ബാറിന് ലൈസൻസ് അനുവദിച്ചത് സർക്കാരിനെ അറിയിക്കാതെ ഉദ്യോഗസ്ഥർ തീരുമാനിച്ചപ്പോൾ വിവാദമായി, രണ്ട് ഉദ്യോഗസ്ഥർക്ക് സസ്പെൻഷൻ, എക്സൈസ് കമ്മീഷണർക്ക് സ്ഥാനമാറ്റം! എന്നാൽ സ്വാശ്രയ കോളേജുകളിൽ പുതിയ കോഴ്സുകൾ തുടങ്ങാനും സീറ്റുകൾ വർധിപ്പിക്കാനും സർക്കാർ അനുമതി വേണ്ടെന്ന ഉത്തരവ് പുറത്തിറങ്ങുമ്പോൾ അതെന്ത് നയമാണ്? ബാർ ലൈസൻസിന്റെ കാര്യത്തിൽ സർക്കാരിന്റെ അറിവും നിയന്ത്രണവും പ്രധാനമാകുമ്പോൾ വിദ്യാഭ്യാസത്തിന്റെ കാര്യത്തിൽ നിയന്ത്രണങ്ങൾ ഒഴിവാക്കുന്നതെന്തിന്? ചോദ്യങ്ങളുയർത്തി പ്രതിപക്ഷവും സമരത്തിനൊരുങ്ങി എസ്എഫ്ഐയും. കോഴ്സും സീറ്റും തോന്നുംപടി കൂട്ടാൻ കോളേജുകൾക്ക് അധികാരം നൽകുകയാണോ സർക്കാർ? കേരളത്തിൽ പുതിയ വിവാദത്തിന് തിരികൊളുത്തിയിരിക്കുകയാണ് ഉന്നതവിദ്യാഭ്യാസ വകുപ്പിന്റെ സർക്കുലർ.

സ്വാശ്രയ കോളേജുകൾക്ക് കോഴ്സും സീറ്റും കൂട്ടാൻ ഇനി സർക്കാരിന്റെ അനുമതി വേണ്ട! ഉന്നതവിദ്യാഭ്യാസ വകുപ്പിന്റെ പുതിയ സർക്കുലറിനെച്ചൊല്ലി കേരളത്തിൽ വിവാദം. വിദ്യാഭ്യാസ മേഖല സ്വകാര്യ മാനേജ്‌മെന്റുകൾക്ക് വിട്ടുകൊടുക്കുകയാണെന്ന് ആരോപിച്ച് സർക്കുലർ പിൻവലിക്കണമെന്ന് പ്രതിപക്ഷ നേതാവ് പിണറായി വിജയൻ. എന്നാൽ അക്കാദമിക് സ്വയംഭരണം പ്രോത്സാഹിപ്പിക്കാനാണ് തീരുമാനമെന്നാണ് ഉന്നതവിദ്യാഭ്യാസ മന്ത്രി റോജി എം. ജോണിന്റെ വിശദീകരണം.

സംസ്ഥാനത്തെ സ്വയംഭരണ സ്വാശ്രയ കോളേജുകൾക്കും സ്വയംഭരണ എയ്ഡഡ് കോളേജുകൾക്കും പുതിയ അൺഎയ്ഡഡ് അഥവാ സ്വാശ്രയ കോഴ്സുകൾ ആരംഭിക്കുന്നതിന് സർക്കാർ നൽകുന്ന നിരാക്ഷേപപത്രമായ എൻ.ഒ.സി ഇനി ആവശ്യമില്ലെന്നാണ് പുതിയ സർക്കുലറിലെ പ്രധാന വ്യവസ്ഥ. പുതിയ കോഴ്സുകൾ ആരംഭിക്കുന്ന കാര്യം സർക്കാരിനെ മുൻകൂട്ടി അറിയിച്ചാൽ മതിയാകും. നിലവിലുള്ള സ്വാശ്രയ കോഴ്സുകളിൽ സ്ഥിരമായി സീറ്റുകൾ വർധിപ്പിക്കുന്നതിനും പ്രത്യേക സർക്കാർ അനുമതി വേണ്ടെന്നതാണ് മറ്റൊരു പ്രധാന മാറ്റം. നവംബർ ആറിനാണ് ഉന്നതവിദ്യാഭ്യാസ വകുപ്പ് ഇതുസംബന്ധിച്ച സർക്കുലർ പുറത്തിറക്കിയത്.

സംസ്ഥാനത്ത് ആകെ 61 സ്വയംഭരണ കോളേജുകളാണുള്ളത്. ഇതിൽ 37 എണ്ണം സ്വയംഭരണ പദവിയുള്ള എയ്ഡഡ് കോളേജുകളും 23 എണ്ണം സ്വാശ്രയ സ്വയംഭരണ കോളേജുകളുമാണ്. സർക്കാർ മേഖലയിലുള്ള ഏക സ്വയംഭരണ കോളേജ് എറണാകുളം മഹാരാജാസ് കോളേജാണ്. അതായത് 60 കോളേജുകൾക്കാണ് പുതിയ ഇളവുകളുടെ പ്രയോജനം ലഭിക്കുക. തിരുവനന്തപുരം മാർ ഇവാനിയോസ് കോളേജ്, കോട്ടയം സി.എം.എസ് കോളേജ്, ചങ്ങനാശേരി അസംപ്ഷൻ കോളേജ്, കോതമംഗലം മാർ അത്തനേഷ്യസ് കോളേജ് തുടങ്ങിയവ സ്വയംഭരണ എയ്ഡഡ് വിഭാഗത്തിൽ ഉൾപ്പെടുന്നു. തിരുവനന്തപുരം മാർ ബസേലിയോസ് എൻജിനിയറിംഗ് കോളേജ്, കാഞ്ഞിരപ്പള്ളി അമൽ ജ്യോതി എൻജിനിയറിംഗ് കോളേജ് തുടങ്ങിയവ സ്വാശ്രയ സ്വയംഭരണ വിഭാഗത്തിലുമുണ്ട്.

എന്നാൽ എല്ലാ കോളേജുകൾക്കും ഒരേ ഇളവല്ല ലഭിക്കുന്നത്. സ്വയംഭരണ പദവിയില്ലാത്ത അൺഎയ്ഡഡ്, സ്വാശ്രയ കോളേജുകളിൽ പുതിയ കോഴ്സുകൾ ആരംഭിക്കാൻ എൻ.ഒ.സി ആവശ്യമാണ്. അതുപോലെ എയ്ഡഡ് വിഭാഗത്തിൽ പുതിയ കോഴ്സുകൾ തുടങ്ങുന്നതിനും നിലവിലുള്ള സീറ്റുകൾ സ്ഥിരമായി വർധിപ്പിക്കുന്നതിനും സർക്കാർ അനുമതി തുടരും. എന്നാൽ ഈ അനുമതിക്ക് ഇടയ്ക്കിടെ പുതുക്കൽ ആവശ്യമില്ല. സ്വാശ്രയ കോളേജുകൾ എൻ.ഒ.സി എല്ലാ വർഷവും പുതുക്കണമെന്ന വ്യവസ്ഥ മാറ്റി മൂന്ന് വർഷത്തിലൊരിക്കൽ പുതുക്കിയാൽ മതിയെന്നും പുതിയ മാർഗനിർദേശത്തിൽ പറയുന്നു.

അൺഎയ്ഡഡ്, സ്വാശ്രയ കോളേജുകളിൽ നിലവിലുള്ള കോഴ്സുകളിലെ സീറ്റുകൾ വർധിപ്പിക്കുന്ന കാര്യത്തിൽ സർവകലാശാലകൾക്ക് തീരുമാനമെടുക്കാം. പ്രവേശന നടപടികൾ പൂർത്തിയായശേഷം പുതുതായി ആരംഭിച്ച കോഴ്സുകളുടെയും വർധിപ്പിച്ച സീറ്റുകളുടെയും വിവരങ്ങൾ സർവകലാശാല സർക്കാരിന് റിപ്പോർട്ട് ചെയ്യണം. അതായത്, സർക്കാർ അനുമതി മുൻകൂട്ടി വാങ്ങുന്ന രീതിക്ക് പകരം ചില വിഭാഗങ്ങളിൽ മുൻകൂർ അറിയിപ്പും പിന്നീട് റിപ്പോർട്ടും നൽകുന്ന സംവിധാനത്തിലേക്കാണ് മാറ്റം. സർക്കാർ കോളേജുകളെ ഈ ഇളവുകൾ ബാധിക്കില്ലെന്നും വ്യക്തമാക്കിയിട്ടുണ്ട്.

ഇതിനിടയിലാണ് സർക്കുലറിനെതിരെ രൂക്ഷവിമർശനവുമായി പ്രതിപക്ഷ നേതാവ് പിണറായി വിജയൻ രംഗത്തെത്തിയത്. ഉന്നതവിദ്യാഭ്യാസ മേഖലയെ കോർപ്പറേറ്റ് സ്വഭാവമുള്ള സ്വകാര്യ മാനേജ്‌മെന്റുകളുടെ കൊള്ളലാഭത്തിനായി വിട്ടുകൊടുക്കുന്നതാണ് തീരുമാനമെന്നാണ് അദ്ദേഹത്തിന്റെ ആരോപണം. ആവശ്യകതാ പഠനം നടത്താതെ സീറ്റുകൾ വർധിപ്പിക്കാൻ അനുമതി നൽകുന്നത് വിദ്യാഭ്യാസ കച്ചവടത്തിന് വഴിതുറക്കുമെന്നും അദ്ദേഹം പറയുന്നു. എയ്ഡഡ് കോളേജുകളിൽ സ്വാശ്രയ കോഴ്സുകൾ വ്യാപകമായി അനുവദിക്കില്ലെന്ന് കോടതിയിൽ നൽകിയ ഉറപ്പുകൾ ലംഘിക്കുന്ന നടപടിയാണിതെന്നും പിണറായി ആരോപിച്ചു. മെറിറ്റും സംവരണവും അട്ടിമറിക്കപ്പെടാനും പണം വാങ്ങി സീറ്റുകൾ വിൽക്കാനുമുള്ള സാഹചര്യമുണ്ടാകുമെന്നും അദ്ദേഹം മുന്നറിയിപ്പ് നൽകി. സർക്കുലർ അടിയന്തരമായി പിൻവലിക്കണമെന്നാണ് ആവശ്യം.

എന്നാൽ പ്രതിപക്ഷ ആരോപണങ്ങൾ തള്ളുകയാണ് ഉന്നതവിദ്യാഭ്യാസ മന്ത്രി റോജി എം. ജോൺ. അക്കാദമിക് സ്വയംഭരണം പ്രോത്സാഹിപ്പിക്കാനും പുതിയ കാലത്തെ കോഴ്സുകൾ ആരംഭിക്കുന്നതിലെ ഭരണപരമായ കാലതാമസം ഒഴിവാക്കാനുമാണ് തീരുമാനമെന്നാണ് മന്ത്രിയുടെ വിശദീകരണം. മറ്റു പല സംസ്ഥാനങ്ങളിലും സ്വയംഭരണ കോളേജുകൾക്ക് പുതിയ കോഴ്സുകൾ ആരംഭിക്കാൻ ഇത്തരം സർക്കാർ അനുമതി ആവശ്യമില്ലെന്നും കേരളത്തിലും അതിനനുസരിച്ചുള്ള മാറ്റമാണ് കൊണ്ടുവരുന്നതെന്നും മന്ത്രി ചൂണ്ടിക്കാട്ടുന്നു. മെറിറ്റോ സംവരണ വ്യവസ്ഥകളോ ലംഘിക്കപ്പെടില്ലെന്നും അഴിമതി ആരോപണങ്ങൾക്ക് അടിസ്ഥാനമില്ലെന്നും അദ്ദേഹം വ്യക്തമാക്കിയിട്ടുണ്ട്.

പുതിയ കോഴ്സുകൾ ആരംഭിക്കാനും സീറ്റുകൾ വർധിപ്പിക്കാനും കോളേജുകൾക്ക് കൂടുതൽ സ്വാതന്ത്ര്യം നൽകുന്നത് ഉന്നതവിദ്യാഭ്യാസ രംഗത്ത് ഗുണകരമാകുമോ? അതോ സർക്കാർ നിയന്ത്രണങ്ങൾ കുറയുന്നത് സാധാരണക്കാരായ വിദ്യാർഥികളുടെ പഠനാവകാശത്തെയും മെറിറ്റ് അടിസ്ഥാനത്തിലുള്ള പ്രവേശനത്തെയും ബാധിക്കുമോ? ഇതാണ് ഇപ്പോൾ കേരളത്തിൽ ഉയരുന്ന പ്രധാന ചോദ്യം. സർക്കുലർ പിൻവലിക്കണമെന്ന പ്രതിപക്ഷ ആവശ്യവും സർക്കാർ നിലപാടും തമ്മിലുള്ള തർക്കം വരും ദിവസങ്ങളിൽ കൂടുതൽ ശക്തമാകാനാണ് സാധ്യത.