ഡൽഹി ലഫ്​.ഗവർണർക്ക് നേരെ രൂക്ഷ വിമർശനവുമായി സുപ്രീംകോടതി. മാലിന്യ സംസ്​കരണം പ്രാദേശിക ഭരണകൂടത്തി​​ന്റെ ചുമതലയാണെന്ന ഡൽഹി ലഫ്​.ഗവർണറുടെ പരാമർശനത്തെയാണ്​ സുപ്രീംകോടതി വിമർശിച്ചത്. ശുചീകരണത്തിനു വേണ്ടി നടന്ന യോഗങ്ങളിലൊന്നും ലെഫ്​. ഗവർണറുടെ ഒാഫീസിൽ നിന്ന്​ ആരും പങ്കെടുത്തിരുന്നില്ലെന്ന്​ അമിക്കസ്​ ക്യൂറി കോളിൻ ഗോൺസാൽവസ്​ കോടതിയിൽ റിപ്പോർട്ട്​ നൽകിയിരുന്നു. ഇത്​ പരിശോധിച്ച ശേഷമാണ്​ കോടതിയുടെ വിമർശനം.

തനിക്കാണ്​ അധികാരമെന്നും താനാണ്​ സൂപ്പർമാനെന്ന​ും നിങ്ങൾ പറയുന്നു. എന്നാൽ ഒന്നും ചെയ്യുന്നില്ലെന്നും കോടതി കുറ്റപ്പെടുത്തി. ഡൽഹിയിൽ മാലിന്യങ്ങൾ കുമിഞ്ഞു കൂടുന്നതി​​ന്റെ ഉത്തരവാദിത്തം​ പ്രാദേശിക ഭരണ കൂടങ്ങൾക്കാണെന്ന്​ ഗവർണർ പറഞ്ഞിരുന്നു​. ലെഫ്.ഗവർണർക്കാണോ സർക്കാരിനാണോ കൂടുതൽ അധികാരമെന്ന വിഷയത്തിൽ ഡൽഹി സർക്കാരിന് അനുകൂലമായ വിധിയായിരുന്നു സുപ്രീം കോടതിയിൽ നിന്നുണ്ടായത്. ഇതിനു പിന്നാലെയാണ് ലെഫ്. ഗവർണർക്കെതിരെ വിമർശനവുമായി സുപ്രീം കോടതി വീണ്ടും രംഗത്തെത്തിയിരിക്കുന്നത് എന്നതും ശ്രദ്ധേയമാണ്.