തദ്ദേശ തിരഞ്ഞെടുപ്പില്‍ മെഴുവേലി ഗ്രാമപഞ്ചായത്തിലെ വിജയത്തിന് പിന്നാലെ സ്വന്തം പാര്‍ട്ടിക്കെതിരെ രൂക്ഷ വിമര്‍ശനവുമായി സി.പി.എം. നേതാവും മുന്‍ എം.എല്‍.എയുമായ കെ.സി. രാജഗോപാലന്‍. തിരഞ്ഞെടുപ്പ് കാലത്ത് സ്വന്തം പാര്‍ട്ടിക്കാര്‍ തന്നെ കാലുവാരിയതിനാലാണ് ഭൂരിപക്ഷം കുറഞ്ഞതെന്നും, ഇത് തോല്‍വിക്ക് തുല്യമായ വിജയമാണെന്നും അദ്ദേഹം തുറന്നടിച്ചു.

മെഴുവേലി ഗ്രാമപഞ്ചായത്തിലെ എട്ടാം വാര്‍ഡില്‍ മത്സരിച്ച കെ.സി. രാജഗോപാലന്‍ വെറും 28 വോട്ടുകള്‍ക്കാണ് വിജയിച്ചത്. രാജഗോപാലന് 324 വോട്ടുകള്‍ ലഭിച്ചപ്പോള്‍ യു.ഡി.എഫ്. സ്ഥാനാര്‍ഥി രാധാകൃഷ്ണന് 296 വോട്ടുകളാണ് നേടാനായത്. കോഴഞ്ചേരി ഏരിയാ സെക്രട്ടറി ടി.വി. സ്റ്റാലിനാണ് കാലുവാരാന്‍ നേതൃത്വം നല്‍കിയതെന്ന് രാജഗോപാലന്‍ ആരോപിച്ചു. മുന്‍പ് ഏരിയാ സെക്രട്ടറി താന്‍ വിജയിച്ച വാര്‍ഡില്‍ പരാജയപ്പെട്ടിരുന്നു. അവിടെ വീണ്ടും സി.പി.എം. ജയിക്കരുത് എന്ന വാശിയാണ് പിന്നിലെന്ന് രാജഗോപാലന്‍ പറയുന്നു.