വയനാട് വൈത്തിരിയില് കാട്ടാനയുടെ ആക്രമണത്തില് വയോധികന് പരിക്ക്... വീട് തകര്ത്ത് ഉള്ളില് കയറിയ കാട്ടാന കുഞ്ഞിരാമനെ കുത്തി പരിക്കേല്പ്പിക്കുകയായിരുന്നു
വയനാട് വൈത്തിരിയില് കാട്ടാനയുടെ ആക്രമണത്തില് വയോധികന് പരിക്കേറ്റു. തൈലക്കുന്ന് സ്വദേശി പുത്തന്പുര കുഞ്ഞിരാമനാണ് പരിക്കേറ്റത്. ഇയാളെ മാനന്തവാടി മെഡിക്കല് കോളജ് ആശുപത്രിയില് പ്രവേശിപ്പിച്ചു
ചൊവ്വാഴ്ച പുലര്ച്ചെയോടെയാണ് തൈലക്കുന്ന് ജനവാസ കേന്ദ്രത്തില് കാട്ടാനയിറങ്ങിയത്. വീട് തകര്ത്ത് ഉള്ളില് കയറിയ കാട്ടാന കുഞ്ഞിരാമനെ കുത്തി പരിക്കേല്പ്പിക്കുകയായിരുന്നു. വനംവകുപ്പ് ഉദ്യോഗസ്ഥര് സ്ഥലത്തെത്തി പരിശോധന നടത്തുന്നു.
അതേസമയം മറ്റൊരു സംഭവത്തില് പാലക്കാട് കഴിഞ്ഞ ശനിയാഴ്ച പ്രഭാത സവാരിക്കിറങ്ങിയ ഗൃഹനാഥനെ കാട്ടാന ചവിട്ടിക്കൊന്നു. ധോണി മായാപുരം പെരുന്തുരുത്തികളം വീട്ടില് ആര്. ശിവരാമന് (60) ആണ് ദാരുണമായി കൊല്ലപ്പെട്ടത്. റെയില്വേ കോളനി-ധോണി റോഡില് പൈറ്റാംകുന്ന് പള്ളിക്ക് സമീപത്താണ് സംഭവം. പതിവായി ഇതുവഴി നടക്കാനിറങ്ങുന്ന ശിവരാമന് അടങ്ങുന്ന സംഘത്തിന് മുന്നിലേക്ക് കാട്ടാനയെത്തുകയായിരുന്നു.
ധോണിയില്നിന്നു ഉമ്മിനി ഹൈസ്കൂള് വരെ പ്രധാനറോഡിലൂടെ പോയി മടങ്ങുന്നതാണ് രീതി. രാവിലെ ആറുപേരടങ്ങുന്ന സംഘം ധോണിയില്നിന്നു പുറപ്പെട്ടു. ശിവരാമനും സമീപവാസിയും സുഹൃത്തുമായ രാജേഷും മുന്നിലും മറ്റുനാലുപേര് പിന്നിലുമായാണ് നടന്നത്. അപ്രതീക്ഷിതമായി റോഡിലേക്ക് കയറിയ കാട്ടാനയെ കണ്ടതും ശിവരാമനും രാജേഷും പിന്തിരിഞ്ഞോടി. ആന പുറകേ ചെന്നതോടെ റോഡിന് ഇരുവശത്തുമുള്ള വയലിലേക്ക് ഓടിമാറാന് ശ്രമിച്ചു
ആന റോഡിലേക്ക് കയറിവന്ന ഭാഗത്തെ വയലിലേക്കാണ് രാജേഷ് ഇറങ്ങിയത്. ശിവരാമന് മറുവശത്തെ വയലിലേക്കു ചാടുന്നതിനിടെ പുറകേയെത്തിയ ആന ചവിട്ടിയതായി നാട്ടുകാര് പറയുന്നു. വയലിലെ ചെളിയില് പൂണ്ടുപോയ ശിവരാമനെ വിട്ട് ആന ഓടിപ്പോയി. വയലില്നിന്നു കേറിപോകും വഴിക്കുള്ള മതിലും ആന തകര്ത്തിട്ടുണ്ട്. ഓടിക്കൂടിയ നാട്ടുകാര് വനംവകുപ്പിനെ വിവരം അറിയിച്ചു. സാരമായി പരുക്കേറ്റ ശിവരാമനെ അതുവഴി വന്ന ഓട്ടോറിക്ഷയില് ജില്ലാ ആശുപത്രിയില് എത്തിച്ചെങ്കിലും രക്ഷിക്കാനായില്ല.
ധോണി വനമേഖലയില്നിന്നു അഞ്ചുകിലോമീറ്ററോളം അകലെ ജനവാസ മേഖലയില് ഉമ്മിനി ഹൈസ്കൂളിന് ഇരുനൂറുമീറ്റര് മാറിയാണ് സംഭവം. കൃഷിനാശം വിതച്ച് മേഖലയില് ഭീതിപടര്ത്തിയ പി.ടി.-7 എന്ന കാട്ടാനയാണ് ആക്രമണം നടത്തിയതെന്നാണ് നാട്ടുകാര് പറയുന്നത്. അതല്ലെന്നാണ് വനംവകുപ്പിന്റെ വിശദീകരണം.
"
https://www.facebook.com/Malayalivartha
