അമ്മയോടുള്ള വിരോധം തീര്‍ക്കാന്‍ മകനും രാണ്ടാം ഭാര്യയും വീട്ടില്‍ അതിക്രമിച്ചുകയറി ഗൃഹോപകരണങ്ങളും പ്രധാന രേഖകളും അടിച്ചുതകര്‍ത്ത് തീയിട്ട് നശിപ്പിച്ചു. തിരുവനന്തപുരം വര്‍ക്കല ചെറുന്നിയൂരിലാണ് സംഭവം. ചെറുന്നിയൂര്‍ സ്വദേശിയായ സിന്ധുവാണ് മകന്‍ മഹേഷിനെതിരെ വര്‍ക്കല പൊലീസില്‍ പരാതി നല്‍കിയത്.

ഗള്‍ഫിലായിരുന്ന മഹേഷ് ഏകദേശം രണ്ടുമാസം മുമ്പാണ് നാട്ടിലെത്തിയത്. ആദ്യ ഭാര്യയുമായി അകന്നു കഴിയുന്ന ഇയാള്‍, അടുത്തിടെ രണ്ടാം ഭാര്യയെന്ന് അവകാശപ്പെടുന്ന ഒരു യുവതിയുമായി സ്വന്തം വീട്ടിലെത്തുകയും യുവതിയെ ഇവിടെ താമസിപ്പിക്കണമെന്ന് അമ്മയോട് ആവശ്യപ്പെടുകയും ചെയ്തു.

എന്നാല്‍ സിന്ധു ഇതിനെ ശക്തമായി എതിര്‍ത്തു. ഇതിനിടെ മഹേഷിന്റെ ആദ്യ ഭാര്യ നല്‍കിയ പരാതിക്ക് പിന്നില്‍ അമ്മയാണെന്ന് മകന്‍ തെറ്റിദ്ധരിച്ചു. ഈ വൈരാഗ്യമാണ് ആക്രമണത്തിന് കാരണമായതെന്ന് പൊലീസ് പറയുന്നു.

കഴിഞ്ഞ ദിവസം ഉച്ചയോടെ സിന്ധു വീട്ടില്‍ ഇല്ലാതിരുന്ന സമയത്താണ് മഹേഷ് അതിക്രമം നടത്തിയത്. വീടിന്റെ മതില്‍ ചാടിക്കടന്നെത്തിയ പ്രതി അകത്തുകയറി ഗൃഹോപകരണങ്ങളെല്ലാം അടിച്ചുതകര്‍ത്തു. തുടര്‍ന്ന് അലമാരയിലുണ്ടായിരുന്ന വീടിന്റെ ആധാരം, എസ്.എസ്.എല്‍.സി സര്‍ട്ടിഫിക്കറ്റുകള്‍ ഉള്‍പ്പെടെയുള്ള നിര്‍ണായക രേഖകള്‍ പുറത്തെടുത്ത് കത്തിച്ചുകളയുകയായിരുന്നു.

കഴിഞ്ഞ മാസം ശബരിമല യാത്ര കഴിഞ്ഞ് മടങ്ങിയെത്തിയ സിന്ധുവിനെ മഹേഷ് രാത്രിയില്‍ വീട്ടിലെത്തി മര്‍ദിച്ചിരുന്നതായും പരാതിയിലുണ്ട്. അക്രമം നടന്ന സമയത്ത് മഹേഷിനൊപ്പം രണ്ടാം ഭാര്യയെന്ന് പറയുന്ന യുവതി പുറത്തുണ്ടായിരുന്നുവെന്ന് സിന്ധു പൊലീസിന് നല്‍കിയ മൊഴിയില്‍ പറയുന്നു. സംഭവത്തില്‍ മഹേഷിനും ഒപ്പമുണ്ടായിരുന്നവര്‍ക്കുമെതിരെ വര്‍ക്കല പൊലീസ് കേസെടുത്തിട്ടുണ്ട്. സംഭവത്തില്‍ വിശദമായ അന്വേഷണം പുരോഗമിക്കുകയാണെന്ന് പൊലീസ് അറിയിച്ചു.