ആദിവാസി ബാലികയെ പീഡിപ്പിക്കാന്‍ ശ്രമിച്ച കേസില്‍ കസ്റ്റഡിയിലായ പ്രതി പോലീസുദ്യോഗസ്ഥരെ ആക്രമിച്ച് കൈവിലങ്ങുമായി കടന്നുകളഞ്ഞു.... ഒടുവില്‍ രക്ഷയില്ലെന്നു കണ്ടപ്പോള്‍ കീഴടങ്ങി.

നിലമ്പൂര്‍ ജില്ലാ ആശുപത്രിയില്‍ വൈദ്യപരിശോധനയ്ക്കെത്തിച്ചപ്പോള്‍ ഓടുകയായിരുന്നു. പക്ഷെ രക്ഷയില്ലെന്നു കണ്ടപ്പോള്‍ ഒടുവില്‍ പൂക്കോട്ടുംപാടം പോലീസില്‍ത്തന്നെ കീഴടങ്ങി. നിലമ്പൂര്‍ കരുളായി സ്വദേശി ജസീല്‍ (പട്ടാമ്പി ജസീല്‍-37) ആണ് രക്ഷപ്പെട്ടത്.

വൈദ്യപരിശോധന കഴിഞ്ഞ് പുറത്തിറങ്ങിയശേഷം പോലീസുകാരെ ആക്രമിച്ച് സമീപത്തെ വനഭാഗത്തേക്ക് ഓടുകയായിരുന്നു. അപ്രതീക്ഷിത ആക്രമത്തില്‍ പരിക്കേറ്റ പോലീസുകാര്‍ പിന്തുടര്‍ന്നെങ്കിലും പ്രതി വനത്തിലേക്ക് ഓടിമറഞ്ഞുകളഞ്ഞു. ശനിയാഴ്ച പുലര്‍ച്ചെ ഒന്നരയോടെയാണ് സംഭവം നടന്നത്.

പോലീസ് പിന്തുടര്‍ന്ന് വനമേഖല കേന്ദ്രീകരിച്ച് തിരച്ചില്‍ നടത്തിയെങ്കിലും കണ്ടെത്താനായില്ല. ഓടുന്നതിനിടയില്‍, വനാതിര്‍ത്തിയില്‍ കാട്ടാനയെ തടയാനായി സ്ഥാപിച്ച സൗര വൈദ്യുതിവേലിയില്‍ തട്ടി ഷോക്കേറ്റ് വീണു. പിന്നീട് മണലോടി ഭാഗത്തെ ഒരു വീട്ടില്‍നിന്ന് ബൈക്കും ചെരിപ്പുമെടുത്ത് രക്ഷപ്പെട്ടു. ബൈക്കിലെ പെട്രോള്‍ തീര്‍ന്നതോടെ കരുളായിക്കടുത്ത് ഉപേക്ഷിച്ചു. അപ്പോഴേക്കും പോലീസ് പ്രതിക്കായി വലവിരിച്ചു കഴിഞ്ഞിരുന്നു. ഇയാള്‍ക്ക് രണ്ടു ഭാര്യമാരുണ്ട്. രണ്ടു വീടുകളിലും പോലീസ് തിരച്ചില്‍ നടത്തിയതോടെയാണ് പോലീസില്‍ കീഴടങ്ങിയത്.

പ്രതി മൊബൈല്‍ഫോണിലൂടെ അഭിഭാഷകനെയും ഭാര്യയെയും വിളിച്ചത് ഒളിയിടം കണ്ടെത്താനായി സഹായിച്ചു. മണിക്കൂറുകള്‍ നീണ്ട തിരച്ചിലിനിടെ പ്രതി കീഴടങ്ങിയതോടെയാണ് പോലീസുകാര്‍ക്ക് ആശ്വാസമായത്.

നിലമ്പൂര്‍ ഡാന്‍സാഫ് ടീമിലെ അംഗങ്ങളാണ് ആദ്യം ഇയാളെ പിടികൂടി വെള്ളിയാഴ്ച പൂക്കോട്ടുംപാടം പോലീസിനു കൈമാറിയിരുന്നത്. എസ്.സി., എസ്.ടി. നിയമപ്രകാരവും പോക്‌സോ നിയമപ്രകാരവും സ്ത്രീത്വത്തെ അപമാനിച്ചതിനുമാണ് കേസെടുത്തത്.

കസ്റ്റഡിയില്‍ നിന്ന് ചാടിപ്പോയതിനും ബൈക്ക് കവര്‍ച്ചയ്ക്കും നിലമ്പൂര്‍ പോലീസും കേസെടുത്തിട്ടുണ്ട്. ക്രിമിനല്‍, ഗുണ്ടാ, മാഫിയ സംഘത്തിലെ പ്രധാന കണ്ണിയാണ് ഇയാളെന്നും പോലീസ് പറഞ്ഞു.കോടതിയില്‍ ഹാജരാക്കിയശേഷം പൂക്കോട്ടുംപാടത്തെ പോക്‌സോ കേസില്‍ കൂടുതല്‍ തെളിവെടുപ്പിനായി പ്രതിയെ കസ്റ്റഡിയില്‍ വാങ്ങും.