തദ്ദേശതിരഞ്ഞെടുപ്പില്‍ രാഹുല്‍ മാങ്കൂട്ടത്തില്‍ വോട്ട് രേഖപ്പെടുത്തിയ പാലക്കാട് നഗരസഭയിലെ കുന്നത്തൂര്‍മേട് വാര്‍ഡില്‍ യു.ഡി.എഫ് സ്ഥാനാര്‍ത്ഥിയുടെ വിജയത്തിന് പിന്നാലെ പ്രതികരണവുമായി രാഹുല്‍ മാങ്കൂട്ടത്തില്‍ എംഎല്‍എ. 'ജനം പ്രബുദ്ധരാണ്. എത്ര ബഹളം വച്ചാലും അവര്‍ കേള്‍ക്കേണ്ടത് കേള്‍ക്കുകയും കാണേണ്ടത് കാണുകയും ചെയ്യും' എന്നായിരുന്നു രാഹുലിന്റെ പ്രതികരണം.

ലൈംഗികാരോപണക്കേസുകളില്‍ പ്രതിയായതോടെ ഒളിവില്‍പ്പോയ രാഹുല്‍ ഇക്കഴിഞ്ഞ വ്യാഴാഴ്ച തിരഞ്ഞെടുപ്പിന് വോട്ടുചെയ്യാനാണ് പുറത്തുവന്നത്. ആദ്യത്തെ ലൈംഗികാരോപണക്കേസില്‍ അറസ്റ്റ് തടയുകയും രണ്ടാമത്തെ കേസില്‍ മുന്‍കൂര്‍ ജാമ്യം അനുവദിക്കുകയും ചെയ്തതിനെത്തുടര്‍ന്നാണ് പാലക്കാട്ടെത്തി വോട്ടുചെയ്തത്.

തനിക്കെതിരായ കേസുകളെക്കുറിച്ച് കാര്യമായ പ്രതികരണത്തിനും അന്ന് രാഹുല്‍ തയ്യാറായില്ല. കേസ് കോടതിയുടെ മുന്നിലുണ്ടെന്നും കോടതി തീരുമാനിക്കുമെന്നും സത്യം ജയിക്കുമെന്നും മാത്രമായിരുന്നു രാഹുല്‍ പറഞ്ഞത്. പറയാനുള്ളതെല്ലാം കോടതിയില്‍ പറയുമെന്ന് പറഞ്ഞ രാഹുല്‍ ഇനി പാലക്കാട്ടുതന്നെ തുടരുമെന്നും വ്യക്തമാക്കിയിരുന്നു. ഒളിവില്‍ പോകില്ല. ഇനി അങ്ങോട്ട് പാലക്കാട്ടുതന്നെ തുടരും, അതില്‍ തര്‍ക്കമില്ല എന്നാണ് രാഹുല്‍ മാദ്ധ്യമങ്ങളോട് പറഞ്ഞത്.