരവാദികള്‍, കൊടുംകുറ്റവാളികള്‍ എന്നിവരെ കണ്ടെത്താന്‍ മാത്രമാണ് പെഗസസ് ഉപയോഗിക്കുന്നതെന്നാണ് എന്‍എസ്ഒയുടെ വിശദീകരണം. പക്ഷേ, ദുരുപയോഗിക്കാറുണ്ടെന്നു സുതാര്യതാ റിപ്പോര്‍ട്ടില്‍ തുറന്നുപറച്ചില്‍

മെക്‌സിക്കന്‍ ലഹരിമരുന്നു മാഫിയ തലവന്‍ 'എല്‍ ചാപ്പോ' ജോക്വിം ഗുസ്മാനെ പിടികൂടാനായി മെക്‌സിക്കന്‍ സര്‍ക്കാര്‍ 2011 ല്‍ ഉപയോഗിച്ചത് പെഗസസിന്റെ ആദ്യപതിപ്പ്. 2016 ല്‍ യുഎഇയിലെ മനുഷ്യാവകാശ പ്രവര്‍ത്തകന്‍ അഹമ്മദ് മന്‍സൂറിനെ നിരീക്ഷിക്കാനായി പെഗസസ് ഉപയോഗിച്ചെന്ന് കാനഡയിലെ സിറ്റിസന്‍ ലാബിന്റെ വെളിപ്പെടുത്തല്‍.

ഇസ്തംബുളിലെ സൗദി കോണ്‍സുലേറ്റില്‍ കൊല്ലപ്പെട്ട മാധ്യമപ്രവര്‍ത്തകന്‍ ജമാല്‍ ഖഷോഗിയെ നിരീക്ഷിക്കാന്‍ സൗദി അറേബ്യ പെഗസസ് ഉപയോഗിച്ചതായും റിപ്പോര്‍ട്ട്. 2019 ല്‍ ഇന്ത്യയിലെ മനുഷ്യാവകാശ പ്രവര്‍ത്തകര്‍, മാധ്യമ പ്രവര്‍ത്തകര്‍ എന്നിവരുടെയടക്കം ഫോണ്‍വിവരങ്ങള്‍ ചോര്‍ത്തിയെന്ന വെളിപ്പെടുത്തലുണ്ടായി. ഭീമ കൊറേഗാവ് സംഭവത്തില്‍ അറസ്റ്റിലായവരെ പ്രതിനിധീകരിച്ച അഭിഭാഷകന്റെ വരെ വിവരങ്ങള്‍ ചോര്‍ത്തപ്പെട്ടു.

40 രാജ്യങ്ങളിലായി 60 സര്‍ക്കാര്‍ ഉപയോക്താക്കളാണുള്ളത്. 51% ഇന്റലിജന്‍സ് ഏജന്‍സികള്‍, 38% നിയമപാലന ഏജന്‍സികള്‍, 11% സൈന്യം

പെഗസസിന്റെ പ്രവര്‍ത്തനം ഇങ്ങനെയാണ്...

ചോര്‍ത്തേണ്ട ഫോണിലേക്ക് വാട്‌സാപ് വിഡിയോ കോള്‍ വിളിക്കുകയാണ് ആദ്യപടി. മറുതലയ്ക്കലുള്ള ആള്‍ എടുക്കുന്നതിന് മുന്‍പ് കോള്‍ വിഛേദിക്കും. മിസ്ഡ് കോള്‍ കൈകാര്യം ചെയ്യുന്നതുമായി ബന്ധപ്പെട്ടുണ്ടായിരുന്ന വാട്‌സാപ് പിഴവു മുതലെടുത്തു ചാര സോഫ്റ്റ്‌വെയര്‍ ഇന്‍സ്റ്റാള്‍ ചെയ്യപ്പെടുന്നു. ഈ പിഴവ് വാട്‌സാപ് പിന്നീടു പരിഹരിച്ചു. മിസ്ഡ് കോളിനു പുറമേ മെസേജ് ആയി എത്തുന്ന ലിങ്കുകള്‍ വഴിയും പെഗസസ് ഫോണുകളിലെത്തിയിട്ടുണ്ട്. പാസ്‌വേഡുകള്‍, ഫോണ്‍ നമ്പറുകള്‍, എസ്എംഎസ് സന്ദേശങ്ങള്‍, ലൈവ് കോളുകള്‍ എന്നിവയെല്ലാം ചോര്‍ത്താം. ഫോണ്‍ ക്യാമറ, മൈക്രോഫോണ്‍ എന്നിവ ഓണ്‍ ചെയ്യാന്‍ സാധിക്കും. ജയില്‍ ബ്രേക്കിങ് എന്നാണ് ഇതിനെ വിളിക്കുന്നത്.