‘കട്ടക്കൊമ്പൻ’, ‘ബുള്ളറ്റ്’ എന്നീ കാട്ടാനകൾ പന്തല്ലൂർ, ഇരുമ്പുപാലം എന്നിവിടങ്ങളിലെ ജനവാസകേന്ദ്രങ്ങളിൽ എത്തി ജനങ്ങൾ ആശങ്കയിലായിരുന്നു. ഇപ്പോളിതാ നിർണായകമായ ഒരു വിവരം പുറത്ത് വരികയാണ്.

പന്തല്ലൂരിനെ വിറപ്പിച്ച കാട്ടുകൊമ്പൻമാരെ വിരട്ടാൻ കൊണ്ടുവന്ന കുങ്കിയാന, കാട്ടാനകൾക്കൊപ്പം പോയിരിക്കുകയാണ്. അതായത് അക്ഷരാർത്ഥത്തിൽ 'ഒളിച്ചോടി' എന്നതാണ് ആ വിവരം. . വ്യാഴാഴ്ച രാത്രിയോടെയാണ് ഇത്തരത്തിലൊരു സംഭവുമുണ്ടായത്. ‘കട്ടക്കൊമ്പൻ’, ‘ബുള്ളറ്റ്’ എന്നീ കാട്ടാനകളെ തുരത്താൻ മുതുമലയിൽ നിന്നു വസീം, വിജയ്, ശ്രീനിവാസൻ, ബൊമ്മൻ എന്നീ കുങ്കിയാനകളെ കൊണ്ടുവരികയായിരുന്നു.

വ്യാഴാഴ്ച രാത്രി കുങ്കിയാനകളെ കാട്ടാനകൾ വരുന്ന വഴിയിലിട്ടു തളക്കുകയായിരുന്നു. രാത്രി എട്ടുമണിയോടെ പ്രദേശത്ത് കനത്ത മൂടൽമഞ്ഞുണ്ടായിരുന്നു . മഞ്ഞുനീങ്ങിയപ്പോൾ ആണ് ശ്രീനിവാസൻ എന്ന കുങ്കിയാനയെ കാണാനില്ല എന്ന വിവരം എല്ലാവരും അറിഞ്ഞത് .

ചങ്ങല വേർപെടുത്തി ശ്രീനിവാസൻ പോയി . വനപാലകരും പാപ്പാന്മാരും പരിസരം മുഴുവൻ അന്വേഷിച്ചു. രാത്രി 12 മണിയോടെ കാട്ടുകൊമ്പന്മാർക്കൊപ്പം ശ്രീനിവാസനെ കണ്ടെത്തി. ഒടുവിൽ വനപാലകരും പാപ്പാന്മാരും മറ്റു കുങ്കിയാനകളുടെ സഹായത്തോടെ, ശ്രീനിവാസനെ തിരിച്ചുകൊണ്ടു വന്നു.