പ്രമുഖ ചെറുകഥാകൃത്തും നോവലിസ്റ്റും നാടകകൃത്തുമായ എം. രാഘവൻ (95) അന്തരിച്ചു. എഴുത്തുകാരൻ എം. മുകുന്ദന്റെ ജ്യേഷ്ഠ സഹോദരനാണ്. മയ്യഴിയിലെ മണിയമ്പത്ത് കുടുംബാംഗമായ അദ്ദേഹം 1930-ലാണ് ജനിച്ചത്.

ഫ്രഞ്ചധീന മയ്യഴിയിൽ ഹോട്ടൽ ഉടമയായിരുന്ന രാഘവൻ, അവിടുത്തെ എക്കോൽ സെംത്രാൽ എ കൂർ കോംപ്ലമാംതേറിൽ നിന്ന് മികച്ച രീതിയിൽ ബ്രവേ പരീക്ഷ പാസായശേഷം സർക്കാർ ജോലിയിൽ പ്രവേശിക്കുകയായിരുന്നു. മുംബൈയിലെ ഫ്രഞ്ച് കോൺസുലേറ്റിന്റെ സാംസ്‌കാരിക വിഭാഗത്തിലും ഡൽഹിയിലെ എംബസിയിലും സേവനമനുഷ്ഠിച്ചിട്ടുണ്ട്.

1983-ൽ എംബസിയുടെ സാംസ്‌കാരികവിഭാഗം സെക്രട്ടറിയായി ജോലിയിൽ നിന്ന് വിരമിച്ചു. മലയാള സാഹിത്യത്തിന് ശ്രദ്ധേയമായ സംഭാവനകൾ നൽകിയിട്ടുണ്ട്. ചെറുകഥാസമാഹാരങ്ങൾ: നനവ്, വധു, സപ്തംബർ അകലെയല്ല, ഇനിയുമെത്ര കാതം. നോവലുകൾ: നങ്കീസ്, അവൻ, യാത്ര പറയാതെ, ചിതറിയ ചിത്രങ്ങൾ, നാടകങ്ങൾ: കർക്കിടകം, ചതുരംഗം, ഹെലൻ സിക്ൾസ്യൂവിന്റെ ഫ്രഞ്ച് നാടകത്തിന്റെ വിവർത്തനമായ 'ദോറയുടെ കഥ'എന്നിവയാണ്.