തൊഴിലാളികളുടെ തിരിച്ചറിയൽ രേഖകൾ കൃത്യമായി പരിശോധിക്കാതെ താമസിപ്പിക്കുന്ന വീട്ടുടമകൾക്കെതിരെ കേസെടുക്കുമെന്ന് പൊലീസ് അറിയിച്ചു. ചാവക്കാട്, വടക്കേക്കാട് മേഖലകളിൽ ഇതരസംസ്ഥാന തൊഴിലാളികൾ ഉൾപ്പെട്ട കുറ്റകൃത്യങ്ങൾ വർധിക്കുന്ന പശ്ചാത്തലത്തിലാണ് നടപടി ശക്തമാക്കുന്നത്. താമസക്കാരുടെ വിവരങ്ങൾ പൊലീസ് സ്റ്റേഷനിൽ അറിയിക്കണമെന്നും നിർദേശമുണ്ട്.

താമസക്കാരുടെ തിരിച്ചറിയൽ രേഖകൾ പരിശോധിക്കുന്നതിനൊപ്പം ക്രിമിനൽ പശ്ചാത്തലമുള്ളവരെ കണ്ടെത്താനും പ്രത്യേക നിരീക്ഷണം ഏർപ്പെടുത്തിയിട്ടുണ്ട്. രേഖകളില്ലാതെ താമസിപ്പിക്കുന്നവർക്കെതിരെ കർശന നടപടി സ്വീകരിക്കുമെന്ന് പൊലീസ് മുന്നറിയിപ്പ് നൽകി. തൊഴിലാളികളുടെ സുരക്ഷയും നിയമപരമായ താമസരേഖകളും ഉറപ്പാക്കുന്നതിനൊപ്പം കുറ്റകൃത്യങ്ങൾ തടയുകയാണ് ലക്ഷ്യമെന്നാണ് പൊലീസ് വ്യക്തമാക്കുന്നത്.