സ്വന്തം ജീവൻ അവസാനിപ്പിക്കാൻ യുവാവ് തിരഞ്ഞെടുത്തത് മരണപ്പാച്ചിൽ. പക്ഷേ ആ പാച്ചിലിൽ പൊലിഞ്ഞത് മറ്റൊരു കുടുംബത്തിന്റെ അത്താണിയുടെ ജീവനാണ്. കോട്ടയം മുണ്ടക്കയം ചോറ്റിയിൽ ഏഴ് വാഹനങ്ങളിലേക്ക് കാർ ഇടിച്ചുകയറ്റിയുണ്ടായ അപകടത്തിൽ ഗുരുതരമായി പരുക്കേറ്റ് ചികിത്സയിലായിരുന്ന 63കാരൻ പി.വി. രാജൻ മരിച്ചു. നവംബർ ഒന്നിന് രാവിലെ 8.15-നായിരുന്നു നാടിനെ നടുക്കിയ അപകടം. കൂട്ടിക്കൽ പുത്തൂർ സ്വദേശി ശാലോം ഓടിച്ച കാർ അമിതവേഗത്തിലെത്തി ഒന്നിനു പിന്നാലെ വാഹനങ്ങളിലേക്ക് ഇടിച്ചുകയറുകയായിരുന്നു. രാജന്റെ കൊച്ചുമക്കളടക്കം 14 പേർക്കാണ് അപകടത്തിൽ പരുക്കേറ്റത്. കോട്ടയം മെഡിക്കൽ കോളജിൽ ചികിത്സയിലിരിക്കെയാണ് രാജന്റെ മരണം.

അപകടത്തിന് പിന്നാലെ പുറത്തുവന്ന പൊലീസ് അന്വേഷണ വിവരങ്ങളാണ് സംഭവത്തിന്റെ ഗൗരവം വർധിപ്പിച്ചത്. ആത്മഹത്യ ചെയ്യുക എന്ന ലക്ഷ്യത്തോടെയാണ് കാർ ഓടിച്ചതെന്നും കണ്ണടച്ച് ആക്സിലറേറ്ററിൽ കാലമർത്തിയെന്നുമാണ് യുവാവ് പൊലീസിനോട് പറഞ്ഞത്. തുടക്കത്തിൽ സാധാരണ വാഹനാപകടമെന്ന് കരുതിയ സംഭവം പിന്നീട് ബോധപൂർവം സൃഷ്ടിച്ച അപകടമാണെന്ന് അന്വേഷണത്തിൽ വ്യക്തമായി. നരഹത്യാശ്രമത്തിന് കേസെടുത്ത പൊലീസ് പ്രതിയെ അറസ്റ്റ് ചെയ്തു. നിലവിൽ ശാലോം റിമാൻഡിലാണ്. സ്വന്തം ജീവൻ അവസാനിപ്പിക്കാനുള്ള ഒരാളുടെ തീരുമാനം നടപ്പാക്കാൻ ശ്രമിക്കുമ്പോൾ അതിന്റെ വില നൽകേണ്ടിവന്നത് നിരപരാധികളായ വഴിയാത്രക്കാരും വാഹനയാത്രക്കാരുമാണ്. രാജന്റെ മരണം ഈ സംഭവത്തെ കൂടുതൽ വേദനാജനകമാക്കുന്നു.

കേരളത്തിൽ അടുത്തിടെയുണ്ടായ വാഹനാപകടങ്ങൾ പരിശോധിച്ചാൽ ഇത്തരം മരണപ്പാച്ചിലുകൾ എത്രത്തോളം അപകടകരമായ സാഹചര്യമാണ് സൃഷ്ടിക്കുന്നതെന്ന് വ്യക്തമാകും. ഒക്ടോബർ 11-ന് നെടുമ്പാശ്ശേരിക്ക് സമീപം മിനി കൂപ്പർ കാറിടിച്ച് സ്കൂട്ടറിൽ യാത്ര ചെയ്തിരുന്ന മൂന്ന് യുവാക്കളാണ് മരിച്ചത്. സുഹൈൽ സജീവ് ഓടിച്ചിരുന്ന കാർ അതിവേഗത്തിൽ സ്കൂട്ടറിന് പിന്നിലിടിക്കുകയായിരുന്നു. കേസിലെ നിർണായക വഴിത്തിരിവായത് വാഹനത്തിന്റെ സാങ്കേതിക പരിശോധനാ റിപ്പോർട്ടാണ്. അപകടത്തിന് തൊട്ടുമുമ്പ് കാറിന്റെ വേഗം മണിക്കൂറിൽ 162 കിലോമീറ്ററായിരുന്നുവെന്നും ഇടിയുടെ സമയത്ത് ഏകദേശം 144 കിലോമീറ്ററായിരുന്നുവെന്നും ബിഎംഡബ്ല്യുവിന്റെ പരിശോധനയിൽ കണ്ടെത്തി. അപകടത്തിന് ഒരു സെക്കൻഡ് മുമ്പാണ് ബ്രേക്ക് പ്രയോഗിച്ചതെന്നും റിപ്പോർട്ടിലുണ്ട്. മദ്യപാനം, അമിതവേഗം, അപകടത്തിന് പിന്നാലെയുള്ള നടപടികൾ എന്നിവയെല്ലാം വലിയ വിവാദമായി. കേസിലെ പ്രതികൾക്ക് നവംബർ ആറിന് ഹൈക്കോടതി ജാമ്യം അനുവദിച്ചെങ്കിലും മുഖ്യപ്രതിയായ സുഹൈലിന്റെ മോചനം പത്തുദിവസത്തേക്ക് നീട്ടിവെച്ചിട്ടുണ്ട്.

ഇതിനുപിന്നാലെയാണ് കൊച്ചിയിലെ ചെറാനല്ലൂരിൽ ജഡ്ജിയുടെ പ്രായപൂർത്തിയാകാത്ത മകൻ ഓടിച്ചെന്ന് ആരോപിക്കപ്പെടുന്ന മെഴ്‌സിഡസ് കാർ ഇടിച്ച് 55കാരനായ ജയബാലകൃഷ്ണൻ മരിച്ച സംഭവം വിവാദമായത്. ഒക്ടോബർ 26-ന് പുലർച്ചെയുണ്ടായ അപകടത്തിൽ പൊലീസ് തുടക്കത്തിൽ സ്വീകരിച്ച നടപടികൾക്കെതിരെ കുടുംബവും നാട്ടുകാരും രംഗത്തെത്തി. പ്രതിയെ സ്റ്റേഷൻ ജാമ്യത്തിൽ വിട്ടയച്ചതടക്കമുള്ള നടപടികൾ ചോദ്യം ചെയ്യപ്പെട്ടു. സംഭവത്തിൽ നാല് പൊലീസുകാരെ സസ്പെൻഡ് ചെയ്യുകയും കൊച്ചി സിറ്റി പൊലീസ് കമ്മിഷണറെ മാറ്റുകയും ചെയ്തു. കേസിൽ പ്രതിയായ കുട്ടിയുടെ പിതാവായ ജില്ലാ ജഡ്ജിക്ക് നവംബർ അഞ്ചിന് ഹൈക്കോടതി മുൻകൂർ ജാമ്യം അനുവദിച്ചതും ചർച്ചയായി. നിയമം എല്ലാവർക്കും ഒരുപോലെ ബാധകമാണോ എന്ന ചോദ്യമാണ് ഈ സംഭവത്തോടെ ഉയർന്നത്.

മുണ്ടക്കയത്തെ രാജന്റെ മരണം, നെടുമ്പാശ്ശേരിയിലെ മൂന്ന് യുവാക്കളുടെ മരണം, കൊച്ചിയിലെ ജയബാലകൃഷ്ണന്റെ മരണം. അപകടങ്ങളുടെ സാഹചര്യങ്ങൾ വ്യത്യസ്തമാണെങ്കിലും ഉയരുന്ന ചോദ്യം ഒന്നു തന്നെയാണ്. റോഡിൽ വാഹനമോടിക്കുന്നവരുടെ ഉത്തരവാദിത്തം എവിടെയാണ്? അമിതവേഗവും നിയമലംഘനങ്ങളും മാത്രമല്ല, പ്രായപൂർത്തിയാകാത്തവർക്ക് വാഹനം കൈമാറുന്നതും മദ്യപിച്ചുള്ള ഡ്രൈവിങ്ങും അപകടത്തിനുശേഷമുള്ള നിയമനടപടികളിലെ വീഴ്ചകളും ഗൗരവമായി പരിശോധിക്കപ്പെടണം. അപകടമുണ്ടായ ശേഷം കേസെടുക്കുന്നതുകൊണ്ടുമാത്രം നഷ്ടപ്പെട്ട ജീവനുകൾ തിരിച്ചുകിട്ടില്ല. ഓരോ വാഹനവും നിരത്തിലിറങ്ങുമ്പോൾ മറ്റുള്ളവരുടെ ജീവന്റെ ഉത്തരവാദിത്തം കൂടി ഡ്രൈവർ ഏറ്റെടുക്കണം. അല്ലെങ്കിൽ റോഡുകൾ ഇനിയും നിരപരാധികളുടെ ജീവനെടുക്കുന്ന മരണവഴികളായി മാറും.