കുടുംബ പ്രശ്‌നത്തെ തുടര്‍ന്ന് കുന്നംകുളം എയ്യാലില്‍ അച്ഛനും മകനും ഒരേ മരത്തില്‍ തൂങ്ങി മരിച്ചു. എയ്യാല്‍ സ്വദേശി ശരത് ആത്മഹത്യ ചെയ്തതില്‍ മനം നൊന്താണ് അച്ഛന്‍ ദാമോദരനും തൂങ്ങി മരിച്ചത്. തിങ്കളാഴ്ച രാത്രിയാണ് സംഭവം. കുടുംബ പ്രശ്‌നത്താലാണ് ആത്മഹത്യയെന്ന് പൊലീസ് വ്യക്തമാക്കി.

കുന്നംകുളം എയ്യാല്‍ ജാഫര്‍ ക്ലബ്ബിന് സമീപമാണ് സംഭവം. തിങ്കളാഴ്ച വൈകീട്ട് വീട്ടില്‍ നിന്ന് ബഹളം കേട്ടിരുന്നതായി നാട്ടുകാര്‍ പറഞ്ഞു. 27 കാരനായ ശരത്ത് ടിപ്പര്‍ ലോറി ഡ്രൈവറാണ്. ദാമോദരന്‍ കൂലിപ്പണിക്കാരനാണ്.

കുടുംബ പ്രശ്‌നത്താല്‍ വീട് വിട്ട ശരത് രാത്രിയായിട്ടും തിരിച്ചെത്താതിനെ തുടര്‍ന്നാണ് 53 കാരനായ ദാമോദരനും ഇളയ മകന്‍ സജിത്തും അന്വേഷിച്ചിറങ്ങിയത്. സമീപത്തെ മരത്തില്‍ രാത്രിയോടെ ശരത്തിനെ തൂങ്ങി മരിച്ച നിലയില്‍ കണ്ടെത്തുകയായിരുന്നു. ബന്ധുക്കളെ വിവരമറിയിക്കാന്‍ സജിത്ത് തിരിച്ചു പോയി.

ഈ സമയം മരത്തില്‍ കയറിയ ദാമോദരന്‍ ഉടുത്തിരുന്ന മുണ്ട് മരത്തില്‍ കെട്ടി കഴുത്തില്‍ കുരുക്കിട്ട് ചാടുകയായിരുന്നു. മകന്‍ സജിത്തും നാട്ടുകാരും തിരിച്ചെത്തുമ്പോഴേക്കും മരണം സംഭവിച്ചിരുന്നു. അച്ഛനും മകനുമിനടയില്‍ അഭിപ്രായ വ്യത്യസങ്ങള്‍ ഉണ്ടായിരുന്നതായി എരുമപ്പെട്ടി പൊലീസ് അറിയിച്ചു. ഇന്‍ക്വസ്റ്റ് നടപടികള്‍ക്ക് ശേഷം മൃതദേഹങ്ങള്‍ പോസ്റ്റ് മോര്‍ട്ടത്തിനായി മെഡിക്കല്‍ കോളേജിലേക്ക് മാറ്റി.