കണ്ണൂര്‍ സെന്‍ട്രല്‍ ജയിലിലെ തടവുകാര്‍ തയ്യാറാക്കി 'ഫ്രീഡം ഫുഡ്' എന്ന പേരില്‍ വിപണിയിലെത്തിക്കുന്ന പ്രധാന ഭക്ഷണവിഭവങ്ങള്‍ക്ക്് വില കൂട്ടി. പുതുക്കിയ വില ഈ മാസം അഞ്ച് മുതല്‍ പ്രാബല്യത്തില്‍ വന്നു. സാധനങ്ങളുടെ വിലവര്‍ധന കണക്കിലെടുത്താണ് വിഭവങ്ങള്‍ക്ക് നേരിയ വിലവര്‍ധന വരുത്തിയിരിക്കുന്നത്. അതേസമയം ബിരിയാണി ഒഴികെയുള്ള മറ്റ് ഉത്പന്നങ്ങള്‍ക്ക് നിലവില്‍ വില കൂട്ടിയിട്ടില്ല. ചിക്കന്‍ ബിരിയാണിക്ക് 70 രൂപയില്‍നിന്ന് 80 ആയും വെജിറ്റബിള്‍ ബിരിയാണിക്ക് 45ല്‍നിന്ന് 50 ആയും റൈസിന് 40ല്‍നിന്ന് 45 രൂപയുമായാണ് വര്‍ധന. നിത്യോപയോഗ സാധനങ്ങളുടെ വില വര്‍ധിച്ചതിനാല്‍ ജയില്‍ ഉത്പന്നങ്ങളുടെയും വില കൂട്ടണമെന്ന് ആവശ്യപ്പെട്ട് ഒരു വര്‍ഷം മുമ്പ് തന്നെ ജയില്‍ സൂപ്രണ്ടുമാര്‍ സര്‍ക്കാരിന് കത്ത് നല്‍കിയിരുന്നു. ഇതിന്റെ അടിസ്ഥാനത്തിലാണ് ഇപ്പോള്‍ വില വര്‍ധിപ്പിച്ചത്. ജയില്‍ ഉത്പന്നങ്ങളില്‍ ഏറ്റവും കൂടുതല്‍ ആവശ്യക്കാരുള്ളത് ചിക്കന്‍ ബിരിയാണിക്കും ചപ്പാത്തിക്കുമാണ്.

മാസം ശരാശരി 7,82,000 ചപ്പാത്തിയാണ് ഈ ജയിലില്‍നിന്ന് മാത്രം ചുട്ടെടുത്ത് വിപണിയിലെത്തിക്കുന്നത്. ചപ്പാത്തി, ബിരിയാണി, പച്ചക്കറി, മുട്ടക്കറി, ചിക്കന്‍കറി, ചിക്കന്‍ കബാബ്, ചിക്കന്‍ ചില്ലി, കായ വറുത്തത്, ചോക്ലേറ്റ്, ലഡു എന്നിവയാണ് 'ഫ്രീഡം ഫുഡ്' ബ്രാന്‍ഡില്‍ പ്രധാനമായും വിപണിയിലെത്തുന്നത്. കണ്ണൂര്‍ സെന്‍ട്രല്‍ ജയിലിനു സമീപത്ത് പുതുതായി നിര്‍മിച്ച ജയില്‍ കഫെ, ജയിലിനു മുന്നിലെ രണ്ട് കൗണ്ടറുകള്‍ എന്നിവയ്ക്ക് പുറമെ തളിപ്പറമ്പ്, തലശ്ശേരി, കൂത്തുപറമ്പ് ബസ് സ്റ്റാന്‍ഡുകള്‍, കണ്ണൂര്‍ പഴയ ബസ് സ്റ്റാന്‍ഡ് എന്നിവിടങ്ങളിലെ കൗണ്ടറുകള്‍ വഴിയും ജനങ്ങള്‍ക്ക് ജയില്‍ ഭക്ഷണം വാങ്ങാം.