പ്രണയവിവാഹത്തെ തുടർന്ന്​ തട്ടിക്കൊണ്ടുപോയി കൊലപ്പെടുത്തിയ കെവി​ൻ പി. ജോസഫിന്റെ (23) മൃതദേഹം പോസ്​റ്റ്​മോർട്ടത്തിനുശേഷം ഇന്നലെ ആ ചെറിയ വാടകവീട്ടി​ൽ എത്തിച്ചപ്പോൾ മുതൽ കണാനായത് ഹൃദയ ഭേദകമായ രംഗങ്ങൾ ആയിരുന്നു. കണ്ണുകളെല്ലാം നനഞ്ഞുനിൽക്കെ, അന്ത്യചുംബനമേകാൻ എത്തിയ നീനുവിന്റെ ‘എന്തെങ്കിലും ഒന്ന്​ മിണ്ടൂചേട്ടായെന്ന​’ ചോദ്യത്തിനു മുന്നിൽ ജോസഫിനും പിടിച്ചുനിൽക്കാനായില്ല. 

ആ നീല ഷർട്ട്​ നെഞ്ചോട്​ ചേർത്ത്​ നീനു രജിസ്​റ്റർ വിവാഹം നടക്കുമ്പോൾ ഇടാൻ വാങ്ങിയ പുതിയ നീല ഷർട്ട്​ നെഞ്ചോട്​ ചേർത്തുപിടിച്ചായിരുന്നു​ നീനു പ്രിയതമന്​ യാത്രാമൊഴിയേകിയത്​. ആ ഷർട്ട്​ കെവിൻ ധരിച്ചിരുന്നില്ല. കോട്ടയം നട്ടാശേരി വട്ടപ്പാറ വീട്ടിൽനിന്ന്​ മൃതദേഹം പള്ളിയിലേക്ക്​ കൊണ്ടുപോകുന്നതിന്​ മുന്നോടിയായി അന്ത്യകർമങ്ങൾക്കിടയിൽ ​കരഞ്ഞുതളർന്ന നീനുവി​ന്റെ കൈയിൽ ആ ഷർട്ട്​ കാണാമായിരുന്നു. 

മകന്റെ വേർപാട്​ അറിഞ്ഞത്​ മുതൽ അടക്കിപ്പിടിച്ച നൊമ്പരമെല്ലാം പിതാവി​ന്റെ കണ്ണുകളിൽനിന്ന്​ വാർന്നൊഴുകി. കെവിനുമായുള്ള ജീവിതച്ചുവടുകൾ ബന്ധുക്കളുടെ ദുരഭിമാനത്തിനുമുന്നിൽ പൂർത്തിയാക്കാനാകാതെപോയ ഭാര്യ നീനു ഏവർക്കും ഹൃദയഭേദക കാഴ്​ചയായി.​ മരണമറിഞ്ഞതു മുതൽ നീനുവിന്​ ആ​ശ്വാസമായി ഒപ്പമുണ്ടായിരുന്ന കെവിന്റെ പിതാവ്​ ജോസഫും അന്ത്യനിമിഷങ്ങളിൽ നിയ​​ന്ത്രണംവിട്ടതോടെ കോട്ടയം നട്ടാശേരി വട്ടപ്പാറ വീട്​ കണ്ണീരിലമർന്നു.

മൃതദേഹത്തിലേക്ക്​ വീണുകിടന്ന്​ കരഞ്ഞ നീനുവിനെ ആശ്വസിപ്പിക്കാൻ ഏറെ പണിപ്പെടേണ്ടിവന്നു. കെവി​​ന്റെ മാതാവ്​ മേരിയുടെയും സഹോദരി കൃപയുടെയും ശബ്​ദം അലമുറകളായി. ഇത്​ കണ്ടുനിന്ന കണ്ണുകളെല്ലാം നനഞ്ഞു.