കുളത്തൂര്‍ ഉച്ചക്കട സ്വദേശിയായ കെ. ചന്ദ്രനെ​ സാമൂഹിക പ്രവര്‍ത്തകനായ സുധീര്‍ തിരുനിലത്തിന്റെ നേതൃത്വത്തില്‍ നടത്തിയ അന്വേഷണത്തിലാണ്​ കണ്ടെത്തിയത്​.

പിതാവിനെ കണ്ടെത്താന്‍ മകള്‍ അഞ്ജു സമൂഹ മാധ്യമങ്ങളിലൂടെ നടത്തിയ അഭ്യര്‍ഥന ​ബഹ്‌റൈനിലെ പ്രവാസി മലയാളികള്‍ ഏറ്റെടുത്തിരുന്നു. അംവാജില്‍ നിര്‍മാണത്തൊഴിലാളിയായ ചന്ദ്രന്‍ മുഹറഖിലാണ്​ താമസിച്ചിരുന്നത്​. വീട്ടുകാരുമായി ഫോണില്‍ സംസാരിച്ച ചന്ദ്രന്‍ നാട്ടിലേക്ക്​ തിരിച്ചുപോകാനുള്ള സന്നദ്ധതയും അറിയിച്ചു. പിതാവിനെ കണ്ടെത്തിയതില്‍ ഏറെ സന്തോഷത്തിലാണ്​ മകള്‍ അഞ്ജുവും മറ്റ്​ കുടുംബാംഗങ്ങളും.

2009 ആഗസ്റ്റ്​ 18നാണ്​ ചന്ദ്രന്‍ ബഹ്​റൈനില്‍ എത്തിയത്​. 2011ല്‍ വിസയുടെ കാലാവധി തീര്‍ന്നു. പിന്നീട്​ വിസ പുതുക്കിയിട്ടില്ല. ഇതിനിടെ പാസ്​പോര്‍ട്ടി​ന്റെ കാലാവധിയും അവസാനിച്ചു. ചെറിയ ജോലികള്‍ ചെയ്ത്​ ജീവിച്ച ഇദ്ദേഹം പിന്നീട്​ നാട്ടിലേക്ക്​ തിരിച്ചുപോയില്ല.

ഇതിനിടെയാണ്​, കഴിഞ്ഞ ദിവസം അച്​ഛനെത്തേടി മകള്‍ അഞ്ജു ഫേസ്​ബുക്കില്‍ കുറിപ്പിട്ടത്​. അഞ്ജുവിന്​ ആറ്​ വയസുള്ളപ്പോഴാണ്​ ചന്ദ്രന്‍ ബഹ്​റൈനിലേക്ക്​ വന്നത്​. ഏറെക്കാലം വിവരമൊന്നും ലഭിക്കാത്തതിനെത്തുടര്‍ന്ന്​ കണ്ടെത്താന്‍ വീട്ടുകാര്‍ നിരവധി ശ്രമങ്ങള്‍ നടത്തിയെങ്കിലും ഫലമുണ്ടായില്ല.

​വീട്ടില്‍ അമ്മക്ക്​ ​ജോലിയൊന്നും ഇ​ല്ലെന്നും തനിക്ക്​ കോളജില്‍ ഫീസ്​ അടക്കാന്‍ കഴിഞ്ഞിട്ടില്ലെന്നും അച്​ഛനെ എങ്ങനെയെങ്കിലും കണ്ടുപിടിച്ചുതരണമെന്നും അഞ്ജു വേദനയോടെ ഫേസ്​ബുക്കില്‍ കുറിച്ചത്​ ഏറ്റെടുത്ത പ്രവാസികള്‍ പലവഴിക്കും ചന്ദ്രനായി അന്വേഷണം ആരംഭിച്ചു. സാമൂഹിക പ്രവര്‍ത്തകരുടെ ആത്​മാര്‍ഥമായ പരിശ്രമമാണ്​ ഒടുവില്‍ ലക്ഷ്യം കണ്ടത്​. നാട്ടില്‍ വളരെ പ്രയാസം അനുഭവിച്ചാണ്​ കുടുംബം കഴിയുന്നത്​. ചെറിയൊരു കൂര മാത്രമാണ്​ ഇവര്‍ക്ക്​ സ്വന്തമായുള്ളത്​. അഞ്ജുവി​ന്റെ തുടര്‍പഠനം കുടുംബത്തിന്​ മുന്നില്‍ ഒരു വെല്ലുവിളിയായുണ്ട്​.

ചന്ദ്രനെക്കുറിച്ചുള്ള വിവരങ്ങള്‍ ഇന്ത്യന്‍ എംബസിയില്‍ അറിയിച്ചിട്ടുണ്ട്​.രേഖകള്‍ ശരിയാക്കി ഇദ്ദേഹത്തെ നാട്ടിലേക്കയക്കാനുള്ള ശ്രമത്തിലാണെന്ന്​ സുധീര്‍ തിരുനിലത്ത്​ പറഞ്ഞു